Здравје

Оваа храна го намалува холестеролот и дава енергија, а спаѓа меѓу најделотворните појадоци

Овесната каша можеби не изгледа како возбудлив почеток на денот, но нутриционистите тврдат дека овој едноставен појадок може да биде еден од најздравите избори што можете да ги направите.

Овесната каша освен што обезбедува стабилна и долготрајна енергија во текот на целото утро, може да помогне и во намалувањето на нивото на „лошиот“ холестерол, покажува едно поново истражување.

Според регистрираната медицинска сестра Шерил Литго, овесот содржи посебен вид влакна - бета-глукан - што може да помогне во намалувањето на липопротеинот со мала густина, попознат како „лош“ холестерол. Високите нивоа на „лошиот“ холестерол се поврзани со зголемен ризик од блокада на крвните садови, што може да доведе до мозочен или срцев удар.

„Холестеролот е потребен за секоја клетка во телото, особено за функционирање на мозокот, нервите и кожата. Но, премногу „лош“ холестерол може да има сериозни здравствени последици“ – вели Литго.

Студијата покажала дека учесниците кои консумирале напиток со 1 грам бета-глукан од овес три пати на ден во текот на четири недели го намалиле нивото на LDL холестеролот за приближно 6% и ризикот од кардиоваскуларни болести за 8%.

Освен што го одржува здравјето на срцето, овесната каша обезбедува и долготрајно чувство на ситост.

„Овесот полека ја ослободува гликозата во крвотокот, што обезбедува стабилно ниво на енергија и ги намалува шансите да се чувствувате уморни и гладни еден час по појадокот“, додава Литго.

За уште поздрав оброк, можете природно да ја засладите овесната каша со сечкани јаболка, јагоди, сливи или суви сливи, кои исто така го намалуваат холестеролот и се богати со витамини и минерали.

Ако сте загрижени за нивото на холестерол, задолжително консултирајте се со вашиот лекар.

Добрата вест е дека овој вид појадок е исто така многу достапен - пакување овесни снегулки еден килограм чини околу 90 денари.

Тагови: здравје

Македонија

Во првиот квартал со автобуси превезени 9 845 000 патници

Вкупниот број на превезените патници во патничкиот патен превоз во првиот квартал годинава изнесува 9 845 000 и е намален за 8,6 проценти во однос на првото тримесечје од минатата година, објави денеска Државниот завод за статистика.

Во градскиот превоз бројот на патници е намален за 12,4 проценти, а во приградскиот за 6,3 проценти, додека зголемување има во меѓуградскиот за 0.8 проценти и во меѓународниот превоз, за 54,9 проценти.

Вкупниот број на патничките километри е 247 877 илјади и е зголемен за 27,6 проценти во однос на истиот период од претходната година. Во градскиот превоз се зголемени за 30,5 проценти, во приградскиот за 7.2 проценти, во меѓународниот за 62,6 проценти, а намалени се во меѓуградскиот превоз за 5.2 проценти.

Тагови: автобуси

Свет

Украина од почетокот на војната спречила бегство на 49.000 регрути

Украинските погранични сили денеска објавија дека откако Русија ја нападна земјата пред повеќе од три години спречени се околу 49.000 регрути да избегаат од земјата.

-Околу 45.000 од нив беа приведени директно на таканаречената зелена граница, на неофицијални премини или за време на проверки во пограничните области, изјави портпаролот на Државната погранична служба Андриј Демченко во онлајн емисија. Другите мажи биле запрени на граничните премини.

Вкупно биле откриени речиси 900 групи чие бегство било организирано од шверцери.

Според Демченко, оние кои сакаат да избегаат плаќаат од 4.500 евра до речиси 11.000 евра за помош при напуштање на земјата.

Од почетокот на руската инвазија на Украина на 24 февруари 2022 година, во земјата е на сила воена состојба и е издадена наредба за мобилизација.

Мажите на возраст за регрутација помеѓу 18 и 60 години можат да ја напуштат земјата само со дозвола од локалната канцеларија за одбрана.

И покрај ова, повеќе од 800.000 украински мажи на возраст за регрутација добија статус на заштита во земјите-членки на ЕУ откако ја напуштија Украина./МИА

Тагови: украина

Свет

ЕЦБ предупредува за ризиците по финансиската стабилност во еврозоната

Царинските спорови и нарушените односи во меѓународните сојузи би можеле, според Европската централна банка (ЕЦБ), да претставуваат ризик за финансиската стабилност во еврозоната.

-Сè поизразените несогласувања околу трговскиот план и поврзаните ризици за економскиот раст влијаат врз изгледите за финансиска стабилност, изјави денеска потпретседателот на ЕЦБ, Луис де Гиндос, сумирајќи ги наодите од полугодишниот извештај на централната банка за финансиската стабилност.

Ризикот од економски пад е зголемен, при што особено берзите и натаму „остануваат чувствителни на ненадејни и остри прилагодувања“, посебно ако се има предвид променливата трговска политика на американскиот претседател Доналд Трамп, забележа Централната банка на еврозоната.

„Од претседателските избори во САД во 2024 година, неизвесноста дополнително се зголеми бидејќи новата американска Влада го промени правецот во неколку области на политиката“, се наведува во полугодишниот извештај за финансиска стабилност.

Трговските ограничувања и зголемувањето на царините веројатно ќе дејствуваат како товар, првенствено за извозно ориентираните компании во Европа. Доколку ова доведе до отпуштања, ЕЦБ верува дека ризикот би можел да се зголеми за банките во еврозоната, како и за компаниите што нудат финансиски услуги, но немаат банкарска лиценца, бидејќи заемопримачите би можеле да имаат проблеми со отплатата на долговите.

Мноштвото милијарди што Европа планира да ги инвестира во својата одбрана, исто така, не се без ризици, сметаат во Централната банка на Еврозоната.

И додека ваквите инвестиции имаат потенцијал да го поттикнат економскиот раст, повисоките трошоци за одбрана, заедно со други структурни предизвици како што се климатските промени, дигитализацијата и стареењето на населението, „би можеле дополнително да ја влошат веќе затегнатата фискална состојба на некои влади од еврозоната“, предупреди ЕЦБ. /МИА

Тагови: ЕЦБ