Реакцијата следува откако во емисијата „КОД“ беа објавени цели семејни и партиски стебла на вработени лица. Најмногу од вработените кои беа објавени доаѓаат или се блиски до функционери.

-Бујар Османи вработил сестра, Артан Груби снаа, Ејуп Алими, екс-пратеник од ДУИ две снаи и син, Беким Незири, притворен како предводник на групата тепачи вработил внук. Јавноста памети дека од 2018 алармираме за партиски вработувања во М-НАВ за син на директор на социјалните фондови, внук на директор на телекомуникациски оператор, Ветон Кадри, син на претеничката Шпреса Кадри, Антонио Кочовски, зет на тогашниот прв човек на СДСМ од Охрид, Лазе Таневски, роднина на екс-министерот Сугаревски, за претседател на УО на М-НАВ беше поставен Николче Тасевски, зет на екс-министерката Рената Десковска.

Премиерот Димитар Ковачевски вели дека вработувањето роднини на функционери во државните институции е карактеристика на општествата во транзицијата и такви се сите држави кои поминале низ транзиција. Вели дека М-НАВ е само една од таквите инситуции, но верува дека доаѓа време кога професионализмот ќе биде клучен при вработување.

-Гледам дека министрите кои имале некои роднини вработено веќе си даваат свои ставови, јас не можам да бидам портпарол на семејства на други луѓе, нит сум претендирал нешто такво да бидам. Таа тема ако се отвори, тогаш ќе треба да проверите и во Академија на судии, кој се станува судија и обвинител, па ќе треба да видите по министерства, таму имаше на времето еден министер, сега е многу гласен, тој дури и бебиситерката си ја запосли во МНР, што му го чуваше детето.

Меѓу функционерите, кој има роднини вработени во М-НАВ е и министерот за земјоделство Љупчо Николовски. Тој уверува дека неговиот чичко и внук работат таму по заслуга и дека тој не влијаел од поранешната позиција вицепремиер за борба против корупција.

-Чичко ми работи пред јас да бидам роден, зарем вие мислите дека некој што не е роден може да влијае на некој што стручно се усовршувал, работел и се вработил пред 83та, и тоа ви е најбитната тема .И второ, знаете за каков кадар станува збор? За највисоко стручно посветен кадар, школуван во Јапонија, во Кина и во Словенија кој после 20 години се вратил во земјата и секој од нас треба да се бори да ги задржи младите тука,- - Љупчо Николовски – Министер за земјоделство.

Темата за роднински и партиски вработувања ја отвори премиерот Ковачевски кој по иницидентот со упадот во М-НАВ кажа дека треба да се провери целокупното работење на иституцијата, бидејќи, како што рече се претворила во семејна компанија во која работат до трето колено од едно семејство, тогаш посочувајќи на првиот синдикалец Александар Тасевски. Како се вработувало во М-НАВ сега проверува трудовата инспекција, а нејзиниот извештај е најавен за десетина дена.