Култура

Отец Партениј: Договорот од Преспа е основа за подобра соработка

Грчката телевизија ЕРТ 3 го посети Бигорскиот манастир, а во интервјуто со игуменот на манастирот, архимандрит Партениј, неизбежна тема беше и Договорот од Преспа, како и признавањето на автокефалноста на МПЦ-ОА.

Грчката телевизија ЕРТ 3, пројави голем интерес да го посети Бигорскиот манастир, на кој му претстои голем јубилеј – 1000 години од неговото основање – што е повод тој да биде се' почесто посетуван од многу медиуми од регионот.

Грчката телевизија е изненадена што многу грчки туристи и поклоници токму со години доаѓаат во Бигорскиот манастир, за што Игуменот на Бигорскиот манастир, Архимандрит Партениј објаснува:

„Сите што доаѓаа во Охрид, доаѓаа и овде. До денес е така, најмногу доаѓаат млади, но доаѓаат и свештеници и монаси, оние со кои имаме врски. Нѐ сакаат, гледаат дека овде живее еден народ што е ист како нив“.

Грчките новинари не ја пропуштија можноста да побараат мислење и за Договорот од Преспа, за што отец Партениј децидно одговори:

„Јас не сум стручен да кажам дали е совршен овој Договор, но тој претставува една основа за да имаме подобра соработка“.

И ова, како и сите останати интервјуа за странски медиуми, Архимандрит Партениј го искористи за да го актуелизира проблемот на МПЦ-ОА и да побара поддршка за решавање на најголемата рана во нашата Црква:

„Се надеваме и се молиме на Бога, да се реши најголемиот проблем – тоа е расколот. Зашто, како што кажав, имаме добро врски со Света Гора, со Црквата на Грција, но она што е најважно за нас, не можеме да го направиме – тоа е да сослужуваме, што е за жалење, зашто сме браќа“.

Како што истакна во интервјуто, негова најголема желба, е токму на милениумскиот јубилеј на Бигорски, Вселенскиот Патријарх да присуствува на големата празнична прослава:

„Се надеваме дека Патријаршијата ќе ни помогне за нашата Црква да стане автокефална, и за нас ќе биде голема, најголема радост, Вселенскиот патријарх да дојде овде, да го пречекаме и да празнуваме заедно“.

Отец Партениј не пропушти да испрати и срдечна порака до народот на Грција, велејќи: „Сакаме да ја испратиме оваа порака на љубовта до Грците, кон Црквата на Грција, кон Патријаршијата, и кон сите, дека ги сакаме и сакаме и ние да бидеме во тоа семејство, зашто веруваме во една света, соборна и апостолска Црква“.

Запрашан, пак, од новинарот на грчката телевизија дали неговата надеж е заедничката Литургија, тој истакна:

„За тоа живеам. Тоа го чекам. Тоа е мојот сон и мојата надеж е тоа. Зашто за мене, како монах, најважна е светата Литургија, светата Причест. И многу се натажувам, кога одам таму и не можам да се причестам. За нас, за сите, тоа е една голема рана“.

Голем дел од емисијата беше посветен и на историјатот на Манастирот и на Чудотворната икона на Св. Јован Крстител.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Живот

Финците се најсреќната нација во светот, но земјата тоне во долгови

Финска, земјата што девет години по ред е прогласувана за најсреќна во светот, се соочува со најави за тешка зима и најстрог буџет во последните години, насочен кон силни мерки за штедење.

Пред изборите во април, дебатата не се води околу тоа дали ќе има кратења, туку кои услуги, социјални бенефиции и пензии ќе бидат најмногу погодени.

Показателите за долгот и дефицитот на Финска се најлоши уште од 1990-тите години, кога колапсот на банкарскиот систем и распадот на Советскиот Сојуз – тогаш клучен извозен партнер – предизвикаа длабока економска криза, пишува DW.

Раст на јавниот долг Финскиот завод за статистика минатиот месец потврди дека јавниот долг во вториот квартал достигнал 90,3 отсто од БДП, што претставува пораст од околу 65 отсто пред пандемијата.

Една од причините лежи на исток: Финска ги зголеми трошоците за одбрана по влезот во НАТО, поттикната од руската инвазија врз Украина.

Покрај тоа, Хелсинки се соочи со значително повисоки трошоци за енергија откако стави крај на зависноста од Москва, од каде што набавуваше околу една третина од својата енергија. Сепак, финската влада троши повеќе отколку што прибира средства уште од финансиската криза во 2008 и 2009 година, делумно поради стареењето на населението и бавниот економски раст.

Минатиот месец, Државната управа за финансии прогнозираше дека буџетскиот дефицит во 2026 година ќе изнесува 4,2 отсто од БДП.

Брисел бара од Хелсинки да го намали новото задолжување, бидејќи правилата на Европската Унија наложуваат дефицитот да не надминува три отсто од БДП.

Во јануари, Европскиот совет покрена постапка и ѝ даде рок на Финска до крајот на 2028 година да ја постигне оваа цел. Владата на премиерот Петери Орпо, која е на власт од јуни 2023 година, планира да заштеди приближно девет милијарди евра во текот на својот мандат.

Економистите предупредуваат дека следната влада – без оглед на тоа кој ќе победи на изборите – ќе мора да спроведе значително подлабоки кратења.

Иако стапката на ризик од сиромаштија во Финска е под просекот на ЕУ, земјата има една од највисоките стапки на невработеност во Унијата.

Според „Еуростат“, во август таа изнесувала 10,3 отсто – малку повеќе отколку во Шпанија (10 отсто). Невработеноста кај младите достигнала 23,3 отсто, наспроти просекот во ЕУ од 15,4 отсто. Лаури Олапа, директор на Финскиот центар за нови економски анализи, предупреди дека нов круг на мерки за штедење би ѝ нанел тежок удар на домашната економија, бидејќи потрошувачката на домаќинствата веќе опаѓа.

„Повеќе од четвртина од населението работи во јавниот сектор; доколку овие работници се соочат со закана од отпуштање, стапката на штедење ќе порасне, а приватната потрошувачка дополнително ќе се намали“, изјави Олапа за DW. И покрај низата предизвици – од пандемијата и повисоките каматни стапки до последиците од две војни – нацрт-буџетот за 2027 година сепак предвидува дефицит од 12,4 милијарди евра.

Македонија

МНР: Софија ги подрива напорите за градење доверба, за случајот ќе бидат информирани ЕУ и Советот на Европа

Приемот на високо ниво во Бугарија за Ива Михаилова ги подрива напорите за градење доверба, реагира македонското МНР по најавата на бугарската претседателка Јотова дека ќе се сретне со обвинетата со двојно државјанство.

Очекуваат од Бугарија да ги почитува основните европски принципи за неселективност и еднаквост пред законот, а за актуелните случувања најавуваат дека ќе ги информираат меѓународните партнери, особено институциите на ЕУ и Советот на Европа.

-МНР укажува дека ваквото постапување на бугарските државни институции ги подрива напорите што ги вложуваме за градење доверба и е спротивно на декларираните заложби за развој на добрососедските односи. Приемот на високо ниво на лице против кое се води судска постапка испраќа сериозно погрешна порака. Националната припадност и поседувањето друго државјанство не смеат да служат како заштита од одговорност пред надлежните институции. Секој има право на правично судење. Никој нема право на изземање од законите. – пишува во соопштението на МНР.

Дека ќе организира средба Јотова соопшти утрово пред новинарите, тврдејќи дека нема детали за тоа како Михаилова преминала граница.

„ Немате ли информација на каков начин дошла?

- Не, не.

Ќе се видите ли со неа?

- Во првата прилика, ако не ја остават во болница. Но и да ја остават во болница, ќе направам се што можам да се видам со неа.

Каква реакција очекувате од Македонија?

- Останува да видиме, има уште многу нејасни околности. Мислам дека надлежните органи во Бугарија прво треба да одговорат на некои прашања.. “Илијана Јотова – претседател на Бугарија

Ива Михаилова беше една од темите и на средбата помеѓу министрите за надворешни Муцунски и Петрова – Чамова минатиот четврток и на таа средба било договорено бугарски лекари да дојдат во Македонија и да дадат мислење за здравствената состојба на Михаилова. Петрова Чамова денеска вели дека тие како институција немаат врска со потегот на обвинетата.

Случајот предизвика низа партиски реакции. СДСМ бара оставка од министерот Тошковски.

-Како излегла Михаилова од земјата ако ѝ се одземени двата пасоши, и бугарскиот и македонскиот? Границата не е решето само за дрога и за бегалци од правда. Со Мицкоски, Тошковски и ВМРО, границата е решето и кога судот ќе забрани. СДСМ повторно бара да се утврди како се случило и да се понесе одговорност. Бараме оставка, Тошковски да понесе одговорност. СДСМ.

Итна истрага бараат и од Демократски сојуз и од Левица. Се бараат одговори и за тоа каква улога имал адвокатот од Бугарија Николај Димитров.

Македонија

Ива Михаилова е во Бугарија, ама не се знае како заминала од Македонија

Пропуст на граничните служби или шверцување во „гепек“ - засега останува мистерија како обвинетата Ива Михаилова синоќа успеа да побегне во Бугарија.

МВР тврди дека по извршените проверки во системот за гранична контрола било утврдено дека Михаилова, која е на СТОП листата, нема евидентиран излез од територијата на Македонија, вакви проверки се направиле и во Бугарија и резултатот бил ист – легален влез нема.

Според она што е досега познато, Михаилова заминала од земјава заедно со нејзиниот бугарски адвокат Николај Димитров. Тие тврдат дека поминале на легален граничен премин, но не кажуваат на кој. Според неофицијални информации од МВР пак, што ги пренесе Слободен печат, легален излез од земјава имал само адвокатот кој бил автомобил заедно со уште едно машко лице, додека Михаилова не била забележана на заедното седиште.

-Јас имам лична карта во мене, со неа минав, и бугарска и македонска лична карта. Која лична карта ја покажа вчера на граница? Бугарската, а на македонската, македонската лична карта,- Ива Михаилова – Обвинета.

-Преку граничен контролен пункт, си извадивме документи и поминавме, на луѓето од македонска страна им беше потполно јасно дека тоа е Ива Михаилова и никој ништо не ни кажа и тргнавме. Министерството за надворешни работи не е должно да знае, министерството си работи по дипломатски пат, нашиот пат не е многу дипломатски, но во случајот требаше да се дејствува по овој начин. Ќе има ли последици? Нема поголеми последици од тоа да биде без адекватно лечење,- Николај Димитров – Адвокат на Ива Михаилова.

Како Михаилова влегла во Бугарија не знат ниту бугарскиот министер за внатрешни работи Демерџиев, но најави дека ќе и доделат и обезбедување на Михаилова..

-Ќе бидат преземени дејствија да биде извршен распит и да се види, кога, каде и како ја поминала границата и сите други околности, и дали има потреба од нејзино обезбедување, и ако има, ќе биде обезбедена,- Иван Демерџиев – Министер за внатрешни на Бугарија.

Од македонското обвинителство соопштија дека Ива Михајлова од Кочани, која е обвинета во судска постапка за сообраќајна несреќа со смртни последици, пред една година ѝ биле одземени два пасоша, македонски и бугарски, и ѝ била изречена забрана да го напушта градот во кој живее со обврска да се јавува кај службено лице.

За надзорот задолжено било ОВР Кочани, а како незабелажана од никого избегала, допрва ќе треба да се утврдува.

-МВР изврши проверки во системот за гранична контрола, при што е утврдено дека за лицето Ива Михајлова, за кое е во сила активна судска забрана, не е евидентиран излез од територијата на Македонија. Дополнително, преку Заедничкиот контакт-центар со Република Бугарија извршени се проверки и од страна на бугарската гранична полицијам од каде што е добиена информација дека за наведеното лице нема евидентиран легален влез на територијата на Р. Бугарија,- Гоце Андреевски – Портпарол на МВР.

Затекнат од бегството на Михаилова е и нејзиниот адвокат од Македонија – Насер Рауфи, кој уверува дека немал сознанија за ваквата постапка. Следното рочиште е на 9ти ноември, кое вели ќе се одвива нормално.

-Јас се затекнав со ова да ти кажам, баш ми е гром од ведро небо. Што се однесува за мои сознанија за ова нешто, ниту бев консултиран, ниту бев запознаен со такво нешто, тоа го дознав и јас дури преку медиуми. Јас не знам на кој начин заминала, навистина, меѓутоа судењето е закажано за деветти ноевмри, ќе се одвива нормално,- Рауфи – Адвокат на Ива Михаилова.

Но, дали Михаилова некогаш воопшто ќе се врати во Македонија, останува непознато..

Ова не е прв пат член на семејството Михаилови избега од Македонија пред да се соочи со правдата. Во Бугарија избега и нејзиниот татко, Симеон Михаилов, кој е осуден на 12 и пол години затвор во случајот „Детонатор“ за обид за убиство, насилство и злосторничко здружување.