Омикрон присутен во 77 земји, во Македонија засега не е забележан - Канал 5

Здравје

Омикрон присутен во 77 земји, во Македонија засега не е забележан

 Омикрон-сојот се шири исклучително брзо и досега е забележан во 77 земји. Во Македонија сè уште не е регистриран случај на новиот сој, а состојбата со коронавирусот засега е стабилна.

Омикрон присутен во 77 земји, во Македонија засега не е забележан

И во светот и кај нас остануваат клучните препораки за заштита и за вакцинација, иако Светската здравствена организација укажа дека вакцините би можеле да бидат помалку ефикасни против инфекции и трансмисии поврзани со омикрон-варијантата на коронавирусот, која има поголема способност за реинфекција. За заштита од новиот сој, СЗО препорачува покрај вакцинацијата да се преземат и санитарни мерки, како лична хигиена, носење маски, проветрување.

Претседателката на Европската комисија, Урсула фон дер Лајен очекува Омикрон да стане доминантна варијанта во Европската Унија до средината на јануари и оти се подготвени да се борат со зголемена вакцинација.

Таа информираше дека досега повеќе од 300 милиони Европејци или 66,6 отсто од популацијата на ЕУ се целосно имунизирани против Ковид-19, а 62 милиони веќе примиле засилена доза од вакцината. ЕК ќе почне и со онлајн информативни кампањи, со цел да ги убеди луѓето да се вакцинираат.

Заклучно со 14 декември во Северна Македонија вакцинирани се 838.987 граѓани, ревакцинирани се 810.990, а трета доза примиле 86.266 граѓани. Вкупно аплицирани се 1.736.243 дози вакцини.

– Опфатот со вакцинација со две дози на полнолетната популација е 48 проценти, а 57 отсто од граѓаните над 40 годишна возраст се ревакцинирани. Податоците покажуваат дека 22 проценти од вакцинираните граѓани постари од 60 години примиле трета доза вакцина, а опфатот со една доза вакцина на полнолетната популација е 50 проценти, информира Министерството за здравство.

На последната седница на Владата, беше донесена одлука за набавка на вакцини против коронавирусот за 2022 година, со која е утврдена потребата од набавка на 500.000 дози на мРНА (мРНК) вакцини од производителот „Фајзер", во кои ќе бидат вклучени и педијатриските дози во количина од еден отсто од вкупниот број деца во земјава на возраст од 5 до 12 години, односно околу 10.000 дози.

На вчерашната прес-конференција портпаролот на Владата, Душко Арсовски информираше дека вакцинацијата на малолетните лица ќе се одвива со задолжително присуство на родител или старател. Бидејќи вакцини ќе има во доволна количина, нема да има приоритет според возраст, хронични заболувања или критична структура.

– Во однос на дозите, десет илјади дози од оваа педијатриска вакцина од „Фајзер" се иницијална количина што не значи дека ако има интерес нема да се набават дополнителни дози. Вакцинацијата е важно да се укаже дека се одвива без закажан термин. Значи, единствен услов за вакцинација на малолетните лица е задолжително да дојдат со родител или со старател и важно е граѓаните да знаат дека и со оваа одлука вакцини за КОВИД-19 ќе има во доволна количина, дека нема приоретизирање според возраста, хронични заболувања или критична структура, појасни Арсовски.

Во претходното деноноќие во земјава беа регистрирани нови 326 случаи на Ковид-19, а починаа осум лица.

Бројот на активни случаи изнесува 5498, најмногу во Скопје 2647, а потоа следуваат Битола со 447 и Прилеп со 363, а без ниту еден активен случај е само Дебар.

Досега во земјава се направени вкупно 1.509.665 тестирања на Ковид-19. Вкупната бројка на КОВИД-дијагностицирани лица од почетокот на епидемијата изнесува 220.169, оздравени се 206.903, а починаа 7768.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Свет

Потврдено е: Си на средба со Трамп

 Кина потврди дека претседателот Си Џинпинг ќе оствари државна посета на Соединетите Држави, соопшти кинеското Министерство за надворешни работи. 

Потврдено е: Си на средба со Трамп

Кинескиот лидер ќе престојува во САД од 23 до 25 септември, на покана на американскиот претседател Доналд Трамп.

Првиот човек на САД, Трамп го покани Си во Белата куќа на 24 септември, за време на неговата посета на Пекинг во средината на мај.

Оваа посета ќе биде прва посета на Си Џинпинг на САД од 2023 година, кога тој отпатува во Калифорнија за состанокот на форумот за Азиско-пацифичка економска соработка (APEC) и се сретна со тогашниот американски претседател Џо Бајден.

Тагови: Доналд Трамп Си Џинпинг

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

Отворен повик за 2027: Македонија2025 продолжува со Програмата за извршно образование Зафировски

Нова можност за македонските бизнис-лидери за усовршување на Келог школата за менаџмент.

Отворен повик за 2027: Македонија2025 продолжува со Програмата за извршно образование Зафировски

Македонија2025 го отвори повикот за стипендии во рамки на Програмата за извршно образование - Зафировски за 2027 година, наменет за искусни македонски менаџери, претприемачи и бизнис-лидери кои сакаат да ги унапредат своите лидерски и раководни способности преку образование на една од најпознатите светски школи за менаџмент.

Избраните кандидати ќе имаат можност да учествуваат на Програмата за развој на извршни раководители (Executive development program) на Келог школата за менаџмент при Нортвестерн универзитетот во САД.

Од започнувањето на Програмата за извршно образование Зафировски во 2017 година, досега 51 македонски професионалец успешно ја има завршено програмата и се приклучи на заедницата на Зафировски стипендисти. Во периодот од 11 до 30 октомври 2026 година, на Келог ќе замине и нова група од седум истакнати македонски професионалци, со што програмата продолжува да ја проширува мрежата на лидери и да вложува во развојот на македонската деловна заедница.

Програмата се реализира со поддршка на Фондацијата Робин и Мајк Зафировски, во партнерство со Келог школата за менаџмент. Нејзината долгорочна цел е да придонесе кон создавање силна заедница на македонски лидери кои стекнатото меѓународно знаење, искуство и контакти ќе ги преточат во развој на своите компании, индустрии и македонската економија. Мајк Зафировски, еден од основачите на Македонија2025 и покровител на програмата, од нејзиното основање активно придонесува кон остварување на визијата за развој на 100 македонски бизнис-лидери преку врвно меѓународно образование.

Интензивна програма за искусни лидери

Програмата на Келог е интензивна тринеделна програма наменета за искусни менаџери и раководители кои се подготвуваат за пошироки лидерски и стратешки одговорности. Наставата опфаќа клучни области од современото деловно работење, меѓу кои стратегија, финансии, маркетинг, операции, управување со луѓе, иновации, дигитална трансформација, податоци и вештачка интелигенција, преговарање, комуникација и водење организации низ промени и сложени деловни предизвици.

Особена вредност на програмата е можноста учесниците да учат и да разменуваат искуства со раководители и претприемачи од различни земји и индустрии, како и да изградат меѓународна професионална мрежа која продолжува и по завршувањето на програмата.

За 2027 година се предвидени две сесии: 2 – 21 мај 2027 година и од 10 – 29 октомври 2027 година. Двете сесии ќе се одржат со физичко присуство во кампусите на Келог во Еванстон и Чикаго, САД.

Кој може да аплицира?

Повикот е наменет за искусни македонски менаџери, раководители на повисоки позиции, претприемачи и сопственици на компании кои имаат значајно професионално искуство, потенцијал за понатамошен лидерски развој и амбиција да создадат пошироко влијание во своите организации и во македонската економија.

Кандидатите треба да имаат најмалку 10 години релевантно професионално искуство, добро познавање на англискиот јазик, поддршка од компанијата во која работат и можност целосно да се посветат на програмата.

Покрај учеството на програмата на Келог, избраните стипендисти ќе работат и на индивидуални и групни проекти поврзани со конкретни деловни или општествени предизвици во Македонија, со цел стекнатото знаење да добие практична примена и поширока вредност.

Следната генерација македонски лидери

Со отворањето на повикот за 2027 година, Македонија2025 продолжува да вложува во луѓе кои имаат амбиција, искуство и потенцијал да направат значаен исчекор во својата професионална кариера и да придонесат кон развојот на Македонија.

Повикот е можност за оние професионалци кои се подготвени да излезат од рамките на секојдневното управување, да ги преиспитаат своите досегашни пристапи, да стекнат нови знаења и перспективи и да станат дел од силна заедница на македонски лидери со меѓународно искуство.

Рокот за поднесување апликации е 20 октомври 2026 година.

Сите информации за условите, критериумите и начинот на пријавување се достапни на: https://macedonia2025.com/en/news/zafirovski-executive-education-program-open-call-scholarships

За повеќе информации: Нена Манчев, [email protected]

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Свет

Хутите предупредуваат земјите да не се приклучуваат кон Саудиска Арабија во обновената граѓанска војна во Јемен

Висок функционер на бунтовниците Хути , поддржани од Иран, ги предупредува земјите да не се приклучуваат кон Саудиска Арабија во обновената граѓанска војна во Јемен.

Хутите предупредуваат земјите да не се приклучуваат кон Саудиска Арабија во обновената граѓанска војна во Јемен

Висок функционер на бунтовниците Хути , поддржани од Иран, ги предупредува земјите да не се приклучуваат кон Саудиска Арабија во обновената граѓанска војна во Јемен, посочувајќи дека неговата група ја уверила администрацијата на трамп дека нема да нападне американски бродови во црвеното море,информираше Асошиејтед прес.

Мохамед Ал-Бухаити, член на политичкото биро на Хутите, рече дека Вашингтон им се обратил на бунтовниците по нивното брзо напредување по западниот брег на Јемен до теснецот Баб Ел-Мандеб претходно овој месец.

Трамп минатиот викенд изјави дека неговата администрација „имала разговори“ : „Хутите нè повикаа и не сакаат да се борат со нас“, рече тој.

„Тие би претпочитале да не бидеме вклучени, а ги пуштаат повеќето бродови да поминат“.

Асошиејтед прес објави дека оман бил домаќин на состанок меѓу претставници на САД и Хутите минатиот викенд, повикувајќи се на официјален претставник на Хутите . Со тоа завршија еднонеделните американски бомбардирања против бунтовниците, во замена за прекин на нападите врз американските бродови во Црвеното море.

„Целта на нашите воени операции не е да се затвори теснецот Баб Ел-Мандеб, туку да се обезбеди слобода на пловидба низ него за сите, вклучително и за јемен“, рече претставникот на Хутите.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

притисни ентер