Имено, се чини дека со промена на начинот на живот преку подобра исхрана, добар сон и редовно вежбање, во комбинација со вежби за релаксација, буквално можеме да се подмладиме. Се разбира, не календарски, туку биолошки. Шест жени на возраст помеѓу 46 и 65 години учествувале во 8-неделна интервентна програма која вклучувала промени во исхраната, спиењето и физичката активност. Добиле и инструкции како да изведуваат вежби за релаксација, како и кои суплементи треба да ги земаат.

Според наодите објавени во научното списание „Аging“, по завршувањето на оваа 8-неделна интензивна програма, кај дури 5 од 6 учесници, тестовите на крвта покажале намалување на параметрите на биолошката возраст од 3 на дури 11 години, или во просек од 4,6 години. Сите учесници освен еден, пред да започне истражувањето биле биолошки помлади од нивната хронолошка возраст (број на години). Ова е важно, бидејќи ја намалува веројатноста дека до намалување на биолошката возраст дошло со подобрување на состојбата на некоја хронична болест во текот на програмата. Со други зборови, според авторите од три американски универзитети, намалувањето на биолошката старост може да се припише исклучиво на постигнатото влијание врз механизмите на стареење.

Која е разликата помеѓу биолошката и хронолошката возраст?

Едноставно кажано - нашата хронолошка возраст се одредува според календарот и бројот на родендени што сме ги поминале. Биолошката возраст е многу пофлексибилна категорија и ни кажува колку се стари нашите клетки и ткива. Од една страна, очигледно сме способни за неколку години да ја намалиме нашата биолошка старост, но од друга страна, постои опасност нештата да се забрзаат и да завршиме биолошки постари од нашата возраст поради на пр. лошо здравје или премногу стрес.

Ако ги погледнеме хроничните болести што ги погодуваат луѓето на сè помлада возраст, како што се високиот крвен притисок и дијабетесот, оние кои страдаат од нив значително го забрзуваат своето биолошко стареење. Во исто време, стареењето не прави поподложни за добивање на една од овие болести. Ова ја води целата приказна во насока на дилемата што е постаро, кокошката или јајцето - дали побрзо старееме поради болест или побрзо ќе се разболиме ако старееме?

Биолошката возраст се нарекува и „епигенетска“ возраст. Епигеномот е составен од многу хемиски компоненти кои можат да му кажат на геномот (ДНК) што да прави. Епигеномот не е во состојба да ја промени секвенцата на ДНК, но може да го промени начинот на кој клетките ги користат наредбите „напишани“ во нашата ДНК. Епигеномот е подложен на влијанијата на фактори од животната средина и начинот на живот кои можат да доведат и до штетни промени. Сепак, сè повеќе студии покажуваат дека штетните промени во епигеномот може и да се пренасочат и на тој начин да се забави биолошкото стареење.

Првиот веродостоен епигенетски часовник беше откриен пред околу 10 години од страна на истражувач од Универзитетот во Калифорнија во Лос Анџелес, Стив Хорват. Тој одредил неколку различни типови на ткиво врз основа на кои е можно да се утврди биолошката возраст на секој човек. Денес во светот постојат и комерцијално достапни тестови за одредување на биолошката старост.

Како учесниците во студијата успеаја да го вратат или успорат стареењето?

Во однос на исхраната, учесниците добиле задача секој ден да ги консумираат следниве видови храна:

2 чаши темно зелен лиснат зеленчук

2 шолји зеленчук од фамилијата зелки (брокула, зелка, кељ, бок-чој, карфиол, рукола,...)

3 чаши зеленчук со светли бои

30 гр семки од тиква

30 гр семки од сончоглед

1-2 глави цвекло

1 јајце

црн дроб (околу 200 g неделно)

Покрај оваа храна, на учесниците им била дадена задача да јадат секој ден два додатока на адаптогени, за кои се смета дека имаат стимулирачки ефект врз процесот на метилација што ја регулира генската експресија:

1/2 чаша боровинки

2 чешниња лук

2 шолји зелен чај

1/2 лажичка рузмарин

1/2 лажичка куркума

Дополнителни мерки поврзани со дневната рутина:

-Да се пијат две капсули пробиотик дневно

- Да се пијат 8 чаши вода дневно

- Да вежбаат најмалку 30 минути дневно

- Да се практикуваат вежби за дишење 2 пати дневно (вежби за релаксација)

- Да спијат најмалку 7 часа

-Да не земаат храна 12 часа по последниот оброк во денот (временскиот јаз помеѓу вечерата и појадокот)

Ако овие мерки ви звучат премногу сериозно, знајте дека не сите учесници можеле секојдневно да ги завршат споменатите задачи. Според истражувачите, позитивни промени во биолошката возраст се случиле кај оние кои до 82% се држеле до препораките. Сепак, резултатите од ваквите истражувања, кои ги има сè повеќе во последниве години, докажуваат дека нашите секојдневни избори во однос на исхраната и начинот на живот имаат одлучувачко влијание врз квалитетот и должината на живот. Можеби нема да можеме да ги следиме овие ригорозни препораки, но тие се скроени за оние кои сакаат драстично да се подмладат во најкус можен рок. Она што можеме да го направиме е да го искористиме ова искуство и да го примениме она што можеме да го вклучиме во нашата секојдневна рутина.

Внимание: Негативните ефекти на стресот врз биолошкото стареење

Интересно е што седмиот учесник во студијата требало да биде маж, кој се повлекол уште на почетокот поради итен случај на болест во семејството. Пред почетокот на студијата, биолошката возраст на овој 71-годишен маж била утврдена на само 57,6 години. Иако не учествувал во истражувањето, по 8 недели бил подложен на повторно тестирање, каде било утврдено дека во овој краток, но исклучително стресен период, неговата биолошка возраст се зголемила за цели 4 години. Ова не било изненадувачко откритие за истражувачите кои коментираа дека претходните истражувања исто така откриле оти стресните настани може да доведат до драматично забрзување на процесот на стареење на телото. И не само стресот, туку и разните ментални нарушувања, како депресијата, анксиозноста или биполарното растројство, може да доведат до забрзување на биолошкиот часовник и побрзо стареење.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.