Отворена изложбата „Украина се сеќава, светот признава!“ - Канал 5

Култура

Отворена изложбата „Украина се сеќава, светот признава!“

Отворена изложбата „Украина се сеќава, светот признава!“ по повод Денот на сеќавање на Гладоморот – 26 ноември.

Отворена изложбата „Украина се сеќава, светот признава!“

Во Собранието денеска беше отворена изложбата „Украина се сеќава, светот признава!“ по повод Денот на сеќавање на Гладоморот – 26 Ноември, на која беа претставени информативни материјали од вештачки создадениот глад од страна на советските власти во Украина во 1932/33, познат како Гладомор.

Материјалите на изложбата покриваат речиси половина век и таа почнува со тоа каква била Украина пред оваа трагедија, а завршува со приказна за одржување на сеќавањето на Гладоморот во модерната украинска држава.

Претседателот на Собранието, Талат Џафери на отворањето на изложбата истакна дека во принцип, секогаш е потежок патот што го поминува борбата на доброто против злото, но дека тоа што не разликува и ни дава сила да истраеме на тој трновит пат е цврстата волја, верба и надеж дека сме извлекле поука од минатото и сме се бореле на сите можни начини да не се повторат тие грешки и во иднина.

– За жал, историјата се повторува. Сега се други средствата, меѓутоа во принцип, намерата е иста и таа не е воопшто хумана – да се покорат на сите можни начини Украина и Украинците, а и агресорот е ист. Што е уште понелогично, се работи за земја членка на Советот за безбедност, кој што е еден од шесте тела на Обединетите нации и е конкретно задолжен за обезбедување на светскиот мир и безбедност, истакна Џафери.

Тој потсети дека на светот му требаа цели 90 години да признае на ниво на влади или парламенти во голем број на држави од демократскиот свет дека Гладоморот е акт на геноцид, а Европскиот парламент на 23 октомври 2008 година усвои Резолуција со која се признава Гладоморот како злосторство против човештвото.

– Тоа не е доволно. Злосторство или геноцид, тоа мора да се именува и да се викне толку гласно за да одекне и остави белег во сечиј ум и разум, во сечија совест и одговорност дека се посегнува по највредното, по најскапоценото – по животот. На деца, жени, стари и млади – без разлика, со сите однапред испланирани и спроведени систематски начини на истребување на еден народ и една држава. Толку системски што дури не се знае, ниту точната бројка на жртви која според различни извори се движи од 4 до 15 милиони жртви. Тоа не се зрна песок, тоа се живи семејства, широки насмевки, успеси и солзи, тоа се човечки судбини, додаде Џафери.

Претседателот на Собранието апелираше да не дозволиме сè да се претвори во пепел, бидејќи премногу сме вложиле и сме жртвувале и ние и нашите предци и нивните предци.

– Да не дозволиме злото да затропа и на наша врата, затоа што на овој или на оној начин, ефектот се рефлектира на сиот свет, без разлика, порача Џафери.

Амбасадорката на Украина во земјава, Лариса Дир потенцира дека Гладоморот е геноцид на украинскиот народ, кој беше предизвикан од „намерно организираните дејствија на сталинистичкото комунистичко раководство, со цел да се создаде вештачки глад во 1932-1933 година во Украина, како резултат на кој загинаа милиони и милиони луѓе“.

– Поминаа 90 години од геноцидот наречен Гладомор, но сега – Ирпин, Буча, Лиман, Изум, Мариупол – се посебни симболи на геноцидот извршен од постојана членка на Советот за безбедност на ОН. Вршејќи геноцид во Украина, членка на Советот за безбедност на ОН го истребува цивилното население на Украина, убива, мачи, предизвикува тешки телесни повреди, насилно пренесува деца во Руската Федерација, намерно уништува станови, болници, училишта, цивилна енергетска инфраструктура во предзимскиот период, изјави Дир.

Таа потенцира дека сегашниот геноцид продолжува токму затоа што претходниот геноцид не беше казнет.

– Само постепено, со текот на времето, почнавме да ја дознаваме вистината за злосторството Гладомор. Сега, повеќе извори ни ги покажуваат злосторствата што руската армија ги прави во Украина речиси во реално време, рече Дир.

Таа посочи дека украинската Врховна рада апелираше до странските парламенти и влади да ги признаат злосторствата што Русија во моментов ги врши на територијата на Украина, како „геноцид врз украинската нација“.

– Украина, исто така, повикува за признавање на Гладоморот од 1932-1933 година во Украина, како геноцид врз украинскиот народ. Признавањето би претставувало неверојатно силна поддршка и би додало духовна сила на оние кои се наоѓаат на првата линија на фронтот и се борат за правото на живот, рече украинската амбасадорка.

Заменик народниот правобранител Јован Андоновски нагласи дека човековите права се права кои што ги имаме единствено само заради тоа што постоиме како луѓе, посочувајќи дека тие не се дадени од некоја држава, но државите и надлежните се должни да ги заштитат и да ги поддржат.

Првиот човек на ЦИВИЛ, новинарот Џабир Дерала истакна дека „геноцидната војна“ што ја води Русија, негирањето на украинската нација, јазик и идентитет, анексијата на делови од територијата на суверената држава Украина и систематското спроведување на терор против цивилното население, целосно го уриваат меѓународниот поредок.

– Војните за освојување територии и претворањето на енергенсите и храната во оружје сега се реалност за светот. Исправени сме пред новата мрачна реалност – секојдневни конфликти, нови жестоки воени жаришта и бранови на терористички напади, нуклеарни закани, кибер војни, глад, несигурност и брутални насилства насекаде во светот, рече Дерала, кој упати и апел до пратениците во Собранието да го прогласат Гладоморот за геноцид и да продолжат со благородната поддршка на украинската борба за слобода.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Шоу биз

Барби ѝ оддава почит на Витни Хјустон со нова кукла

Барби ѝ оддаде почит на покојната Витни Хјустон со своја кукла. 

Барби ѝ оддава почит на Витни Хјустон со нова кукла

Таа им се придружува на голем број ѕвезди, вклучувајќи ги Дејвид Боуви и Дајана Рос, кои добија своја кукла како дел од колекцијата „Barbie Signature“. Куклата изгледа исто како Хјустон во музичкото видео за „I Wanna Dance With Somebody (Who Loves Me)“ - облечена во розов, тесен фустан, шарени обетки и бели и сини потпетици, заедно со нејзините препознатливи шишки од 80-тите и долга виткана коса.

Барби ѝ оддава почит на Витни Хјустон

По повод речиси 40-годишнината од објавувањето на песната, како и нејзиниот роденден, куклата ја слави пејачката и нејзиното наследство во музиката, забавата и културата. „Музиката на Витни Хјустон е саундтрак за безброј моменти за обожавателите ширум светот“, рече Натан Бејнард, потпретседател и раководител на брендот Барби во Мател.

„Барби е горда што ѝ оддава почит на нејзиното извонредно наследство со најновото дополнување на колекцијата.“ „Оваа кукла го слави нејзиниот препознатлив стил, радост и дух. Се надеваме дека ќе им обезбеди на обожавателите значаен начин да го прослават уметникот чиј глас и влијание продолжуваат да резонираат низ целиот свет.“

Многу познати личности имаат свои кукли Барби

Куклата беше претставена на петтата годишна гала-вечер Витни Хјустон „Legacy of Love“, која е во корист на фондацијата на покојната пејачка за помагање на младите луѓе. Таа им се придружува на голем број музичари како што се Мајли Сајрус, Кајли Миног, Стиви Никс и Глорија Естефан кои исто така добија своја кукла во колекцијата. Други ѕвезди се Тина Тарнер, Елвис Присли, Елтон Џон и Хуан Габриел.

Хјустон стана еден од најпродаваните изведувачи во историјата на поп-музиката откако потпиша договор како тинејџерка. Таа стоеше зад хитови како „How Will I Know“, „Saving All My Love For You“ и нејзината изведба на „I Will Always Love You“, која се искачи на врвот на топ листите. Таа почина во 2012 година на 48-годишна возраст.

Извор: Индекс.хр

Тагови: Витни Хјустон

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Автомобилизам

Малиот „Smart“ прикажан пред премиерата: Досегот ќе ве изненади

„Smart“ се враќа на малите автомобили, но електричниот „#2“ сега има многу поголем досег на возење.

Малиот „Smart“ прикажан пред премиерата: Досегот ќе ве изненади

Новиот градски автомобил „#2“ на „Smart“ требаше да биде претставен во октомври на Саемот за автомобили во Париз, но кинеските регулаторни документи веќе го открија неговиот изглед и технички податоци.

Моделот „#2“ го претставува враќањето на „Smart“ во сегментот на мали градски автомобили и е развиен во соработка со „Mercedes-Benz“ и „Geely“. Ќе се продава исклучиво како електричен автомобил.

Дизајнот на производствената верзија е многу сличен на концептот претставен во април. Разликите главно се однесуваат на поедноставна решетка и браници, различни светла, класични рачки на вратите и помали тркала со конвенционални гуми.

Купувачите ќе можат да изберат двобојни комбинации на каросерија, различни дизајни на тркала и дополнителни аеродинамични елементи.

Поголем, но сепак исклучително компактен

„Smart #2“ е долг 2,75 метри, што е околу шест сантиметри подолго од претходниот „EQ ForTwo“. Меѓуоскиното растојание останува речиси непроменето, додека кругот на вртење е 6,95 метри.

Автомобилот ја користи новата механичка платформа на „Geely“, „Electric Compact Architecture“, и електричен мотор од 82 КС поставен на задниот дел. Максималната брзина е електронски ограничена на 140 км/ч.

Досег 300-400 километри

Енергијата се обезбедува од „LFP“ батерија произведена од „CATL“, додека „Geely“ е одговорен за нејзиното склопување. „Smart“ наведува „WLTP“ досег од 300 километри, додека според кинескиот „CLTC“ стандард е можно да се поминат дури 400 километри.

Ова е значително повеќе од она што го нудеше претходниот „EQ ForTwo“.

Новиот модел ја поддржува и функцијата „V2L“, како и брзо„ DC“ полнење, при што батеријата се полни од 10 до 80 проценти за помалку од 20 минути.

Внатрешноста на сериската верзија сè уште не е прикажана, но се очекува дигитална инструмент табла, централен дисплеј и модерни детали познати од концептот.

„Smart #2“ ќе се произведува во Кина, а по официјалната премиера во Париз во октомври, треба да стигне до бројни светски пазари, вклучително и Европа. Цената ќе биде објавена подоцна.

Извор:Б92

Тагови: Smart

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Технологија

Нема повеќе ограничувања за бесплатниот „ChatGPT“

„OpenAI“ објави дека бесплатниот „ChatGPT“ ќе добие неограничен број текстуални разговори, како и некои нови функции.

Нема повеќе ограничувања за бесплатниот „ChatGPT“

Американската компанија за вештачка интелигенција „OpenAI“ објави дека сите корисници на бесплатната верзија на алатката „ChatGPT“ ќе добијат неограничен број текстуални разговори, со што се отстранува претходното ограничување за разговор.

Бесплатните корисници и корисниците на пакетот „Go“ во иднина ќе го користат новиот модел „GPT-5.6 Luna“, кој станува стандарден модел наместо претходниот „GPT-5.5“.

Покрај тоа, корисниците ќе имаат пристап и до нова опција за подлабоко размислување (Think) што му овозможува на моделот да користи повеќе компјутерски ресурси при решавање на посложени прашања, објавува „Tech Crunch“.

„OpenAI“ нагласува дека ограничувањата сè уште ќе постојат за функциите што бараат повеќе ресурси, како што се работа со датотеки, гласовна комуникација, обработка на слики и генерирање нови слики.

Промените доаѓаат и кај корисниците со претплата „Plus“ и „Pro“ кои ќе го добијат подобрениот модел „GPT-5.6 Sol“, наменет за брзи задачи како што се одговарање на прашања, пребарување на интернет, планирање, пишување и донесување одлуки.

Новиот модел, според „OpenAI“, обезбедува поконцизни и посигурни одговори.

Дополнително, корисниците на „Plus“ и „Pro“ добиваат можност да го прилагодат нивото на размислување (Thinking Slider), што им овозможува да одредат колку време и компјутерски ресурси моделот ќе посвети на одговорот, во зависност од сложеноста на задачата.

Новиот модел е достапен за корисниците на „Plus“ и „Pro“ веднаш, додека оние кои не се претплатници постепено ќе добијат пристап до неограничени текстуални разговори во текот на оваа и следната недела.

Извор: Б92

Фото:ВИ

Тагови: ChatGPT

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

притисни ентер