Вака од СДСМ го оценија проширувањето на истрагата за трагедијата во Кочани, која викендов доведе до нови приведувања и осомничени. Од СДСМ прашуваат зошто никој од актуелните полициски раководители не е предмет на истрага и зошто се гонат функционери кои тогаш воопшто не биле надлежни. Оттаму посочуваат дека дозволата за пиротехника, што е директна причина за пожарот, е под МВР и сметаат дека пропустите и превенцијата се целосно кај министерството и актуелното раководство од кое, како што велат, нема ниту еден осомничен.
-Вечерта на трагедијата, постоеле дежурни началници во ОВР Кочани, СВР Штип и БЈБ. Тие имале директна надлежност. Имало полицајци на лице место – виделе сè: малолетници, пиротехника, хаос и премолчеле, не презеле ништо иако знаеле и за настанот и за тоа што се случувало таму. Трагедија е што денес никој од нив не е ни осомничен за настанот. Ова е селективна правда на ВМРО-ДПМНЕ во која Тошковски ги штити своите и оние кои тој ги поставил на функциите, се вели во писмената реакција од СДСМ.
Министерот за внатрешни работи Панче Тошковски смета дека МВР не е амнестирано од одговорност за трагедијата во Кочани и затоа, според него, во моментов е поднесена кривична пријава за 7 полициски службеници, а можно е листата да се прошири со секој еден за кој ќе се најде одговорност за трагедијата, вклучително и за актуелните функционери.
- Амнезија имаше во минатото, кога за несреќи каде што загинаа 75 луѓе, МВР не поднесе ниту една кривична пријава против ниту едно осомничено лице. Амнестија тогаш имаше. Сега амнестија не можам да се согласам дека има. Зошто? –МВР има во континуитет поднесено 3 ако не и 4 кривични пријави и се постапува моментално по над 50 осомничени. Досега се поднесени, односно е поднесена кривична пријава против 7 полициски службеници. До сега, заклучно до вчера. Можеби во текот на наредниот период ќе имаме и други полициски службеници којшто ќе бидат предмет на отпочнување на истрага, изјави Тошковски.
Левица, пак, утрово поднесе интерпелација за министерот Тошковски, за, како што велат, грубо занемарување и несоодветно вршење на функцијата. Од партијата укажуваат на сериозни институционални пропусти, селективна правда и прикривање на лица кои требало да дејствуваат. Реакција за проширената истрага за Кочани стигна и од ДУИ од каде обвинија дека истрагата за трагедијата е селективна, еднострана и таргетирана кон албанскиот народ.
-Во однос на оние обвинувања којшто СДСМ, ДУИ и сега додадени на нив и Левица ги шират во јавноста и манипулациите кои се обидуваат да ги продадат на македонскиот народ, добро е оние којшто 20 години ја уништуваа својата држава на нив ќе се дозалепат овие којшто клинец немаат заковано во животот, добро е македонските граѓани да ги видат од една страна, тогаш знаете дека кога сте од другата страна сте на правилната страна, изјави Тошковски.
Државниот јавен обвинител Коцевски вчера ги отфрли партиските прозивки за селективна правда. И тој како и Тошковски уверува дека истрагата се води неселективно и темелно и дека ќе одговара секој еден за кој ќе се утврди било каква поврзаност и непостапување за несреќата во Кочани.