Коалицијата предводена од српскиот претседател Александар Вучиќ и Српската напредна партија извојуваа убедлива победа на парламентарните, белградски и покраински избори, освојувајќи речиси 47% од вкупниот број на гласови, или повеќе од двојно во однос на второпласираниот опзоициски блок „Србија против насилство“.

Според првичните резултати, СНС би имале апсолутно мнозинство во 250 членото Народно Собрание, што би им овозомжило и самите да формираат влада. Сепак, иако победија и во Белград, разликата меѓу власта и опозиција е релативно мала, па клучни за управувањето на главниот град се чини дека ќе бидат помалите партии кои влегоа во градското собрание. Победата Вучиќ ја оцени за историска, и порача дека до 2027 година, во Србија нема да има нови избори.

-Листата „Србија не смее да застане“ ќе има секако повеќе од 127 мандати, дали ќе бидат 128, 129 или 130. Тоа што е резултат на овие избори е дека една листа „Србија не смее да застане“ ќе има апсолутно мнозинство во Народното собрание на Република Србија. Можно е тоа место да постои, но уште не сме го виделе, да имаме листата „Србија не смее да застане“ да добие помал број на гласови од претходните избори. Значи на сите избирачки места, во просек 10 проценти раст, и затоа гледате наместо 42 ќе биде над 46 проценти. Тоа е тоа, 10 проценти раст во однос на тоа што го имавме пред една година. -- Александр Вучиќ – Претседател на Србија.

Опозицијата и овој пат обвинува за изборни нерегуларности, а особено за изборен инжениринг со кој е извршена кражба на околу 40.000 одлучувачки гласови во Белград, со организирано носење луѓе пред се од Република Српска.. Резултатите според нив се неприфатливи, а најавија и протести за вечерва.

-Ние денеска присуствувавме на невидено изборно насилство во текот на целиот изборен ден. Денеска видовме нешто што до сега не беше пракса, особено на ниво на градот Белград. Кога овде со автобуси, со комбиња и автомобили беа носени луѓе кои не живеат во Белград, многу од нив прв пат беа во Белград, за да гласаат како да се белграѓани. Едноставно ова што се случи денеска низ Србија не може да биде нешто што можеме да го прифатиме како резултати од демократски и фер избори,- - Мирослав Алексиќ – „Србија против насилство“.

Вистинско изненадување на изборите кај нашиот северн сосед беше влезот на Бранимир Несторовиќ, српскиот доктор кој на јавноста и стана познат по ставовите за Ковид – 19 и теориите на заговор за вирусот. Несторовиќ ќе има десетина пратеници во српското собрание, а советниците кои ги освои во Белград ќе бидат клучни за идното раководење со градот. Сепак, тој вели дека нема да коалицира со никого.

-Мислам дека коалиција би била смртоносна за нас, би не убила уште на самиот почеток, пред да почнеме. Затоа што би било дека еве се испазарија, добро поминаа и одма се продадоа.- - Бранимир Несторовиќ - Ми—Глас из народа.

За разлика од Несторовиќ, лидерот на српските социјалисти и поранешен премиер Ивица Дачиќ заблежа драстичен пад на поддршката, најавувајќи и можна оставка...

-Ние не сме задоволни од резултатот, вклучувајќи ме и мене како лидер на оваа коалиција. Се разбира, ќе разговарам со моите колеги од Социјалистичката партија на Србија за тоа што е најдобро за партијата во наредниот период. Мое лично мислење е дека е неопходно да се најде нов лидер на Социјалистичката партија на Србија, - Ивица Дачиќ – Социјалистичка партија на Србија.

Според резултатите, во српското собрание ќе влезат 5 политички партии, како и 5 партии на претставници на малцинствата во Србија. Изборниот праг пак, не го поминаа радикалните десничаки Двери и Заветници, како и радикалната партија на Војислав Шешељ. Ништо подобро не помина ниту партијата на поранешниот претседал Борис Тадиќ... Ова беа втори избори за две години во Србија.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.