Во меѓувреме 20.000 тестови стигнаа како донација, 13.000 се веќе поделени и се користат во многу здравствени установи во земјава. Уште 6.000 во овој момент има во резерва и имаме план каде да се дистрибуираат во текот на следната недела, истакна денеска министерот за здравство Венко Филипче на прес-конференција во Владата.

Согласно анализата на Институтот за јавно здравје, посочи министерот, процентот на позитивни случаи од тестирани генерално се движи меѓу 36 и 41 процент, а највисок процент – 41,2 на позитивни од тестирани е регистриран на 17 ноември, кога има најголем број нови случаи – 1407 и после тоа бројот на нови случаи постепено и благо опаѓа.

Потенцира дека бројот на нови случаи забавува после период од две до четири недели нагл пораст на бројот на новодијагностицирани.

– За жал евидентен е порастот на смртни случаи и на глобално ниво и кај нас. Тоа што охрабрува е дека расте бројот на оздравени пациенти од домашно и болничко лекување. Конкретно минатата недела процентот на оздравени во однос на претходната недела е зголемен за 45 проценти, а трендот на зголемен број оздравени пациенти продолжува и во текот на оваа недела. Просекот на хоспитализирани во изминатите две недели е околу 1280, а проценот на хоспитализирани од вкупниот број случаи е 6,7 и во целокупниот овој период е многу близу до 7 проценти, рече Филипче.

Нагласи дека мобилизиран е целокупниот кадар на сите одделенија, ангажирани се и дел од приватните специјализанти кои покажале волја да се вклучат во овој процес, како и дел од младите и лиценцирани лекари кои имаа платена пракса, која за дел од нив заврши и се разговара за модалитетите за нивно вработување во здравствениот систем, а на тоа се работи со Фондот за здравствено осигурување и Министерството за финансии.

– Системот „МојТермин" освен во некои клиники каде е редуциран, работи нормално. Нема одложување на хроничните интервенции. Сега и во целокупниот изминат период во болниците во Скопје и во другите градови има слободни кревети. Има доволна количина заштитна опрема близу милиони ипол парчиња, дел од набавки дел од донации, додаде Филипче.