Почина професорот Стојмен Михајловски, еден од првите девет уставни судии

 По долго боледување денеска почина проф. д-р Стојмен Михајловски, кој беше уставен судија во периодот од 1994 до 2003 година.

Роден е во 1941 во Трново, Кривопаланечко. Дипломирал на Правниот факултет во Скопје 1965 година, магистрирал во Институтот за социолошки и политичко правни истражувања во Скопје 1973 година, докторирал на Факултетот за политички науки на Универзитетот во Сараево 1979 година на тема „Ефикасноста на политичкото одлучување".

Професор Михајловски беше уставен судија во периодот од 1994 до 2003 година. Во периодот од 1966 до 1994 година беше научен советник и редовен професор на Институтот за политичко – правни истражувања во Скопје, а во два и пол мандати беше и директор на Институтот. Како редовен професор ги предаваше предметите уставно право и политички систем на постдипломските студии при Институтот за социолошки и политичко – правни истражувања, на Факултетот за безбедност, на Воената академија и на Факултетот за општествени науки во Скопје.

Учествувал и раководел со повеќе национални и меѓународни научно-истражувачки проекти од областа на правните и политичките науки. Автор е на голем број самостојни научни трудови од областа на избирачкото право и политичкиот систем, а објавил и повеќе од 100 статии и други прилози во домашни и странски научни и стручни списанија

Одликуван е со Орден заслуги за народ со сребрен венец и добитник е на Плакета на Универзитетот „Св. Кирил и Методиј" – Скопје.

Проф. д-р Стојмен Михајловски е еден од основачите на Социјалистичката партија на Република Македонија.

Повеќе манифестации во Охрид со измени во програмата и согласно здравствените протоколи

Новонаметнатите околности предизвикани од епидемијата на коронавирусот резултираа со откажувања на многу културни, забавни и спортски манифестации што ја одбележуваа летната туристичка сезона во Охрид.

Но, некои од нив се одржаа и ќе се одржат, со прилагодување кон препораките и протоколите за заштита на учесниците и публиката од Ковид-19.

Иако презакажана и оваа година ќе се одржи спортската манифестација „Охрид трчаТ", и тоа од 28 до 30 овој месец.

Организаторите приоритет даваат на заштитата, безбедноста и сигурноста на учесниците на настанот.

– Одговорноста е голема. „Охрид трчаТ" ќе биде прва улична трка за оваа година во нашата земја и пошироко и навистина ни претставува голем мотив и предизвик, во вакви услови да го покажеме нашиот професионализам и визија за подоброто утре, наше, на Охрид и на Македонија, изјави директорот на трката Иван Цветкоски.

Бројот на учесници на манифестацијата е ограничен на 500, по 250 на полумаратонот (21 километар) и 250 за рекреативната трка на пет километри.

И Музичкиот летен фестивал „Охрид- фест 2020" годинава ќе се одржи со измени во програмата, и тоа без можеби најатрактивната Интернационална вечер.

Фестивалот се одржува веќе 27 години, но прв пат во вакви услови на неизвесност предизвика од пандемијата на Ковид 19. За да одржи континуитет, ова феситвалско издание ќе се одржи со скратена програма и тоа само со Фолк вечерта, предвидена да се одржи на 11 септември на сцената „Долни Сарај", со строги ограничувања на бројот на места за публиката.

Организаторите на фестивалот најавуваат дека се ќе биде надоместено на наредното фестивалско издание, следната година.

– За жал состојбата со коронавирусот ни ги смени плановите и заложбите, но така е и кај нас и во целиот свет. До последен момент преговарав со странските учесници и телевизии и дефинитино Интернационалната вечер ја одложуваме за 2021 година. Неизвесноста со пандемијата во нашата земја, карантин од две недели, што ги чека учесниците по враќањето во нивната земја, ме предизвика годинешното издание да биде во знак на Фолк вечерта, изјави Григор Копров, идејниот творец на фестивалот.

МЗ: На Психијатрија 4.000 телефонски разговори за психолошка поддршка на граѓаните

На ЈЗУ Клиниката за психијатрија се реализирани околу 4.000 телефонски разговори за психолошка поддршка на граѓаните за време на пандемијата со Ковид 19, почнувајќи од март, соопшти Министерството за здравство.

На првата телефонска линија за психолошка поддршка, која беше отворена на 15 март за возрасни во самоизолација во текот на целиот период, вклучувајќи ги викендите и празниците, која е достапна секој ден од 8 до 20 часот, имало повеќе од 2.200 разговори.

Во текот на март се отворија уште две други телефонски линии, од кои едната за психолошка поддршка на родители на деца на предучилишна и училишна возраст од страна на Клиниката за психијатрија, како и други телефонски линии за психолошка поддршка на лица од различни категории во соработка со УНИЦЕФ – Психолошка поддршка на родители на деца со пречки во развојот и Психолошка поддршка на адолесценти, на кои вкупно се реализирани повеќе од 500 разговори.

На телефонската линија за поддршка на жени во бременост и после породување се реализирани 50 разговори. На целните линии кои беа отворени за поддршка на лица од различни категории, вклучително и психолошка поддршка на албански јазик, како и поддршка на жителите на Дебар и Центар Жупа во периодот на карантин на тие општини реализирани се 1.000 разговори.

Во моментов активни линии за граѓани од различни категории се: за Психолошка поддршка на возрасни лица 072/919-009, психолошка поддршка за деца, адолесценти и нивни родители 072/912-979, психолошка поддршка за жени во бременост и после породување 078/378-766 и психолошка поддршка на албански јазик 070/291-657, стои во соопштението од Министерството за здравство.

Приведен осомничен за двете запалени возила на ЕВН во Тетово

Тетовската полицијата го пронашла и привела пироманот кој во изминатата ноќ запали две возила на електродистрибутивната компанија ЕВН Македонија.

Од МВР велат дека приведен е 43-годишен тетовец кој се сомничи за кривично дело предизвикување општа опасност. Тетовската полиција интервенирала на запалено возило на улица „Иво Рибар Лола“ и во станбениот комплекс блок 70. По кратка интервенција двата пожари се локализирани и изгаснати.

Овие инциденти се случуваат во пресрет на за денеска најавените протести во шест градови низ државата против зголемување на цената на електричната енергија.

Со почеток од 18 часот е закажан протест во Скопје. Како што наведуваат организаторите, собирот е во паркот Чаир и ќе се маршира до влада.

На протестот минатата недела се побара итно поништување на последната одлука на регулаторната комисија за енергетика, нејзино распуштање и формирање независно арбитрарно тело за да се провери квалитетот на енергетските услуги.

притисни ентер