Веднаш по слетувањето на аеродромот во Бергамо, тој самиот и се предал на полицијата. „Циганскиот бос“ од Македонија, како што го нарекуваат италијанските медиуми, е првообвинет во случајот „Калчо скомезе“ за местење на фудбалски натпревари во италијанските лиги.
Властите во Италија скандалот го обелоденија во 2012 година, но се досега Илиевски не и беше достапен на истрагата. Според обвинението против него напишано на 120 страници, тој се товари за 40 наместени натпревари во Италија во периодот од 2009 до 2011 година. Во неговата мрежа биле вклучени 30 професионални фудбалери и 130 членови кои помагале во организацијата. Центарот на криминалната група бил Сингапур, а се оперирало и преку Македонија, Унгарија и Швајцарија.
Најатрактивно име кое се споменуваше како инволвирано во овој скандал беше Антонио Конте – актуелниот селектор на Италија, а како соработници на Илиевски се споменуваат уште и познатите фудбалски имиња како Стефано Маури, Кристиано Дони, Маури Брешан, Џузепе Сињори.
Според италијанските медиуми, организацијата заработила два милиона евра само од мечот Лече - Лацио, од кои 400.000 му биле дадени на капитенот на Лацио Стефано Маури како мито.
Дел од осомничените фудбалери веќе беа изведени пред обвинителството во Италија, дел сеуште се во притвор. Сега се чека да пропее и Илиевски, оти тој изјавил дека е подготвен да соработува со истражните органи.
Инаку по стилот на „обработка“ и начинот на работа на Македонецот, во Италија се појави и книга под наслов „Методот Илиевски“ која беше експресно распродадена, а се однесува токму на местенките и начинот на кој оваа група „оперирала“ со екипите и играчите.