Здравје

Почна со работа хируршкото одделение во струшката болница

Хируршкото одделение во струшката општа болница денеска почна со работа, по пауза од околу една недела поради зараза со морбили на дел од персоналот, како превентива против ширење на заразата.

Ваквата одлука ја донела Комисијата за хоспитални инфекции, информира претседателот Мухамед Асани. Тој посочи дека ја следат состојбата и со останатите одделенија на болницата.

– Извршена е дезинфекција на болницата, а вакциниран е и поголем дел од персоналот. Оние што беа заразени од морбили се излекувани и вратени се на работа, изјави Асани.

Началникот на струшката хирургија, др. Владо Дојчиновски посочи дека нема нови заразени случаи на вработени во одделението последнава недела.

– Комисијата одлучи, и ние од денеска почнавме со работа. Веднаш почна со работа и оперативниот дел. Поминаа повеќе од седум дена, период на инкубација и нема нови заболени од морбили, изјави Дојчиновски за МИА.

Според раководителот на епидемиолошката служба во Струга Добривое Кузманоски, трендот со заболени од морбили последните денови опаѓа.

– Вчера имавме само една пријава на заразено лице со морбили на територија на општина Струга, додека минатата недела имаше шест заразени. Се намалува трендот на заразени, а во наредниот период очекуваме состојбата да се нормализира, изјави Кузманоски.

Хируршкото одделение во струшката општа болница беше затворено повеќе од една недела, како превентива од ширењето на малите сипаници со кои беше заболен дел од персоналот, а итните случаи беа препраќани во болницата во Охрид.

Во Струга и Струшко од почетокот на епидемијата досега се регистрирани 120 заразени од морбили.

Свет

Белата куќа со осуда за „малиот процент“ студенти за предизвикување немири на универзитетите

Белата куќа осуди „мал процент студенти, поттикнувачи на немири“ по ноќните судири и апсења во одредени американски кампуси кои протестираат против војната во Газа.

„Студентите имаат право да посетуваат настава и да се чувствуваат безбедно“, рече портпаролката на Белата куќа Карин Жан-Пјер на прес-конференција, додавајќи: „Ќе продолжиме да нагласуваме дека антисемитизмот мора да биде осуден“.

Според американски медиуми, околу 1.000 луѓе се приведени во судирите на универзитетите ширум САД, и според податоци обезбедени од полицијата и властите во Њујорк, околу 300 луѓе биле приведени на Универзитетот Колумбија, центарот на протестите поради војната во Газа со обвиненија за прекршок, кражба и помали кривични дела.

На Универзитетот во Калифорнија во Лос Анџелес, попознат како UCLA, не се одржуваа часови. Таму во текот на ноќта избувнал конфликт кога, како што пренесуваат американски медиуми, група произраелски демонстранти се обиделе да ги урнат барикадите зад кои во шатори се наоѓале пропалестинските демонстранти.

Неколку часа пред да избијат немирите во UCLA, полицијата упадна во зградата на Универзитетот Колумбија во Њујорк, окупирана од антивоени демонстранти, завршувајќи го протестот кој ја парализираше институцијата.

Протести избија во околу 30 универзитети во САД, со барање САД да престане да го поддржува Израел и со компаниите кои ја поддржуваат војната во Газа. Тоа е убедливо најголемиот студентски протест во САД во 21-от век, а полициската реакција што следеше потсетува на сцени од 1960-тите кога имаше огромно студентско протестно движење против Виетнамската војна, јавија американските медиуми. /МИА

Регион

Во Србија продолжува парламентарна расправа, се чека гласање за новата влада

Српскиот парламент претпладнево ќе ја продолжи првата вонредна седница на која единствена точка на дневен ред е избор на Влада и давање заклетва на претседателот и членовите.

Се очекува дискусијата да продолжи, по што пратениците треба да гласаат, јавија српските медиуми.

Продолжението на првата вонредна седница на Националното собрание во актуелното свикување е закажано за девет часот. На седницата, која почна вчера, излагање поднесе претставникот за состав на новата Влада Милош Вучевиќ.

Во тричасовното обраќање пред пратениците, меѓу другото, тој истакна дека владата што ја предлага ќе биде влада на континуитет во најголема мера, како и дека полноправното членство во ЕУ останува стратешки приоритет на Србија. Тој наведе и дека најголемиот предизвик на новиот кабинет ќе биде одбраната на суверенитетот, ќе се предложи задолжителен воен рок од четири месеци. Вучевиќ порача дека членовите на Владата мора да бидат тим, дека секогаш мора да бидат подготвени да ги штитат националните и виталните интереси на Србија, а неговото прво и единствено барање е несомнената лојалност кон татковината. На Собранието му предложи 31 член на кабинетот, меѓу кои има осум нови личности. /МИА

Свет

Земјотрес од четири степени во поширокото подрачје на Лос Анџелес

Земјотрес со јачина од 4,1 степени според Рихтер синоќа го погоди поширокото подрачје на Лос Анџелес, соопшти Сеизмолошкиот институт на САД.

Земјотресот се случил во областа Корона, во близина на Лос Анџелес, објави Фокс.

Земјотресот бил почувствуван во пошироката област, западно до Лос Анџелес, Лонг Бич, округот Оринџ и Санта Кларита./МИА