Имплементацијата на реформите се вистинскиот чекор, а тие чекори се поттикнати и со новиот План за раст на Западен Балкан на кој интензивно работиме и од двете страни и земјите од регионот и ЕУ, порачал заменик-министерот за финансии Филип Николоски кој во Подгорица учествува на состанокот на министри од регионот и претстаници од ЕУ посветен на Планот за раст на Западен Балкан.

- Ваквиот регионален формат на состанување, кој е трет посветен на Планот за раст, претставува ефикасен модел за забрзување на реформската агенда. Реформската агенда во РС Македонија е веќе усвоена од страна на Владата и испратена во ЕК. Она што е важно е да дадеме поттик во остварување на тие реформски процеси и да го забрзаме нивното спроведување. Тоа ќе биде нашиот вистински пат за да стигнеме до ЕУ, истакнал заменик-министерот Николоски.

Како што соопшти Министерството за финансии, на регионалниот состанок Николовски се осврнал на конкретните активности што ги презема Владата во однос на пристапувањето на земјата кон СЕПА регионот и унапредување на зелените коридори.

- РС Македонија изрази подготвеност да ги исполни критериумите за блиски економски и правни односи со ЕУ и подготвеност да врши платни трансакции во евра преку пристапувањето во СЕПА. Тоа од причина што ќе придонесе за отстранување на пазарните бариери со земјите од ЕУ, подигнување на кредибилитетот на финансискиот сектор на меѓународната сцена, продлабочување на трговските односи со европскиот економски регион, поедноставни, побрзи и поевтини услуги за граѓаните и компаниите. Барањето е подготвено и се очекува да се поднесе апликацијата до средината на оваа година, нагласил Николоски.

Тој додал дека дополнителни придобивки се очекуваат и од унапредувањето на зелените коридори кои беа воспоставени за време на ковид-кризата.

- Постојните зелени ленти веќе придонесоа за намалување на времето на чекање на граничните премини, а со нивното натамошно проширување, ќе се обезбедат непрекинати синџири на снабдување и засилена трговија, што ќе го направи регионот поатрактивен за инвеститорите Со нивното проширување ќе се вклучат повеќе видови стоки коишто ќе бидат опфатени со зелените коридори, како и гранични премини меѓу Европската унија и земјите од Западен Балкан, рекол заменик-министерот за финансии.

Притоа посочил на поддршката што ЕУ ја дава во областа на царината, како и на посветеноста на Владата во спроведување на националните реформи во оваа област. Тој нагласил дека понатамошното унапредување на царинската соработка треба да се фокусира не само на олеснување на трговијата, туку и на заштита на финансиските интереси и на ЕУ и на земјите од Западен Балкан, како и на безбедноста граѓаните.

Ова е трет министерски состанок посветен на Планот за раст. Првиот се одржа во Скопје, вториот во Тирана и на денешниот состанок домаќин е Подгорица.

Амбасадорот на Обединетото Кралство во Србија, Едвард Фергусон нагласи дека е неопходно што поскоро да се формира Заедницата на српски општини, бидејќи тоа е важен дел од дијалогот и нормализацијата на односите меѓу Белград и Приштина.

Белградските медиуми пренесоа од негово интервју за агенцијата Танјуг во кое на прашањето дали верува дека ЗСО некогаш ќе се формира, рече дека поминале 11 години од потпишувањето на Бриселскиот договор со кој беше договорено формирање на Заедницата и дека нејзиното формирање се одложува.

„ЗСО веќе требаше да биде формирана и сакаме да ја видиме што е можно поскоро да се формира. Сметаме дека ова е важен механизам, што треба да им даде доверба на српските заедници во Косово за тоа како најдобро да се спроведат нивните работи“, рече Фергусон.

Тој додаде дека Велика Британија смета дека ЗСО е важен дел од нормализацијата на односите меѓу Белград и Приштина и дека поради таа причина Велика Британија продолжува да ги охрабрува властите во Приштина да тргнат напред во таа насока што е можно поскоро, и дека бил многу јасен и пратеникот на британскиот премиер за Западен Балкан, лордот Стјуарт Пич.

На прашањето каков е ставот на Лондон во однос на едностраните потези на Приштина, како што е укинувањето на динарот на Косово, Фергусон додава дека сите еднострани мерки создаваат дополнителен притисок врз заедниците на Косово и дека тие не се ниту мудри, ниту корисни.

Би-Би-Си и Гласот на Америка објавија податоци од извештајот на Хјуман рајтс воч за масовни убиства на цивили од страна на вооружените сили на земјата.

Според извештајот објавен од ХРВ вчера, војската убила околу 223 цивили, меѓу кои 56 деца, во селата за кои верувале дека соработуваат со бунтовниците.

Портпаролот на владата на Буркина Фасо, Тонсир Мирјан Корин Сану, рече дека двете радио станици ќе бидат суспендирани на две недели и ги предупреди другите медиуми да избегнуваат известување за тие случувања.