Култура

Почнува Интернационалниот филмски фестивал „Астерфест“

Во Струмица денеска почнува 12. Интернационален филмски фестивал „Астерфест“ под мотото „Мали приказни-голем ум“.

На фестивалот ќе бидат прикажани 21 кратки играни, документарни и анимирани филмови во главна конкуренција, 12 во ревијалната програма, како и четири долгометражни филмови од 17 држави од светот.

Годинешни лауреати се словенечкиот актер и сценарист Борис Каваца кој ќе добие Специјално признание за високи достигнувања во филмската уметност и германскиот сценарист, режисер и продуцент Вајт Хелмер кому ќе му биде врачена наградата „Астер“ за високи достигнувања во светскиот филм.

Селекторот на компетитивната филмска програма Атанас Чуповски истакна дека квалитетот на пристигнатите филмови за селекција за годишново издание на Астерфест бил импресивен и тоа во сите категории, и во категориите на документарен и анимиран филм, а особено во категоријата на краткометражен игран филм.

- Во поглед на застапеноста на националните кинематографии, во официјалната селекција на ова издание влегоа филмови претежно од европска продукција: шпанска, португалска, француска, италијанска, ирска, финска, полска, украинска, руска, српска, грчка и се разбира, македонска, но и филмови од САД, Канада, Чиле, Иран. Во годишнава селекција ги имаме и двата добитника на Оскар и еден номиниран за наградата, рече Чуповски.

За Златната, Сребрената и Бронзената потковица, за Старозлатниот проектор, како и за наградите „Ѓорги Абаџиев“ и „Ацо Алексов“ ќе се натпреваруваат кратките филмови: „Пелтек“ на Бенџамин Клири, „Должност„ на Ангел Манзано, „Никулец“ на Барни Фрајдман, „Син“ на Филип Сотниченко, „Сосњдот од горниот кат“ на Поја Бадкобех, „Сипаници“ на Фулвио Рисулео, „Кавалче“ на Панајотис Краварис, „Погребален тим 12“ на Дејвид Дарг, „Низ прозорското окно“ на Девн Вестлејк, „Милји да поминам пред да заспијам“ на Хана Ховит, „Корените на слото“ на Желимир Гвардиол, „Осветлена темнина“ на Арсим Фазлија, „Опсег на можности“ на Кристина Пичи, „Циркус Дебре Беран“на Лукас Бергер, „Приказна на мечето“ на Габриел Осорио Варгас, „Човекот што не сакаше да умре“ на Гоце Цветановски, „Кружно патување на Марето“ на Жарко Иванов, „Цртежи на карпи“ на Енрико Диего, „Маѓепсаниот Гучо“ на Дарија Копиец, „Будалиот Џек“на Алексеј Черногоров и „Патување пеш“ на Крис Кембе.

Во ревијалната ретроспективна програма ќе се прикажат филмови од македонски автори: „Девојката што паѓа“ на Владимир Лукаш, „Сам“ на Тања Симоновска, „Последни чекори“ на Стефан Сидовски, „Незрели цреши“ на Небојша Јовановиќ, „Карма“ на Владимир Митревски и „ШШШТ... запеј ми“ на Андреј Волкашин.

Програмата Мувиленд ќе биде посветена на современите кратки филмови од Израел, а селекторот Влатко Галевски ги одбра филмовите „Нешто многу мало“, „Мили Боже“ „Ниоша“, „Јалова“ и „Цреши“ за кои посочи дека се дел од израелската моќна продукција на краток филм во која учествуваат не само студентите и нивните експерименти туку врвни и етаблирани израелски режисери.

Како куриозитет ќе биде прикажан филмот ЖЕД на Димитрие Османли, во реставрирана и дигитализирана верзија од Кинотеката на Македонија, стои во официјалната програма.

За лауреатите Хелмер и Каваца се предвидени традиционалните Астер портрети и Тивериополски беседи во манастирот во Велјуса. Во рамки на Фестивалот ќе биде одржана и мала работилница со Матеј и Русомир Богдановски на тема „Стрипот и филмот“.

Сите филмски проекции се одржуваат во НУЦК „Антон Панов“, а фестивалот е финансиски поддржан од Агенцијата за филм на Република Македонија и од Општина Струмица.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Свет

Меѓународниот кривичен суд презема мерки за заштита од можните санкции од САД

Меѓународниот кривичен суд (МКС) презеде низа чекори за да се заштити од потенцијални сеопфатни санкции од страна на Соединетите Американски Држави, изјави денес заменик-обвинителката на МКС, Наџат Шамим Кан.

„Направивме големи напори за да осигуриме дека судот е заштитен од последиците од какви било потенцијални идни санкции“, рече Кан, според „Фајненшл тајмс“ (FT).

Таа рече дека судот реорганизирал многу од своите системи во текот на изминатата година, вклучително и префрлање од канцеларискиот софтвер на „Мајкрософт“ на германскиот софтвер со отворен код „ОпенДеск“, како и алтернативни решенија за здравствено осигурување на вработените и банкарски услуги.

Фајненшл тајмс соопшти дека судот им исплаќал плати на вработените со месеци однапред за да ги ублажи сите потенцијални прекини во плаќањата.

Порано оваа недела, „Ројтерс“ објави дека администрацијата на американскиот претседател Доналд Трамп подготвила санкции против целиот Меѓународен кривичен суд и планирала наскоро да ги објави.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

ВМРО-ДПМНЕ: Рубин Земон, човекот кој го негираше македонскиот идентитет се уште е член на Централниот одбор на СДС

На Венко Филипче и СДС не може да им се верува за ништо.

Рубин Земон кој беше член на Извршниот одбор на СДС пролетва излезе во јавност со тврдење дека Гоце Делчев не направил ништо за Македонија и оти не е важен за македонскиот идентитет.

По критиките кон него како член во највисокиот партиски орган, а и критики кон претседателот на СДС Венко Филипче, Земон излезе во јавноста и рече дека се повлекува од ИО на СДС бидејќи не сака да и нанесе штета на партијата.

Сега истиот тој Земон беше на седницата на Централниот одбор на СДС која се одржа во четвртокот вечерта.

Очигледно се што прават Земон и Филипче е лажење на граѓаните и ништо повеќе. Со терање на ваква политика СДС само тоне, се наведува во партиското соопштение.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Свет

Трамп го одби иранскиот предлог за седумдневен прекин на огнот, планира бомбардирање

Американскиот претседател Доналд Трамп го отфрли иранскиот предлог за седумдневен прекин на огнот, предложен од иранскиот министер за надворешни работи, Абас Аракчи.

Американскиот претседател Доналд Трамп го отфрли иранскиот предлог за седумдневен прекин на огнот, предложен од иранскиот министер за надворешни работи, Абас Аракчи, објави денес „Волстрит џурнал“ (WSJ), повикувајќи се на американски претставници.

Американските претставници изјавија за весникот дека Трамп им кажал на своите помошници дека очекува бомбардирањето на Иран да продолжи по ноемвриските избори за Конгресот на САД, додека американскиот претседател, велат тие, изразил сомнежи на затворени состаноци дека Иран ќе ги исполни неговите барања.

Иран предложи седумдневен прекин на огнот минатата недела за време на состанокот во Катар, што би можело да го отвори патот за запирање на иранските напади врз бродовите во замена за укинување на блокадата од САД, објави WSJ, повикувајќи се на извори запознаени со преговорите.

Сепак, американски претставници запознаени со ситуацијата изјавија дека Вашингтон им кажал на Иран и на медијаторите дека Трамп нема намера да ја укине поморската блокада на Иран, бидејќи САД веруваат дека економскиот притисок ќе го принуди Техеран да го потпише договорот.

Според „Њујорк тајмс“, повикувајќи се на арапски медијатори, иранските дипломати дале неколку предлози за прекин на војната и признале дека економската криза во нивната земја се влошува.

Сепак, официјалните лица нагласија дека сегашниот став на Трамп би можел да се промени ако конфликтот продолжи во наредните недели и дека на него би можеле да влијаат резултатите од изборите за Конгресот.

Американските претставници изјавија дека Трамп се двоуми да продолжи со големи воени операции против Иран, делумно затоа што САД сакаат да ги зачуваат своите намалени резерви на муниција за други итни случаи.

Во меѓувреме, преговорите меѓу Вашингтон и Техеран продолжуваат преку медијатори, вклучително и разговори за нуклеарната програма на Иран, потврдија официјални лица за американскиот весник.

Американските претставници открија дека напорите предводени од САД да им дозволат на танкерите да поминат низ Ормускиот теснец ја намалија итноста за постигнување договор.

Иранскиот министер за надворешни работи, Абас Аракчи, потврди во петокот дека Техеран доставил план до Вашингтон со кој Ормускиот теснец би се отворил за поморски сообраќај во рок од седум дена.

Аракчи рече дека Иран доставил конкретен седумдневен план до САД преку Катар и дека, доколку се исполнат потребните услови, теснецот би можел да се отвори повторно, а сообраќајот да се врати во нормала во предвидениот временски рок.

Според него, на шестиот ден од рокот, Ормутскиот теснец би бил отворен, додека преговорите за договорените прашања би започнале следниот ден за да се постигне конечен договор.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.