АФП/Хина

Рекорден резултат на екстремно десничарската партија Алтернатива за Германија (АфД) на парламентарните избори во неделата е продолжување на подемот на радикалната, националистичка или екстремна десница во последните години во Европа, пишува Франс прес.

На власт во Италија и Унгарија

Во Италија, Џорџија Мелони, чија тврдодесничарска популистичка партија „Браќата на Италија“ извојува историска победа на парламентарните избори во 2022 година, ја предводи владата од октомври истата година во коалиција со екстремно десничарската „Лига“ на Матео Салвини и конзервативната партија „Форца Италија“.

Мелони беше единствениот европски лидер кој присуствуваше на инаугурацијата на американскиот претседател Доналд Трамп на 20 јануари.

Во Унгарија, суверенистот Виктор Орбан, премиер од 2010 година, беше реизбран во април 2022 година за четврти последователен мандат по убедливата победа на неговата партија Фидес на парламентарните избори. Во владејачката коалиција е и Христијанско-демократската партија КДНП.

Орбан се подготвува за парламентарни избори во пролетта 2026 година, каде што ќе го предизвика поранешниот државен службеник Петер Маѓар од партијата „Тиса“.

Други коалициски влади

Во Холандија, лидерот на екстремната десница Герт Вилдерс, чија „Партија на слободата“ (ПВВ) победи на парламентарните избори во ноември 2023 година, склучи коалициски договор со три десничарски партии во мај 2024 година.

Тој мораше да се откаже од своите амбиции да стане премиер бидејќи некои партии се заканија дека ќе се дистанцираат од него поради неговите озлогласени антиисламски и евроскептични позиции. Поранешниот шеф на разузнавањето Дик Шуф ​​стана шеф на владата.

Во Словачка, националистичкиот премиер Роберт Фицо (партија „Смер“) се врати на власт во октомври 2023 година. Фицо е меѓу ретките водачи на Европската унија блиски до Кремљ и се здружи со центристичката партија „Хлас“ (Глас) и екстремно десничарската партија СНС.

Во Финска, Финската партија, крајно десничарска партија која беше втора на парламентарните избори во април 2023 година, е членка на владејачката коалиција формирана од конзервативецот Петри Орпо, чија централнодесничарска Национална коалиција победи на изборите.

Во Шведска, екстремната десница ја поддржува владата

Екстремно десничарската партија Шведски демократи (СД), втора на парламентарните избори во 2022 година, нема застапеност во шведската Влада, но е тесно вклучена во нејзините одлуки.

Конзервативниот лидер Улф Кристерсон стана шеф на владата со формирање мнозински блок со поддршка на СД врз основа на коалициска програма која вклучуваше значително намалување на имиграцијата.

Изборни успеси

Екстремната десница беше на прагот на власт и во други земји.

По историската победа на парламентарните избори во септември 2024 година, „Партијата на слободата на Австрија“ (FPÖ), основана од поранешни нацисти, а сега предводена од Херберт Кикл, започна владини разговори со конзервативната ОВП во јануари. Но, тие преговори пропаднаа, особено затоа што екстремната десница сакаше да ја турне земјата во евроскептицизам.

ОВП и ФПО веќе ги здружија силите за да управуваат во пет од деветте австриски региони.

Во Франција, „Републиканскиот фронт“ формиран за избори во летото 2024 година го спречи „Националниот собор“ (РН) да дојде на власт. Но, таа крајно десничарска партија, чија лидерка Марин Ле Пен беше противкандидат на Емануел Макрон на последните два претседателски избори, денес е релативно водечка партија во Националното собрание.

Пробив

Во Германија, АфД со поддршка на соработниците на Доналд Трамп го удвои резултатот на парламентарните избори во неделата и со 20,8 отсто поддршка се позиционираше зад демохристијаните предводени од Фридрих Мерц. Идниот канцелар го отфрли сојузот со националистичката и антиимигрантска партија за формирање коалициска влада.

Во Белгија, екстремно десничарската партија Фламански интерес (ВБ) водеше според анкетите во Фландрија, најнаселениот регион, пред парламентарните избори во јуни 2024 година. Н-ВА, партијата на актуелниот премиер Барт Де Вевер, на крајот го задржа своето водство. ВБ ги подобри резултатите во фламанскиот парламент со 31 од 124 места и во сојузниот парламент каде што е најголемата опозициска група со 20 претставници.

Во Португалија, екстремно десничарската партија Чега (Доста) го зајакна својот статус на трета политичка сила во земјата со 18,1 отсто од гласовите на парламентарните избори во март 2024 година.

На општите избори во Обединетото Кралство во јули 2024 година, на кои Лабуристичката партија на Кир Стармер дојде на власт по 14 години конзервативна влада, антиимиграциската реформска партија на Нејџел Фараж освои околу 14 отсто и влезе во парламнтот со пет пратеника

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.