Таков поголем турнир деновиве се одржа во Дизелдорф, Германија.
Луѓе од различни возрасти од 15 земји се собраа во градот за да играат против заедничкиот непријател - Паркинсоновата болест. Настанот годинава е организиран од германското здружение „Пинг-понг Паркинсон“, а на него учествуваа 200 лица заболени со Паркинсонова болест.
- Целта не е да играме еден против друг, туку да се обидеме заедно да го одржуваме топчето во игра. Тие тренинзи не само што се добри за кондиција, туку се и основа за самопомош и разговор. Сепак, недостигаат поддршка и финансии, објаснува Тортен Бомхујз, основач на здружението.
Според Георг Еберзбах, главен лекар во Центарот за Паркинсон Белиц-Хајлштетен во Бранденбург, многу симптоми - како што се тресење на мускулите, вкочанетост или пречки во движењето - може донекаде добро да се третираат со лекови, но засега не е можно целосно да се излечи болеста. Затоа, важно е да се забави нејзината прогресија. Токму тука може да помогне играњето пинг-понг. Сепак, досега за тоа се направени малку научни истражувања.
Според Еберзбах, пинг-понгот, слично како танцувањето и боксот, бара движења што веќе, условно, не се можни за луѓето со Паркинсонова болест во секојдневниот живот.
Покрај тоа, тука се и тренинзите за издржливост, концентрацијата, брзината на реакцијата и искуството на заедништвото при играње во тим. Тоа исто така ги потиснува симптомите на болеста, според Тимо Клајн-Сетбер, раководител на истражувањето за пинг-понг на Спортскиот универзитет во Келн.
- Нашето истражување покажа дека многу играчи сметаат дека концентрацијата и фините моторички вештини на масата им помагаат. Можете на дело да видите дека играчите помалку треперат за време на натпреварите и дека нивните моторни вештини се потечни, објаснува Клајн-Сетбер.
Тој додава и дека многу пациенти со Паркинсонова болест велат дека им треба помалку лекови доколку редовно играат пинг-понг. Во ова е убедена и Хајке Шофен, инаку учесничка на турнирот. Таа вели дека пинг-понгот не само што ѝ ги ублажува симптомите, туку и спречува да биде осамена.
Здружението „Пинг-понг Паркинсон“ е основано 2020 година, денес има над 1.100 членови и тој број е во постојан раст.