Здравје

Отпорноста на антибиотици може да убие повеќе од 39 милиони луѓе до 2050 година

Отпорноста на антибиотици може да предизвика смрт на повеќе од 39 милиони луѓе до 2050 година. Ова е заклучокот од студијата објавена во научната публикација „Лансет“, пренесоа светските агенции.

За прв пат, ваква студија го проценува влијанието на отпорноста на антибиотици низ годините и се обидува да го предвиди нејзиниот развој.

Од 1990 до 2021 година, повеќе од еден милион луѓе годишно во светот умирале поради отпорност на антибиотици. Авторите на студијата се фокусираа на 22 патогени агенси, 84 комбинации на третман со патогени и 11 инфективни синдроми кај луѓе од сите возрасти во 204 земји и територии преку податоци за повеќе од 520 милиони луѓе.

Во тие три децении, смртните случаи на деца под пет-годишна возраст директно предизвикани од отпорност на антибиотици се намалија за повеќе од 50 проценти, бидејќи превенцијата и контролата кај доенчињата и малите деца се подобрија.

Меѓутоа, поретко кај овие деца, инфекциите станаа потешки за лекување кога ќе се појават. Во исто време, стапката на смртност кај постарите лица на возраст од 70 и повеќе години скокна за 80 отсто во истиот период поради брзото стареење на населението и поголемата ранливост на старите лица на инфекции.

Што се однесува до патогените агенси, смртноста поради Staphylococcus aureus отпорен на метицилин е најмногу зголемена во светот.

Во следните децении, смртните случаи поради отпорност на антибиотици уште повеќе ќе се зголемат.

Според моделите на истражувачите, бројот на директни жртви може да достигне 1,91 милиони годишно ширум светот до 2050 година, што е скок од повеќе од 67 отсто во споредба со 2021 година. До средината на овој век, отпорноста на антибиотици ќе игра поголема улога за 8,22 милиони смртни случаи годишно, зголемување од 74,5 проценти во споредба со 2021 година. Вкупно помеѓу 2025 и 2050 г.

Отпорноста на антибиотици би можела да биде директна причина за повеќе од 39 милиони смртни случаи ширум светот и би била поврзана со 169 милиони смртни случаи, според научниците.

Сепак, можни се и помалку песимистички сценарија, забележуваат авторите на студијата.

Тие, исто така, потсетуваат дека подобрувањето на третманот на инфекции и пристапот до антибиотици може да спречи 92 милиони смртни случаи ширум светот помеѓу 2025 и 2050 година, особено во Јужна Азија и субсахарска Африка./МИА

Свет

Душчик: Белорусија планира „жешка гранична и миграциска криза“

Неговата изјава уследи откако полскиот премиер Доналд Туск пред неколку дена го најави планот за суспендирање на правото на азил.

Плановите на Полска привремено да го суспендира правото на азил се засноваат на претпоставката дека соседна Белорусија се обидува да прати голем број мигранти кон заедничката граница, изјави денеска полскиот заменик-министер за внатрешни работи Мачеј Душчик.

- Информациите што ги имаме за различни сценарија, кои се развиваат во Белорусија и Русија го оправдуваат таков сигурносен вентил. Белорусија работеше на жешка гранична и миграциска криза, планирајќи насилно да принуди стотици луѓе кон надворешната граница на ЕУ, за да ја дестабилизира ситуацијата во Полска, посочи Душчик.

Неговата изјава уследи откако полскиот премиер Доналд Туск пред неколку дена го најави планот за суспендирање на правото на азил.

Полска и ЕУ ги обвинуваат рускиот и белорускиот претседател, Владимир Путин и Александар Лукашенко дека ги туркаат мигрантите од кризните региони кон надворешната граница на ЕУ со цел да извршат притисок врз Западот.

И покрај изградбата на ограда висока 5,5 метри и електронски систем за надзор долж полската граница, мигрантите сè уште секојдневно се обидуваат илегално да ја преминат границата. Од почетокот на годината, полските граничари веќе регистрирале речиси 28.000 такви обиди. /МИА

Фудбал

Марко: Верстапен ќе стане шампион бидејќи Норис има психолошки слабости

Советникот на Ред Бул, Хелмут Марко објасни зошто е уверен дека Макс Верстапен ќе ја освои титулата, а не Ландо Норис од Мекларен.

-Макс е најдобар, тој е најбрз и пред се е ментално силен да се бори за светската титула. Во ова тој е супериорен во однос на Шарл Леклер и Ландо Норис. Знаеме дека Норис има некои психолошки слабости. Прочитав дека треба да прави некои ритуали за да се претстави добро на денот на трката, изјави Марко.

Верстапен претходно изјави дека крајот на тековната сезона, според него, нема да биде толку напнат поради борбата со Норис како што беше со Луис Хамилтон од Мерцедес во 2021 година.

Во моментов предноста на Верстапен во однос на Норис е 52 бода. Остануваат уште шест трки до крајот на сезоната 2024.

Следната етапа од Формула 1 шампионатот е од 18 до 20 октомври во Остин (САД). /МИА

Свет

СЗО: Во Појасот Газа напредува вториот круг вакцинација против детска парализа

Повеќе од 92.000 деца во Појасот Газа ја примиле втората доза на вакцина против детска парализа откако вчера почна новиот круг вакцинација, соопшти денеска Светската здравствена организација во Женева.

Израел се согласи да паузира во борбите за да ја олесни кампањата за вакцинација, како што тоа го направи во текот на првиот круг во септември, откако во Газа беше откриен првиот случај на полио во последните 25 години.

СЗО моментално работи со партнерски организации во центарот на крајбрежната област за да се дистрибуираат новите дози.

Тимовите за вакцинација потоа ќе се преселат на југ пред да заминат на север за да вакцинираат вкупно повеќе од 590.000 деца под 10-годишна возраст во вториот и последен круг. Децата тогаш треба да имаат целосна заштита од болеста.

Детската парализа има тенденција да се шири каде што многу луѓе живеат заедно под лоши хигиенски услови.

Едногодишната офанзива на Израел против милитантите на Хамас уништи огромни области на Газа и остави голем дел од здравствената инфраструктура во урнатини.

Стотици илјади луѓе побараа засолниште во кампови со шатори и сместување во итни случаи.

Првиот случај на детска парализа во последните 25 години е регистриран во Појасот Газа летото. Болеста може да предизвика трајна парализа, па дури и смрт. /МИА

притисни ентер