Субвенции и финансиска помош за највозрасните граѓани, како и подобрено домување и можности за активен живот, најави кандидатот на ВМРО-ДПМНЕ, Орце Ѓорѓиевски. Фокус вели ќе бидат и лицата со попреченост на кои ќе се стори се да им се овозможи соодветен живот во Скопје, од финансиски до инфраструктурен.

-Со проектот 2500 денари за пензионерите со најниски примања ќе обезбедиме финансиска поддршка за оние кои живеат со најмалку средства. Оваа мерка која веќе ја воведов во К. Вода, ќе ја прошириме во целиот град како јасна порака дека Скопје не ги заборава своите највозрасни граѓани. Позитивните практики од мерките во К. Вода, како што се итно копче, транспорт на стари лица како и нега на возрасни лица во нивниот дом ќе бидат применети и во ниво на целиот град,- Орце Ѓорѓиевски – Кандидат за градоначалник на Скопје – ВМРО-ДПМНЕ.

Скопје изгледа запуштено, нечисто и хаотично, вели кандидатката на СДСМ – Каја Шукова, според која претпријатијата се заробени од партиски интереси, долгови и неспособни кадри. Приоритет вели дека ќе и биде реформа на јавните претпријатија.

-ЈСП се модернизира со нови еко автобуси, електронски систем за наплата и брз автобуски транзит, за да се воспостави јавен превоз што функционира. Комунална хигиена се ревитализира со современ центар за селекција и рециклажа, редовоно собирање отпад и конечно решавање на вардариште. Во паркови и зеленило се отвора нова ера, 10.000 дрва и 15 нови паркови за 15 месеци,- Каја Шукова – Кандидат за градоначалник на Скопје – СДСМ.

На местото на децениски запуштената касарна во Бардовци, кандидатот на „Искуство за Успех“- Александар Трајановски најавува голем ЕКСПО центар кој вели дека би го издигнал Скопје на регионалната и европска бизнис мапа.

-Ја предлагаме за новиот скопски ЕКСПО центар или новото скопско сајмиште, каде што според неговата стратешка положба која во нејзина близина се наоѓа скопска обиколница е лесна за пристап на сите капацитети кои би доаѓале овде да ги изложуват на настаните своите производи и продукти, како и индустриската зона визбегово, така што ова би добило една целина,- Александар Трајановски – Кандидат за градоначалник на Скопје – „Искуство за Успех“.

Наместо да се рушат старите индустриски капацитети и нивно место да се градат колосални згради, да ги зачуваме и обновиме за развивање на алтернативната културна сцена и креативната индустрија, посочи независниот кандидат – професорот Горан Марковски од пред магацините на некогашна „Славија“ во Кисела Вода.

-Да го сочуваме и искористиме како градителско наследство кое може да добие поинаква функција. Наместо да ги уриваме и преку нив да градиме колосални станбени објекти, да ги пренамениме во простор за алтернативна културна сцена, креативна индустрија и функции наменети за младите, а на тој начин ќе зачуваме и што повеќе зелени површини за градот,- Горан Марковски Кандидат за градоначалник на Скопје – „Независни заедно“.

Инаку, остануваат само уште 4 дена од кампањата по што граѓаните во изборниот молк ќе треба да одлучат дали и на кому в недела ќе го дадат гласот на локалните избори..

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.