Свет

Пињо: Фон дер Лајен ќе се сретне со Де Вевер, можно е да разговараат за заемот за репарации за Украина

На прашање дали средбата ќе стане збор за противењето на Белгија на користењето на замрзнатите руски средства за т.н. заем за репарации за Украина, Пињо изјави дека нема детали за конкретните теми за кои ќе разговараат Фон дер Лајен и Де Вевер.

Претседателката на Европската комисија, Урсула фон дер Лајен во рамки на редовните консултативни состаноци со европските лидери, попладнево ќе се сретне со белгискиот премиер Барт де Вевер и на средбата ќе бидат опфатени неколку теми, најави главната портпаролка на ЕК, Паула Пињо.

На прашање дали средбата ќе стане збор за противењето на Белгија на користењето на замрзнатите руски средства за т.н. заем за репарации за Украина, Пињо изјави дека нема детали за конкретните теми за кои ќе разговараат Фон дер Лајен и Де Вевер.

- Веќе подолго време кажуваме дека се водат дискусии на сите нивоа со белгиските власти за заемот на репарации, па затоа не е изненадување ако за таа тема се дискутира и на денешниот состанокот меѓу премиерот и претседателката Фон дер Лајен, рече Пињо на денешниот брифинг во ЕК.

На забелешката дека „изгледа смешно тоа што се преправа“ дека состанокот не е стриктно за користењето на замрзнатите руски средства за исплата на финансиска поддршка на Украина на што се противи Белгија, Пињо изјави дела „апсолутно не се преправа“.

- Она што го кажав е дека на оваа средба треба да се гледа како на дел од редовните состаноци што ги имаат претседателката и премиерот. Од самиот почеток е многу јасно дека ќе направиме се што можеме за да ги разјасниме прашањата што би можеле да дојдат од страна на белгиските власти за заемот за репарации, а затоа се и контакти на сите нивоа, додаде Пињо.

Според неа, овие разговори се во рамки на тековните дискусии околу заемот, што се започнати уште пред октомврискиот Самит на ЕУ и сега продолжуваат во пресрет на следната средба на европските лидери во декември.

Планот за користење на замрзнатите руски средства за финансиска поддршка на Украина, ЕК го предложи на Самитот на ЕУ во октомври, но европските лидери не постигнаа консензус за одобрување на предлогот поради противењето на Белгија.

Најголемиот дел од овие руски суверени средства или околу 175 милијарди евра се депонирани во клириншката куќа „Еуроклир“ со седиште во Брисел, додека уште околу 25 милијарди се чуваат во други земји членки, пред се Германија, Франција и Луксембург.

Белгиската Влада стравува дека користењето на овие средства би можело да го нарушил угледот на Белгија како сигурен депозитар и да резултира со повлекување на депонираните странски средства во земјата, па затоа бара гаранции од земјите членки за споделување на заедничка финансиска и правна одговорност за ваквата постапка.

Тагови: Урсула фон дер Лајен Пињо

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

ОЈО ГОК во тек е акција под кодно име „Филтер 2“

Основното јавно обвинителство за гонење организиран криминал и корупција потврдува дека во тек е координирана акција под кодно име „Филтер 2“,.

Основното јавно обвинителство за гонење организиран криминал и корупција потврдува дека во тек е координирана акција под кодно име „Филтер 2“, која под раководство на јавен обвинител од Специјализираното одделение за гонење кривични дела сторени од лица со полициски овластувања и припадници на затворската полиција ја спроведуваат Царинската управа. и Одделот за сузбивање на организиран и сериозен криминал при МВР-БЈБ.

Акцијата е резултат на криминалистичка истрага поради постоење основано сомнение за сторени повеќе кривични дела, меѓу кои Криумчарење и Царинска измама при што е предизвикана штета на државниот буџет од големи размери.

По завршување на активностите, јавноста ќе биде дополнително информирана, стои во соопштението од Обвинителството.

Тагови: Обвинителството

НБА

Нова „голема тројка“ на ЛА Лејкерс: Дончиќ, „Коби од село“ и џин подготвен да помине низ ѕид

НБА гигантот Лос Анџелес Лејкерс влегув во нова ера по заминувањето на Леброн Џејмс.

Во обидот да ја освојат 18-тата титула во лигата, клубот се потпира на ново трио предводено од Лука Дончиќ. Покрај докажаната словенечка суперѕвезда, се очекува Остин Ривс да го подигне своето ниво на игра до „Ол-стар“ стандарди, додека центарот Вокер Кеслер треба да се докаже како елитен одбранбен играч.

Клучниот дел од новиот тим е 25-годишниот Вокер Кеслер, висок 218 см, кој минатата сезона одигра само пет натпревари поради сериозна повреда и операција на левото рамо. Лејкерси го добија во размена со Јута Џез, отстапувајќи два незаштитени избори од првата рунда на драфтот и правата на два избори за размена.

Поради овој потег, клубот нема да може да разменува избори од првата рунда во следните седум години. „Секој голем тим на Лејкерс низ историјата имал доминантен центар.

Вокер Кеслер се докажа како еден од елитните високи играчи кои можат да играат на врвно ниво во двата правци. Кога се појави можноста да го споиме таков чувар на обрачот со нашите ѕвезди Лука Дончиќ и Остин Ривс во играта ’пик-енд-рол‘, не сакавме да ја пропуштиме таа шанса“, изјави Роб Пелинка, претседател за кошаркарски операции и генерален менаџер на Лејкерс.

Во сезоната 2024/25, Кеслер беше стартер на сите 58 натпревари за „Џез“, со просек од 11,1 поен, 12,2 скока и 2,4 блокади. Таа сезона, тој беше најдобар во НБА-лигата според офанзивни скокови (4,6), втор според блокади и петти според вкупен број скокови. За четирите години во Јута, одигра 201 натпревар со просек од 9,5 поени, 9,3 скока и 2,4 блокади.

Од неговото влегување во лигата, само Виктор Вембањама има подобар просек на блокади.

Дончиќ и Ривс како основа на нападот Раководството на клубот е исто така оптимистично во однос на соработката што Лука Дончиќ (33,5 поени, 7,7 скока и 8,3 асистенции минатата сезона) и Остин Ривс (23,3 поени, 4,7 скока и 5,5 асистенции минатата сезона) ја покажаа на натпреварите што Леброн Џејмс ги пропушти поради ишијас.

Ривс, познат и по прекарот „Хилбили Коби“, летово потпиша четиригодишен договор вреден 180 милиони долари – највисокиот износ во историјата за играч кој не бил избран на драфтот. Вокер Кеслер потпиша четиригодишен договор вреден 130 милиони долари. „Посебно чувство е кога некоја организација верува во тебе. Лејкерси го покажаа тоа и преку парите и преку изборите на драфтот што ги вложија во мене.

Сознанието дека имаат таква доверба во мене ме прави подготвен да ’пробијам ѕид‘ за нив. Едноставно, таков сум отсекогаш“, изјави Кеслер. Лука Дончиќ го продолжи договорот со клубот уште во август 2025 година, на три години и за сума од 165 милиони долари.

Тагови: ЛА Лејкерс Лука Дончиќ

Култура

„Болва в уво“ на Драмски театар Скопје на фестивалот „Денови на комедија“ во Куманово

Драмски театар Скопје на 25 септември, со почеток во 20:00 часот, ќе гостува на 29. Меѓународен театарски фестивал „Денови на комедија“ во Куманово со претставата „Болва в уво“ од Жорж Фејдо, во режија и адаптација на Синиша Евтимов.

Претставата ќе биде изведена на големата сцена на Центарот за култура „Трајко Прокопиев“.

Фестивалот годинава се одржува од 23 септември до 5 октомври и во програмата носи 11 претстави од театри од Македонија, Србија, Босна и Херцеговина и од Бугарија. Десет претстави се дел од натпреварувачката програма, во чии рамки ќе бидат доделени награди за најдобра претстава, режија, актер, актерка, сценографија, костимографија и најмлад актер.

„Болва в уво“, една од најпознатите фарси на францускиот драмски автор Жорж Фејдо, во постановката на Драмски театар е динамична театарска машина во која еден мал сомнеж е доволен да предизвика лавина од недоразбирања. Љубовната несигурност го придвижува светот на погрешни врати и соби, заменети идентитети, неочекувани средби и луѓе кои постојано се наоѓаат на погрешното место во погрешно време. Секој обид да се воспостави ред создава уште поголем хаос, а забрзаното темпо на сценската игра ја води фарсата кон нејзините крајни комични последици.

Во режисерското читање на Синиша Евтимов, зад механизмот на фарсата стои свет во кој сите зборуваат, но никој вистински не слуша. Ликовите комуницираат преку сомнежи, претпоставки, полуинформации и недоизговорени реченици, додека љубомората, стравот и лагата стануваат движечка сила на нивното однесување. Дијалогот постои, но често само како маска за низа паралелни монолози, а малите приватни „војни“ се раѓаат во главите на ликовите уште пред да постои вистинска причина за нив.

Оттаму, креветот што се врти, вратите што се отвораат и се затвораат и телата што непрестајно се разминуваат и се судираат не се само препознатливи механизми на класичната фарса туку и сценска топографија на недоразбирањето. Во навидум елегантниот свет на La Belle Époque, под површината на рационалноста и општествените правила, се откриваат ниските страсти, паранојата и човековата опседнатост со туѓите постапки. Претставата ја задржува експлозивната комика на Фејдо, но истовремено го отвора прашањето колку од тој свет на неслушање, сомнежи и однапред создадени вистини препознаваме и денес.

Во претставата настапуваат: Дениз Абдула во улогите на Виктор и на Поше, Ања Митиќ како Рената, Марјан Наумов како Миле, Лазар Христов како Ристе, Игор Стојчевски како д-р Филев, Стефан Вујисиќ како Дони Карлос Хоменидес, Нина Елзесер како Луси, Владимир Петровиќ како Бегби, Рубенс Муратовски како Филип, Катерина Шехтанска-Лаковски како Оли, Томислав Давидовски како Ангел, Јована Спасиќ како Анета, Петар Стојковиќ како Бате и Ивана Павлаковиќ како Евгенија.

Режијата и адаптацијата се на Синиша Евтимов, сценографијата е на Мартин Манев, а костимографијата на Раде Василев. Инспициент е Жарко Намичев, а суфлер Милка Анчевска.

„Болва в уво“ премиерно беше изведена на 17 декември 2025 година на големата сцена на Драмски театар. Претставата трае 125 минути без пауза. Публиката повторно ќе може да ја погледне на репертоарот на Драмски театар Скопје на 10 октомври, со почеток во 20:00 часот, а билети може да се купат на билетарницата на театарот и на веб-страницата dramski.mk.