Османи го претстави проектот „Чаир за сите деца“ - Канал 5

Македонија

Османи го претстави проектот „Чаир за сите деца“

„Ќе има и адаптација на јавните институции и училиштата во Чаир“

Османи го претстави проектот „Чаир за сите деца“

Денес сме собрани тука по една посебна причина, за вашите деца. Знам дека секојдневно се соочувате со предизвици кои не се лесни: од обезбедувањето соодветна терапија, до наоѓањето поддршка во училиштата, па се до можноста тие да имаат еднакви шанси во општеството. Затоа, денес не доаѓам со празни зборови, туку со визија и конкретен план. Со овие зборови го започна својот говор кандидатот за Општина Чаир од Националната алијанса за интеграција, Бујар Османи, на средбата со родителите на децата со попречености, каде што вети отворање на Дневен центар за деца со посебни потреби.

„Едно место каде вашите деца ќе добиваат дефектолошка, логопедска и психолошка поддршка, но и место каде ќе се чувствуваат прифатени и сакани. Центарот нема да биде само институција, туку и втор дом, со активности кои ќе ги развиваат нивните таленти и способности. За вас, родителите, ќе обезбедиме советување и стручна поддршка, бидејќи знаеме дека грижата за дете со попреченост е грижа за целото семејство. Ќе создадеме фонд за финансиска помош, преку кој ќе се покрива дел од трошоците за лекови, терапии и специјални помагала. Вие нема да останете сами во оваа борба“, изјави Османи.

„Ќе го направиме Чаир една поинаква општина“, продолжи Османи, „со лифтови, училишта и игралишта достапни за сите, затоа што движењето и пристапот не смеат да бидат привилегија, туку право на секое дете.“

„Исто така, ќе работиме на уривање на бариерите во општеството. Децата со посебни потреби ќе учествуваат во спортски, културни и забавни активности заедно со своите врсници. Инклузијата е вистинскиот пат кон здраво и силно заедништво. Моја визија е Чаир да биде општина без бариери, општина каде секое дете ќе има еднакви можности да расте, да учи и да се развива. Вие и вашите деца сте во срцето на мојата програма, и јас ќе бидам тука со вас и по изборите, кога ќе треба оваа визија да ја претвориме во реалност“, нагласи Османи, претставувајќи го проектот „Чаир за сите деца; Инклузија и Поддршка“.

„Бесплатни дефектолошки, логопедски и психолошки третмани за децата чии семејства немаат финансиски можности. Психо-физички и едукативни активности за развојот на децата. Професионална грижа и постојана поддршка за родителите. Општината ќе обезбеди опремен и адаптиран простор (училници, терапевтски сали и пристапно игралиште) во рок од 12 месеци. Организација на културни, спортски и забавни активности, во кои децата со посебни потреби ќе учествуваат заедно со своите врсници, рушејќи бариери и предрасуди“, рече Османи, не заборавајќи ја поддршката и за родителите.

„Редовни советувалишта и работилници за родителите (правна помош, психолошка поддршка, информации за правата и бенефициите, групи за поддршка). Организација на настани и активности на важни меѓународни датуми (како 2 април, Светскиот ден на аутизмот, 3 декември, Денот на лицата со попреченост), со цел подигање на јавната свест и вклучување на заедницата. Ќе има и финансиска поддршка за семејствата. Општината ќе формира фонд за финансиска поддршка, преку кој делумно ќе се покриваат трошоците за лекови, терапии и специјални помагала (инвалидски колички, слушни апарати, ортопедски помагала). Средствата ќе се распределуваат транспарентно и правично.“

„Ќе има и адаптација на јавните институции и училиштата во Чаир“, додаде Османи, „за тие да бидат достапни за сите деца.“

ДУИ

Тагови: Османи

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Култура

Смеење до солзи со „Секстет“ на НУ Народен театар Битола на годинешното издание на фестивалот „Денови на комедијата“

На сцената на НУЦК „Трајко Прокопиев“ – Куманово вчеравечер одекна силен и долг аплауз за екипата на НУ Народен театар Битола, која со својата изведба повторно ја воодушеви и ја насмеа до солзи публиката која ја исполни салата до последното столче.

Смеење до солзи со „Секстет“ на НУ Народен театар Битола на годинешното издание на фестивалот „Денови на комедијата“

„Секстет“ и овојпат покажа дека добрата комедија не познава граници – се игра, се чувствува и се споделува со публиката.

„Од срце му благодариме на организаторот на фестивалот „Денови на комедијата“ за поканата, прекрасното добредојде и гостопримството. До следната средба – со уште многу смеа, аплаузи и театарски моменти“, истакнуваат од Битолскиот театар.

Претставата „Секстет“ секогаш го полни гледалиштето до последното место, комедијата од Марк Камолети, во режија на Марјан Георгиевски, па така и овојпат салата беше исполнета со публика која ги награди актерите на Битолскиот театар со долготрајни аплаузи.

Недоразбирања, тајни, љубовни заплети и урнебесни пресврти секогаш ја тераат публиката да се смее од почеток до крај.

Зошто комедија? Затоа што премногу долго сме сериозни.

Живееме во време на прегласни информации и постојани кризи.

Научивме како да бидеме загрижени, заборавивме да се смееме. Во претставата играат: Бернар -Николче Пројчевски, Жаклина-Катерина Аневска Дранговска, Роберт -Александар Димитровски, Сузан-Сандра Грибовска Илиевска, Сузет -Анастасија Чипуровска, Џорџ-Борче Ѓаковски.

Костимографијата е на Андреј Георгиевски, сценографијата на Влатко Чачоровски, музика -Александар Димовски.

29.издание на Фестивалот оваа година се одржува од 23 септември до 5 октомври. Во текот на фестивалските денови, публиката има можност да проследи театарски претстави исполнети со хумор, квалитетна актерска игра и препознатлива фестивалска атмосфера преку изведба на театрите од Македонија и земјите од регионот. Фестивалот ќе биде затворен со претстава надвор од конкуренција, посветена на годинашниот лауреат Игор Џамбазов. Фестивалот е поддржан од Министерството за култура и туризам и од Општина Куманово.

Тагови: Денови на комедијата

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

Јанев на Меморијалниот турнир „Загинати бранители 2001–2015“: Македонија ги памети своите херои, нивната жртва е наша трајна обврска

Директорот на Бирото за јавна безбедност Александар Јанев денеска се обрати на Централниот меморијален турнир во мал фудбал во чест на загинатите бранители 2001–2015, кој се одржува во спортскиот центар „Борис Трајковски“. 

Јанев на Меморијалниот турнир „Загинати бранители 2001–2015“: Македонија ги памети своите херои, нивната жртва е наша трајна обврска

На настанот се обрати и министерот за одбрана Владо Мисајловски, кој го отвори Меморијалниот турнир.

Пред членовите на семејствата на загинатите бранители, претставниците на Здружението „Херои на Македонија 2001–2015“, колегите и натпреварувачите, директорот Јанев истакна дека турнирот веќе 24 години ја чува жива меморијата за оние кои ги положија своите животи за Македонија, нејзиниот мир и безбедноста на граѓаните.

„Денес не сме тука само поради традицијата. Тука сме затоа што имаме обврска да паметиме. Да ги паметиме нашите колеги, пријатели, браќа, сопрузи, татковци и синови кои ја носеа униформата со чест и кои, извршувајќи ја својата должност, ја дадоа најголемата жртва што човек може да ја даде. Нивните имиња не се само дел од историјата на нашите безбедносни сили. Тие се дел од историјата на Македонија“, истакна Јанев.

Тој нагласи дека обврска на денешните генерации е споменот за загинатите бранители да се пренесува и на генерациите што доаѓаат, потсетувајќи дека слободата, мирот и безбедноста не треба да се земаат здраво за готово. Посебна почит им оддаде на семејствата на загинатите, нагласувајќи дека институциите имаат обврска да покажат дека жртвата на нивните најблиски никогаш нема да биде заборавена.

Министерот за одбрана Владо Мисајловски истакна дека мора да се чува споменот за оние кои го дале својот живот за татковината и да се пренесе на следните генерации.

„Она што треба да го направиме е да се сплотиме и да покажеме дека хероите не се забораваат. Се заблагодарувам на секој еден припадник на Армијата, сите што ја носат униформата кои секојдневно работат за нашата држава. Министерството за одбрана ќе биде секогаш тука да помогне и достојно да покаже почит кон хероите“, истакна министерот Мисајловски.

На крајот, директорот Јанев изрази благодарност до Здружението „Херои на Македонија 2001–2015“, Министерството за внатрешни работи и сите кои веќе 24 години ја одржуваат оваа традиција, порачувајќи дека хероите живеат сè додека ги паметиме и дека им должиме да ги паметиме со гордост, достоинство и благодарност.

Тагови: Александар Јанев

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

ВЛЕН: Брисел позитивно ги оцени реформите, земјата доби 140 милиони евра од Планот за раст

ВЛЕН ја поздравува позитивната оценка на претседателката на Европската комисија, Урсула фон дер Лајен, за напредокот во спроведувањето на Планот за раст.

ВЛЕН: Брисел позитивно ги оцени реформите, земјата доби 140 милиони евра од Планот за раст

За време на посетата во Скопје, таа го оцени постигнатиот напредок како импресивен и најави нови исплати во наредните недели. Северна Македонија досега доби 140 милиони евра од овој план.

Овие средства се резултат на сериозната работа и посветеноста на институциите во исполнувањето на преземените обврски.

Министерството за европски прашања, предводено од првиот вицепремиер Беким Сали, го координира спроведувањето на Реформската агенда и го следи исполнувањето на обврските на институции.

За нас, оваа оценка е дополнителен поттик да продолжиме со работата и навреме да ги исполниме следните обврски.

Ги поздравуваме заложбите на Брисел за деблокирање на европскиот пат на земјата и очекуваме да се надминат пречките за земјата да напредува во преговорите со Европската Унија.

ВЛЕН

Тагови: ВЛЕН

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

притисни ентер