Отежнато водоснабдувањето во Тетово, дефект на главен цевковод на новиот систем

Во Тетово има отежнато водоснабдување, а повторно проблем е дефект на цевководот што оди од месноста Лешница. 

Прекинат е дотокот на вода од новиот водоснабдителен систем кој носи вода од планинските реки и преку филтер пречистителна станица го снабдува градот со дополнителни количини вода.

-Станува збор за дефект на главна водоводна цевка од новиот водоснабдителен систем. Цевката е скината на спој и изместена од позицијата, а сметаме дека причина е движењето на земјиштето. Поради дефектот имаме намалување на количината на вода. Работниците од претпријатието при работна единица „Водовод и канализација" ќе бидат максимално ангажирани за побрзо и поефикасно санирање на дефектот, изјави Љуљзим Шаќири, раководител на работната единица при ЈКП „Тетово".

Во моментот градската водоводна мрежа се снабдува со 140 литри вода во секунда од стариот водоснабдителен систем, како и дополнителни количини од бунарите. Со тоа снабдувањето достигнува до 200 литри вода во секунда.

На почетокот на јануари домаќинствата во Тетово се соочија со отежнатото водоснабдување поради заматување на водата, која се зема од месноста Лешница во новиот дистрибутивен систем.

Во Бристол им се суди на лицата , кои фрлија статуа на робовладетел во море

Тројца мажи и една жена пред судот во Бристол се изјасниле за невини за учество во рушењето на статуата на Едвард Колстон, сопственик на робови и трговец со робови од 17 век во Бристол, во југо-западна Англија.

За време на демонстрациите против расизмот на 7 јуни минатата година во Бристол, како дел од глобалниот бран протести наречен „Црните животи се важни“, беше срушена статуата на овој британски сопственик на робови и фрлена во пристаништето во Бристол.

Собраниска делегација на онлајн февруарските состаноци на ПС на НАТО

Делегација на Собранието учествуваше на традиционалните февруарски заеднички состаноци што во организација на ПС на НАТО вчера и денеска се одржаа онлајн преку платформата KUDO.

– Овие состаноци се одржуваат според правилата на Chatham House, при што поради сензитивноста на споделените информации, истите не можат да се пласираат во пошироката јавност, информираат од Собранието.

На состанокот, како што се наведува во соопштението, учествувале шефот на Делегацијата на Собранието во Парламентарното Собрание на НАТО, Арбер Адеми и членот на делегацијата Илија Николовски.

Дебатата се одвивала за пост-пандемиските стратешки предизвици и приоритети за НАТО, отпорноста на општествата и демократијата во Алијансата, предизвиците со Истокот и други актуелни состојби. Парламентарците се осврнале и на Проектот „НАТО 2030" и улогата на парламентите, при што бил поздравен придонесот на парламентарците кон овој проект, кои дале свои размислувања и подобрувања на него. Бил презентиран и првиот онлајн претседателски извештај на ПС НАТО, изготвен под специфични работни услови поради пандемијата со Ковид-19.

На вториот ден на заедничкиот состанок се одржал специјалниот состанок со постојаните претставници на земјите-членки во Северноатлантскиот совет (NAC).

Февруарските состаноци на ПС на НАТО претставуваат форум на кој парламентарците имаат можност да се сретнат со владините претставници на НАТО и експерти од воената област, со цел да бидат запознаени со актуелните случувања во креирањето на стратешките политики на Алијансата.

Владата го одобри предлог законот за прогласување на дел од Шар Планина за Национален парк

Владата на денешната 50-та седница го утврди текстот на Предлог законот за прогласување на дел од Шар Планина за Национален парк, подготвен од Министерството за животна средина и просторно планирање.

– Основна цел на ова законско решение е прогласување на дел од Шар Планина за заштитено подрачје од втора категорија – Национален парк, заради обезбедување заштита на исклучителните природни убавини и вредности, разновидноста и богатството на биодиверзитетот, геодиверзитетот, хидролошките карактеристики, пејзажните, пределните и други вредности, како добра од јавен интерес, информираат од владината прес служба, по завршувањето на седницата.

Владата на денешната 50-та седница го разгледа и усвои и Планот за борба против корупцијата и здравствениот протокол за непречено спроведување на Пописот.

притисни ентер