На годишното собрание на Европската слободна алијанса (ЕФА) едногласно е усвоена декларација со која од Бугарија се бара формално извинување за злосторствата врз македонското малцинство за време на комунистичкото владеење, како и спроведување на 14-те случаи пред Европскиот суд за човекови права поврзани со регистрацијата на македонски организации во Бугарија, е наведено во извештајот на ЕФА. Тоа извинување, според ЕФА, треба да ги признае страдањата на илјадници Македонци кои биле тепани, присилно раселувани, понижувани, казнувани, затворани и убивани поради изразување на сопствениот етнички идентитет и поради спротивставување на бугарските политики на денационализација

Во декларацијата се оценува дека македонското малцинство во Бугарија се соочува со една од најсериозните кризи на човековите права во рамките на Европската Унија.

Според Европската слободна алијанса, системската репресија и етничкото негирање со кои се соочуваат Македонците во Бугарија се директно продолжение на политиките на денационализација започнати во времето на комунистичкиот режим на Тодор Живков.

„Македонското малцинство во Бугарија моментално се соочува со една од најтешките кризи за човекови права во рамките на Европската Унија. Оваа системска репресија и етничко негирање се директен продолжеток на политиките за денационализација иницирани под комунистичката диктатура на Тодор Живков. Во 1963 година, политиката на негирање на постоењето на македонско малцинство беше централен дел од „преродбеничките процеси“ дизајнирани за насилно асимилирање на малцинствата во „обединета бугарска социјалистичка нација“. Денес, македонските заедници сè уште ја слушаат истата исклучувачка реторика од современите бугарски политичари која некогаш ја користеше Живков: дека „Македонците не постојат и не смеат да постојат“.

Во декларацијата се посочува дека во таков контекст Македонија е ставена во позиција да го брани сопственото постоење под, како што се наведува, синтетичката рамка на „решавање на билатералните односи“, пренесе Експрес.

Според ЕФА, тие односи се водат со сосед кој го негира македонскиот идентитет преку долгогодишната политичка порака: „Македонија во ЕУ – да, но македонизам – не“.

Најдиректното барање во документот е Бугарија формално да се извини за злосторствата извршени врз македонското малцинство за време на комунистичките години. Тоа извинување, според ЕФА, треба да ги признае страдањата на илјадници Македонци кои биле тепани, присилно раселувани, понижувани, казнувани, затворани и убивани поради изразување на сопствениот етнички идентитет и поради спротивставување на бугарските политики на денационализација.

Европската слободна алијанса бара итно подигнување на свеста за сериозната состојба со човековите права на македонското малцинство во Бугарија. Посебно се нагласува одбивањето на бугарската држава да ги спроведе повеќе од 14-те случаи поврзани со регистрацијата на македонските организации, како и говорот на омраза со кој, според декларацијата, се соочуваат Македонците во Бугарија.

ЕФА (European Free Alliance) е европска политичка партија која обединува регионалистички, автономистички и партии што се залагаат за поголеми права на народи и региони во Европа.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Но, промените не се случуваат само на програмски и политички план. СДСМ паралелно се зајакнува кадровски и организациски, отворајќи простор за нова енергија, нови идеи и нови луѓе.

Во оваа насока, претседателот на СДСМ, д-р Венко Филипче, донесе одлука за именување нови претседатели на општинските организации во Шуто Оризари, Струмица и Пробиштип.

-За претседател на општинската организација во Струмица е назначен д-р Лазо Манев, специјалист по радиологија, докажан во својата работа и современите дијагностички пристапи за рана детекција на различни заболувања, но и во своите менаџерски способности.

-За претседателка на општинската организација Шуто Оризари е назначена Салија Љатив Петрушевска, докторка, стоматолог, долгогодишна активистика, поранешна директорка на Специјализирана болница за геријатриска и палијативна медицина „13 ноември“ - Скопје.

-За претседателката на општинската организација Пробиштип е назначена Весна Ристовска, советничка во Советот на општината, која целото свое работно искуство го поминува во приватниот сектор, долгогодишна активистика и поранешна претседателка на Форумот на жени во Пробиштип.

Станува збор за дел од процесот на кадровско освежување и организациско јакнење на партијата, за уште посилна и поефикасна работа на терен, поблиска комуникација со граѓаните и членовите.

СДСМ

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Министерството за здравство, со поддршка од Светската здравствена организација, Канцеларијата на СЗО во Македонија и Канцеларијата на СЗО за квалитет на здравствена заштита и безбедност на пациентите во Атина, започна значајна национална иницијатива за зајакнување на квалитетот на здравствената заштита и безбедноста на пациентите во земјата.

Иницијативата ја одразува заложбата на Владата за подобрување на здравствените услуги и постигнување подобри здравствени исходи за граѓаните, во согласност со приоритетите утврдени во Програмата на Владата во делот на здравството. Со поставување на квалитетот на здравствената заштита и безбедноста на пациентите во центарот на здравствените реформи, државава прави важен чекор кон градење посилен, поотпорен и човек-ориентиран здравствен систем.

Иницијативата беше официјално започната на национална работилница во Скопје, на која присуствуваа министерот за здравство, Азир Алиу, претставникот на СЗО во Македонија, д-р Аким Али, и д-р Жоао Бреда, раководител на Канцеларијата на СЗО за квалитет на здравствена заштита и безбедност на пациентите во Атина. На настанот учествуваа и високи претставници на клучните национални здравствени институции, вклучително и директорите на Агенцијата за акредитација и квалитет на здравствената заштита, Фондот за здравствено осигурување и Институтот за јавно здравје, како и претставници на здравствени установи, академската заедница, професионални здруженија и пациентски организации.

Во основата на иницијативата е првата сеопфатна проценка на националната рамка за квалитет на здравствената заштита во државава. Проценката, која ќе се спроведува во периодот мај–август 2026 година, ќе обезбеди јасна слика за постојната состојба и ќе помогне во идентификување на приоритетите за идни реформи, политики и инвестиции.

Отворајќи ја работилницата, министерот за здравство Азир Алиу ја истакна заложбата на Владата за унапредување на квалитетот на здравствената заштита и безбедноста на пациентите како клучни приоритети на националната реформска агенда во здравството.

„Унапредувањето на квалитетот и безбедноста на здравствените услуги е клучна заложба на оваа Влада и важен дел од нашата Програма за здравство. Нашата цел не е само да обезбедиме повеќе здравствени услуги, туку услуги кои се побезбедни, поквалитетни и поориентирани кон пациентот; услуги кои носат подобри резултати, поголема доверба и сигурност за граѓаните. Квалитетот и безбедноста на пациентите не се дополнителен елемент на реформата — тие се нејзината суштина,“ изјави министерот Алиу.

Процесот на проценка ќе вклучи консултации со здравствени институции, професионални здруженија, академската заедница, пациентски организации и други релевантни чинители, како и теренски посети, технички состаноци, интервјуа и преглед на релевантните политики и практики. Наодите ќе обезбедат основа за зајакнување на управувањето со квалитетот, отчетноста и континуираното подобрување на здравствените услуги.

„СЗО ја поздравува силната заложба на Министерството за здравство и националните партнери да ги постават квалитетот на здравствената заштита и безбедноста на пациентите во центарот на здравствените реформи. Квалитетот е од суштинско значење за постигнување подобри здравствени исходи, зајакнување на довербата на јавноста и обезбедување инвестициите во здравството да донесат конкретни придобивки за луѓето. СЗО останува посветена да ја поддржи Северна Македонија во преточување на наодите од оваа проценка во практични активности кои ќе го зајакнат здравствениот систем и ќе го подобрат искуството на пациентите,“ изјави д-р Аким Али, претставник на СЗО во државава.

За време на посетата на Македонија, д-р Жоао Бреда сподели меѓународни искуства и примери од земји од Европскиот регион на СЗО кои успешно спровеле национални политики за квалитет и програми за подобрување на квалитетот.

„Квалитетот на здравствената заштита е еден од најсилните двигатели на подобри здравствени исходи и посилни здравствени системи. Со спроведувањето на оваа сеопфатна проценка, Македонија покажува лидерство и јасна посветеност кон континуирано подобрување. Овој процес не е само проценка на моменталната состојба, туку и можност да се идентификуваат конкретни области за дејствување. СЗО е горда што ја поддржува земјата во развојот на посилна национална рамка за квалитет, унапредување на безбедноста на пациентите и вклучување на луѓето, како и во градењето култура на учење во здравствениот систем,“ изјави д-р Жоао Бреда.

Овие заеднички напори ќе помогнат во поставување посилна рамка за квалитет на здравствената заштита и безбедност на пациентите, ќе ги поддржат идните политики и реформи и ќе го забрзаат напредокот кон поефективен, поотчетен и здравствен систем ориентиран кон потребите на пациентите.

Министерството за здравство, Канцеларијата на СЗО во Македонија и Канцеларијата на СЗО за квалитет на здравствена заштита и безбедност на пациентите во Атина ја потврдуваат својата заедничка посветеност квалитетот и безбедноста на пациентите да станат препознатливи карактеристики на здравствената заштита во државата, со цел секој човек да ја добие безбедната, ефективна и висококвалитетна грижа што ја заслужува.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.