Во пресрет на погребот, илјадници луѓе се собраа во џамијата Имам Мухамед ибн Абдул ал-Вахаб во Доха, каде што се вклучија во молитвата, пренесува Ал Џезира.
Во соопштението, Хамас повика на ден на „екстремен гнев“ поради убиството на Ханије, барајќи од луѓето „да маршираат од секоја џамија, осудувајќи го кукавичкото злосторство на атентат“, за што го обвинува Израел.
Денеска комеморации се одржуваат и во Турција, Либан, Јемен, Пакистан, Малезија и Индонезија.
На церемонијата во Доха присуствуваше Калед Машал, за кој се претпоставува дека е новиот политички лидер на палестинската група, катарскиот емир Шеик Тамим бин Хамад ал Тани, како и други претставници на Хамас.
Ковчегот на лидерот на Хамас беше обвиен со палестинско знаме во џамија во Доха, заедно со неговиот убиен телохранител.
„Нашата порака до окупаторот (Израел) денес е дека тонете длабоко во калта и дека вашиот крај е поблиску од кога било. Крвта на Ханија ќе промени сè“, изјави претставникот на Хамас, Сами Абу Зухри за Ројтерс.
Погребната церемонија на Ханије беше одржана вчера во Техеран, предводена од иранскиот ајатолах Али Хамнеи.
Ханије беше убиен во средата, а Хамас и иранската влада ветија одмазда против Израел, сметајќи дека Тел Авив е одговорен за убиството.