Конфликтот од Косово кој траше од 1999тата година индиректно се прелеа во земјава. Токму во месец август 2001вата година се случија најдраматичните настани во поновата македонска историја.

Земјата беше на граница на крвава граѓанска војна. Сепак, со директно посредништво на САД, ЕУ и НАТО, преговорите меѓу лидерите на политичките партии вродија со плод и беше потпишан Охридскиот рамковен договор, со кој државата доби нов устав, а оружјето се стиша...

Преговорите околу договорот почнаа во Скопје и веднаш загалвија. Потоа продолжија во Охрид, каде завршија со парафирање на документот.

Во претседателската вила документот го потпишаа тогашниот претседател на државата Борис Трајковски, тогашниот премиер и лидер на ВМРО-ДПМНЕ Љубчо Георгиевски и лидерите на СДСМ Бранко Црвенковски, на ДПА Арбен Џафери и на ПДП Имер Имери. Во својство на гаранти, потпис ставија и специјалните претставници на ЕУ и на САД Франсоа Леотар и Џејмс Пердју.

Охридскиот договор беше дочекан на „нож“, а најсилно позади него застана претседателот Борис Трајковски, кој во секоја прилика го бранеше.

Инаку, над 130 закони се сменија поради имплeментацијата на Охридскиот рамковен договор, од кои најголем дел се закони за недискриминација и правична застапеност, понатаму во сферата на идентитетот, културата, образованието и децентрализацијата на власта.