Средбата, како што информира Народна банка, претставуваше можност за размена на мислења за економската состојба и потенцијалот за зајакнување на соработката меѓу двете институции заради поддршка на одржливиот развој.

Славески и Туркменоглу разговарале пред се за значењето на макроекономската стабилност како предуслов за побрза економска конвергенција кон Европската Унија. Гувернерот Славески ја нагласил заложбата на Народната банка за водење предвидлива и одговорна монетарна политика, што придонесува кон ценовна и финансиска стабилност, создавајќи сигурна основа за економски раст и структурни реформи.

- Цврстата макроекономска основа, којашто ја одржуваме преку стабилноста на девизниот курс, контролата на инфлацијата и преку стабилниот банкарски сектор е важен двигател на довербата кај инвеститорите и поддршка за домашната економија, истакнал гувернерот Славески.

Во контекст на најновиот извештај на ЕБОР, соговорниците се осврнале и на предизвиците поврзани со ниската продуктивност, потребата од унапредување на деловното окружување и поттикнување на дигитализацијата и иновациите. На средбата било истакнато дека зајакнувањето на конкурентноста, отпорноста и на владеењето на правото е суштествено за одржливоста на пазарната економија.

Гувернерот посочил дека пристапот до финансирање и солидната кредитна поддршка на компаниите, овозможени и преку мерките на Народната банка, се важен столб за поттикнување на продуктивноста и за вклучување на економијата во светската производствена мрежа.

Двајцата соговорници ја нагласиле важноста од натамошното унапредување на соработката меѓу Народната банка и ЕБОР, особено во областите поврзани со дигитализацијата, одржливото финансирање и зајакнувањето на отпорноста на финансискиот систем.

По три години на врвот на годишната листа на „Економист интелиџенс јунит“ (Economist Intelligence Unit - 'ЕИУ'), главниот град на Австрија е детронизиран од „прекрасниот, преубав Копенхаген“, како што се наведува. Данската престолнина го зазеде првото место на топ-листата најпогодни градови за живот, на светско ниво за 2025 година, објавена вчера.

На списокот на сестринската организација на „Економист" се рангирани 173 градови од цел свет - врз основа на низа фактори, вклучувајќи здравје, образование, стабилност, инфраструктура и животна средина. Копенхаген ги победи Виена и швајцарскиот град Цирих, коишто се израмнија на второто место. Австралиски Мелбурн се задржа на четвртото место, а Женева (Швајцарија) е петта. Сиднеј (Австралија) се искачи на топ-10 листата - од седмото на шестото место, додека јапонската метропола Осака и Оукленд (Нов Зеланд) се изедначија на седмото и осмото место.

На деветтото место е Аделаида - третиот австралиски град на оваа топ-листа. Ванкувер (Канада) го зазеде 10-то место.

Зошто Виена годинава не е на прво место?

Иако австрискиот град сѐ уште има добри резултати во повеќето категории, параметарот во стабилноста опадна. Копенхаген, од друга страна, постигна високи резултати во сите критериуми. Остриот пад на оценките за австриската престолнина им се припишува на неодамнешните инциденти, вклучително и заканата со бомба на концертот на Тејлор Свифт минатото лето, што доведе до откажување на настанот.

- Глобалниот квалитет на живот остана непроменет во изминатава година, а како и во 2024., оценките за стабилност се намалени на глобално ниво. При притисокот врз стабилноста Виена ја загуби позицијата на најдобар град за живеење по три години, рече заменик-директорот на „ЕИУ“, Барсали Батачарја.

Виена не е единствениот град што забележа пад. Калгари падна од петтото место во 2024 година, на 18-то - откако доби пониска оценка за здравствената заштита, заедно со три други канадски градови, поради оптоварувањето на здравствениот систем на земјата. Торонто, исто така, падна од 12-то на 16-то место. И британските градови Лондон, Манчестер и Единбург бележат пад - Лондон од 45. на 54., Манчестер од 43. на 52., а Единбург од 59. на 64. место.

Хонолулу, Хаваи, САД - беше највисоко рангиран американски град на листата - се најде на место бр. 23.

Дамаск, Сирија, и натаму е на дното на листата - како најмалку погоден за живот во светот. Веднаш над него е рангиран либиски Триполи, главниот град на Бангладеш, Дака, пакистански Карачи и градот Алжир.

-Ние сме новата надеж. Ние сме промената која не се плаши да се соочи со предизвиците, да ги поправи грешките и да постави правичен ред и правда. Владата којашто ја предводи ВМРО-ДПМНЕ ја презеде одговорноста во време кога економијата беше во криза, кога граѓаните беа загрижени и разочарани. Но денес, со гордост можеме да кажеме дека нашата држава е една од најбрзорастечките економии во Европа со четвртиот највисок економски раст на бруто домашниот производ, кажа Премиерот Христијан Мицкоски на вчерашниот настан по повод 35 годишнината на ВМРО-ДПМНЕ.

Мицкоски во текот на своето обраќање посочи дека владата предводена од ВМРО-ДПМНЕ работи на санирање на штетите од минатото, на создавање стабилна и предвидлива економија, на отворање на нови работни места, подобрување на услови за сите работници, посебно младите, земјоделците и пензионерите.

-Сепак, ние не треба да се фалиме со бројките. Знаеме дека овој раст не е доволен, дека народот сè уште не го чувствува подобрувањето во својот секојдневен живот. Затоа упорно работиме на санирање на штетите од минатото, на создавање стабилна и предвидлива економија, на отворање на нови работни места, подобрување на услови за сите работници, посебно младите, земјоделците и пензионерите, кажа тој.

Премиерот се осврна и на надворешната политика при што укажа дека надворешна политика е принципиелна и се темели на заштита на заедничка историја, култура и идентитет.

-Македонија нема повеќе да биде земја на понижување и предавство. Нашата надворешна политика е достоинствена, принципиелна и се темели на заштита на нашата заедничка историја, култура и идентитет. Не можеме да дозволиме да не кодошат во странство оние кои треба да бидат чувари на националните интереси. И да не мислат дека ветувањата за отстапки, деградации и понижувања ќе ги донесат повторно во Владата. Народот е свесен и нема да дозволи повторно да биде измамен. Она што Венко Филипче го направи во Атина само не потсети дека кодошењето на сопствената земја не е туѓо и не смее да се заборави, за да не се повтори, вели тој.

На крај Премиерот Мицкоски порача:

-Ние не сме тука за да изградиме праведно општество, во кое нема да има непривилегирани, туку напротив ние сме тука за да изградиме општество во кое ќе нема привелигирани. Тука сме за да изградиме правда за сите. И за тоа ќе бидеме безмилосни кон секој кој ќе ја злоупотреби довербата на народот.

Мицкоски: Највредната работа што може еден човек да ја остави на своите потомци не се парите, туку честа и чистиот образ

На вечерашниот настан по повод 35 годишнината на ВМРО-ДПМНЕ се обрати премиерот Христијан Мицкоски кој се обрати до функционерите од гарнитурата на ВМРО-ДПМНЕ и посочи да не заборават од каде потекнуваат, и каде ќе се вратат.

„И немојте никогаш да заборавите од каде потекнуваме, од каде доаѓаме и каде ќе се вратиме по сето ова. Најскапата работа што еден човек може да ја остави на своите потомци, не се парите, не е имотот, туку честа и чистиот образ. Како што мудро знаат нашите да кажат, не смеат функционерите да заборават дека: макадамот по селата и улиците е повистински, и поавтентичен и помек од килимот по хотелите и канцелариите, заради реалноста која ја има во себе и чекорот на своите сограѓани кои чекорат по него, а фотелјата е секогаш понеудобна од гајбата пред кооперација, заради тоа што таму извира твојата моќ и твојата цел. Токму затоа, сите функционери во нашата партија мора да бидат свесни дека ова што го работиме не е лична игра, туку служба. Клупата во вашите маала е таму кај што мора да знаете дека еден ден пак ќе се вратите и ќе мора луѓето таму да ги погледате во очи и со гордо крената глава да им кажете, јас го направив тоа за вас, јас се борев за вас, и да не се срамите и да се криете од нивните прекорни погледи“, истакна Мицкоски.

Премиерот исто така истакна дека несовесното седење во фотелјата носи срами и разочарување, а достојното пријатели и вистински поддржувачи.

„Несовесното седење во фотелјата носи срам и разочарување. Достојното и пријателско седење на столчето или гајбата пред кооперацијата, на клупата во маалото, носи пријатели, поддржувачи и вистинска сила за идејата. Таму лежи основата на вистинската политичка иднина на честа и на нашиот образ. Во овие мигови на промени, апелирам до сите наши функционери и членови: не заборавајте кој сте, од каде дојдовте, и кому му служите. Никој не смее да дозволи бахатост, агонија од моќ и корист да го заматат погледот. Да демонстрираме волја и докажеме пред народот дека ВМРО-ДПМНЕ е вистинскиот избор, дека не сме исти како оние кои владееја со земјата во минатото“, рече Мицкоски.

Центар за комуникации на ВМРО-ДПМНЕ