И покрај тоа што за првпат во Собранието беше изгласана интерпелација со мнозинство од 61 глас, се отворија нови дилеми и различна интерпретација на донесениот заклучок.
Откако од Кабинетот на спикерот Гаши испратија појаснување дека гласањето за интерпелацијата е израз на пратениците, нема правно обврзувачки последици за разрешување и нема правно дејство, од Движењето ЗНАМ реагираа дека за нив е нејасно на што се темели овој став. Оценуваат дека исходот од гласањето е многу јасен и очекуваат уште во понеделник да се предложи друг опозициски пратеник на местото на Даути.
-Собранието утврди одговорност кај госпоѓа Даути, таа несомнено го прекршила Деловникот, а санкцијата за прекршувањето на Деловникот е разрешување за оној што го направил тој прекршок. За Движењето ЗНАМ, со усвојувањето на интерпелацијата, Илире Даути е разрешена и таа повеќе не може да ја извршува претседателската функција во работното тело на Собранието. – пишува во нинвното соопштение.
За интерпелацијата за Даути која ја поднесе Левица поддршка дадоа ВМРО-ДПМНЕ и ЗНАМ, додека пак Вреди и Европскиот фронт беа против. СДСМ ја напуштија седницата иако законот за бранителите кој го блокираше Даути, што доведе до нејзина интерпелација е нивни предлог. Според собранискиот деловник, „ако Собранието ја прифати интерпелацијата, донесува заклучок во кој се изнесува ставот во врска со наводите на интерпелацијата“.
-На Собранието му предлагам да го изгласа овој заклучок: Собранието на Р. Македонија констатира дека наводите во интерпелацијата за работата на претседателката на Комисијата за социјална политика, демографија и млади се основани. Овој заклучок се става на гласање, ве повикувам да гласаме.- Африм Гаши – претседател на Собрание
Каков епилог ќе добие интерпелацијата и дали постои друг механизам за разрешување на Даути од Комисијата за социјална политика, според информациите на Канал 5 ќе се дебатира на понеделничката координација кај Гаши.
Инаку, пратеничката од партијата на Зијадин Села кој е дел од Европскиот фронт, со месеци одбива да го стави на дневен ред Законот за посебни права на припадниците на безбедносните сили, со образложение дека и борците од ОНА треба да ги добијат истите права како бранителите од 2001вата.