Првите двајца заразени се кинеска двојка која пристигнала во Франција со авион на 18 јануари, но во тоа време немале симптоми на болеста. Станува збор за 31-годишен маж и неговата една година помлада сопруга. Првите симптоми на болеста ги забележале по пристигнувањето во Франција.
Француските медиуми објавија изјава на Јаздан Јазданпанах, началник на инфективниот оддел во болницата во Париз каде што тие се лекуваат, кој рече дека еден од првите симптоми е забележан при пристигнувањето, додека другите ги добиле дури пет дена подоцна, на 23 јануари.
Јазданпанах им рече на новинарите дека нема потреба од паника и дека ризикот од ширење на епидемијата во Франција е многу мал. „Начинот на кој беа третирани првите случаи, покажува дека нашиот здравствен систем е стабилен, функционален и подготвен да одговори на квалитетен и брз начин. Нашата просторија за карантин е ефикасна “, рече првиот човек на Службата за итни случаи во Париз.
Третиот пациент е 48-годишен Кинез кој работел во винската индустрија. Тој пристигна со авион од Вухан во Холандија, од каде се упатил кон Бордо. Тој влегол во Франција на 22-ри јануари. Побарал лекарска помош еден ден подоцна, а два дена подоцна било потврдено дека има коронавирус.
„Тој сега е добро. На 23 јануари беше хоспитализиран со симптоми на грип, имаше треска и кашлање. Веднаш беше ставен во изолација“, соопшти Министерството за здравство.
Градоначалникот на Бордо изјави дека пациентот бил во контакт со 10 до 15 лица откако се вратил од Кина и дека сега тие биле под контрола на надлежните служби.
Овие случаи го поставуваат прашањето дали скринингот на патниците на многу аеродроми е воопшто доволен, бидејќи е јасно дека кај сите тројца заразени симптомите се развиле по пристигнувањето во земјата.
Ројтерс пишува дека во некои париски аптеки се распродадени хируршките маски за лице.
„Луѓето станаа хистерични. Сите од утрово купуваат хируршки маски“, изјави еден фармацевт за Ројтерс.