Станува збор за електрична верзија, која се нуди во двете верзии на каросеријата. Воедно, e-308 SW е првиот електричен караван на европски производител, истакнуваат од таборот на францускиот бренд, заборавајќи на Taycan Cross Turismo. Иако има номинално малку помала батерија, Peugeot гарантира повеќе од пристоен дострел. Батеријата со употреблив капацитет од 51 kWh е направена од 80% никел, 10% манган и 10% кобалт, а работи на 400V. Од Peugeot велат дека без разлика на изборот на каросеријата, досегот ќе биде повеќе од 400 km.
Иако визуелно не се значително различни од моделите со термички погон, автомобилите имаат подобрена аеродинамика. Предниот дел е оптимизиран, 18-инчните бандажи добија нов дизајн, а на нив се монтирани гуми со намален коефициент на триење. Во крајна линија,се зборува за просечна потрошувачка од 12,7 kWh/100 km.
Кога станува збор за полнење, автомобилите имаат вграден полнач од 11 kW, а компатибилни се и со полначи до 100 kW. Последново значи дека полнењето од 20 до 80% ќе трае помалку од 25 минути.
Да кажеме и дека погонскиот електромотор произведува 156 КС и 260 Nm, а перформансите се уште не се познати. Познато е само дека возачот ќе може да избира помеѓу неколку режими на работа, имено Eco, Normal, Sport и Brake, каде што вториот го подобрува влијанието на регенеративното сопирање.
Цената се уште не е објавена, но Peugeot го нагласува почетокот на продажбата од средината на следната година.