Многумина ќе помислат дека ова е радио сигнал испратен од развиена туѓа цивилизација, но треба да се напомене дека таквите сигнали може да бидат предизвикани и од природни феномени, што најверојатно било и во овој случај.
Но, дури и да не го испрателе „малите зелени“, откривањето на овој вид радио сигнал сепак е чекор кон разбирање на вонземските светови затоа што експертите можат да утврдат дали егзопланетата може потенцијално да го поддржи развојот на животот, пишува „ Futurism “.
Егзопланетата од која потекнуваат радио сигналите спаѓа во категоријата жешки Јупитери и орбитира многу близу до нејзината sвезда во соѕвездието Волар.
Жешкиот Јупитер е вид на егзопланета слична на Јупитер, која е многу близу до матичната sвезда и има висока температура на површината поради нејзината големина, маса и состав. Тие обично ја посетуваат својата sвезда на само неколку дена (револуција <10 дена) , каде едната страна е секогаш свртена кон матичната sвезда, а на другата има вечна ноќ.
Соѕвездието Волар (Boötes) е едно од најголемите соѕвездија на нашето небо.
"Сигналот доаѓа од системот Тау Ботес, кој се состои од бинарна sвезда и егзопланета. Ние веруваме дека сигналот дошол од самата планета", рече астрономот Џејк Д. Тарнер од Универзитетот Корнел.
Научниците го откриле овој сигнал користејќи радио телескоп LOFAR лоциран во Холандија. Тарнер и неговите колеги забележале радио-сигнали во системот Тау Ботес, оддалечен околу 51 светлосни години, што всушност е релативно блиско кога ќе се земат предвид класичните вселенски растојанија. Оваа џиновска планета е само малку подалеку од нашата најблиска sвезда.
На пример, најблиската sвезда до нашето Сонце е Проксима Кентаури, на оддалеченост од 4,2 светлосни години.
Експертите кои го откриле сигналот велат дека ќе бидат потребни дополнителни истражувања за да се открие неговото точно потекло. За почеток, треба да потврдат дека сигналот навистина доаѓа од таа планета. Ако се во право, радио брановите како овој би можеле да ни кажат дали овие далечни светови имаат магнетосфера како онаа што ја штити Земјата.
„Ако понатамошните студии го потврдат ова откритие, ќе имаме нов увид во начинот на истражување на вонземските светови кои се оддалечени десетици светлосни години од нас“, рече астрономот Реј Џајавардана од Универзитетот Корнел.
Земјиното магнетно поле ја штити нашата планета од опасното космичко зрачење.
"Ако магнетното поле на егзопланетата наликува на Земјата, тоа значи дека може да биде населена. Магнетното поле ја штити атмосферата на планетата од сончевиот ветер и космичките зраци", објасни Тарнер.
"Но, сигналот е прилично слаб, па засега е сè уште неизвесно дали навистина доаѓа од таа планета. Исклучително е важно да спроведеме понатамошни истражувања за точно да го утврдиме потеклото на овие сигнали", додаде тој.
Истражувањето наречено „The search for radio emission from the exoplanetary systems 55 Cancri, upsilon Andromedae, and tau Boötis using LOFAR beam-formed observations “ е доставено за објавување во списанието „ Astronomy & Astrophysics“.