Забава

Отворена 14. Штипска пастрмајлијада

Градоначалникот на Штип Иван Јорданов и евроамбасадорот Дејвид Гир ја отворија 14. Штипска пастрмајлијада, после две години пауза.

-Прекрасно е чувството да се биде на оваа манифестација после две години. Очекуваме рекордна посетеност затоа што нудиме највкусна пастрмајлија и добра забава. Очекувам оваа вечер да се срушат рекорди во конзумирање на пастрмајлија и нормално Штип да биде епицентарот на Македонија, рече Јорданов.

Евроамбасадорот Гир изрази, како што кажа, огромно задоволство што е вечерва во Штип на пастрмајлијадата.

-Градоначалникот ми кажа дека патрмајлијата е најдобра во земјата и решив да дојдам и да ја пробам и сигурен сум дека ќе биде прекрасна. Ова е една преубава македонска традиција. Мислам дека ние од ЕУ можеме да научиме нешто од неа, дури може да имаме и пастрмајлијада во ЕУ и да научиме нешто од Штип, рече евроамбасадорот.

Тој, како што кажа, пробал пастрмајлија летото, ама, вели, тоа било погрешно време да се проба.

Најголемата патрмајлија на годинашнава манифестација е со димензии два метри на метар и десет сантиметри. За неа се употребени десет килограми свинско месо и петнаесет килограми тесто, како и два литри масло. Печена е во едно парче.

Годинашново издание на Штипската пастрмајлијада се одржува вечерва и утре на кај крстосницата „Дујле“. Организаторите и спонзорите имаат подготвено богата програма. /МИА

Свет

Трамп нема да сведочи по втор пат во случајот со граѓанска измама

Поранешниот американски претседател Доналд Трамп соопшти дека одлучил да не сведочи по втор пат на судењето за граѓанска измама во Њујорк.

Трамп на својата социјална мрежа Truth Social напиша дека многу успешно сведочел минатиот месец и дека не гледа потреба повторно да се појавува.

Трамп денеска требаше да се врати на говорницата како последен главен сведок на одбраната во случајот, кој ја загрозува неговата империја со недвижнини и го нарушува неговиот имиџ како успешен бизнисмен.

Трамп, неговите синови Ерик Трамп и и Доналд Трамп Џуниор, и други високорангирани директори на Организацијата Трамп се обвинети од њујоршката обвинителка Летиција Џејмс дека се вклучиле во децениска шема во која користеле „бројни чинови на измама и лажно претставување“ за да надујат нето вредноста на имотот на Трамп за тој да добие поповолни услови за кредит. Судењето доаѓа откако судијата во случајот со делумна збирна пресуда пресуди дека Трамп поднел „лажни проценки“ за неговиот имот, оставајќи го судењето да утврди дополнителни дејствија и каква казна, доколку ги има, треба да добијат обвинетите. /МИА

Македонија

Водата за пиење во Скопје е безбедна и микробиолошки исправна

Водата во Скопје е безбедна и микробиолошки исправна, соопшти денеска Јавното претпријатие „Водовод и канализација“ – Скопје.

Според неделниот извештај за квалитетот и безбедноста на водата за пиење добиен од анализите спроведени во Секторот за санитарна контрола, направени од 4 декември 2023 до 7 декември 2023 година, сите анализирани примероци одговараат на Правилникот за барања за безбедност и квалитет на водата за пиење.

За анализа биле земени 154 примероци за физичко-хемиска и исто толку примероци за микробиолошка анализа на вода за пиење од 42 мерни места во Град Скопје.

Свет

Генералното собрание на ОН утре ќе расправа за хуманитарната криза во Газа

Генералното собрание на ОН ќе се состане утре за да разговара за хуманитарната криза во Газа, соопштија официјални лица и дипломати откако САД минатата недела ставија вето на резолуцијата на Советот за безбедност за прекин на огнот.

Специјален состанок на Генералното собрание свикаа за вторник попладне претставниците на Египет и Мавританија „како претседавач со Арапската група и претседавач со Организацијата за исламска соработка“.

Според дипломатски извори, Генералното собрание, чии резолуции се необврзувачки, се очекува на состанокот да гласа за текст за резолуција за прекин на огнот. Во нацртот-текстот се повикува на „итен хуманитарен прекин на огнот“, како и „итно и безусловно ослободување на сите заложници“.

Во петокот, САД ја блокираа резолуцијата за прекин на огнот, која дојде откако генералниот секретар на ОН, Антонио Гутереш свика итен состанок на Советот за безбедност, со примена на ретко користениот член 99 од Повелбата на ОН со кое ќе го сврти вниманието на СБ кон „секое прашање кое според него може да го загрози одржувањето на меѓународниот мир и безбедност

„Авторитетот и кредибилитетот“ на телото се „сериозно поткопани“ од неговиот одложен одговор на војната, рече Гутереш подоцна. /МИА