Официјален претставник, кој одбил да биде именуван, рече дека одлуката е донесена по барање од Вашингтон.
Дозволувањето на горивото да влезе, рече претставникот, му дава на Израел дополнителен простор за маневрирање на меѓународната арена за да може да ја продолжи својата кампања за искоренување на Хамас во Газа. Количината на гориво ќе обезбеди „минимална“ поддршка за водоводните, канализационите и санитарните системи во Газа за да се спречат епидемии, рече претставникот, објави Си-Ен-Ен.
Во исто време, лекар од болницата Ал Шифа во Појасот Газа изјави дека храната и водата се при крај и дека залихите што ги обезбедува израелската армија се „многу, многу минимални“. Ахмед Ел Мохалалати телефонски изјавил дека израелските сили продолжуваат да го пребаруваат болничкиот комплекс, но „не нашле ништо“. Тој исто така рече дека ниту едно бебе во болницата не починало откако израелските сили влегле во неа.
Израел вели дека Хамас има команден центар под болницата, што палестинската милитантна група го негира. Како што војната влегува во седмата недела, нема знаци на попуштање и покрај меѓународните повици за прекин на огнот или барем за хуманитарни прекини. Светската програма за храна на Обединетите нации (WFP) претходно објави дека цивилите се соочуваат со „непосредна можност за гладување“ поради недостаток на залихи со храна.
Агенцијата соопшти дека денеска нема да има прекугранична операција за помош, поради недостиг на гориво и прекини во комуникацијата. Втор ден по ред во Газа вчера не пристигнаа камиони со помош, поради недостиг на гориво за дистрибуција на помошта.
Извршниот директор на WFP, Синди Мекејн, рече дека скоро целото население има очајна потреба од помош во храна. „Залихите со храна и вода практично не постојат во Газа и само мал дел од она што е потребно доаѓа преку границите“, рече таа во изјавата. „Со тоа што зимата брзо се приближува, небезбедните и преполни засолништа и недостатокот на чиста вода, цивилите се соочуваат со непосредна можност од глад“, рече Мекејн.
Началникот на Генералштабот на израелската армија рече дека Израел е блиску до уништување на воениот естаблишмент на Хамас во северниот дел на Појасот Газа и дека армијата ќе ја прошири својата кампања во другите делови на крајбрежната енклава од 2,3 милиони луѓе.