Олимписката шампионка Томас: Ме демнат неколку лица, се плашам и не знам каде да одам

Трикратната олимписка шампионка во атлетски спринт-трки Габриела Томас тврди дека ја демне група мажи.

- Ми треба совет во моментов бидејќи се плашам дека ме следат и посматраат. Навистина не знам што да правам или кај кого да одам. Секогаш кога патувам, се плашам да не се појават овие мажи - три до шест, средовечни. Не е важно во кој град одам, тие се појавуваат. Така беше кога летав за Чикаго и назад, тие дојдоа и кога летав за Мајами и назад. Имаат информации за секој мој лет. Се појавуваат или на главниот влез на аеродромот во десната сала, или на мојот излез, што значи дека имаат авионски карти и минуваат низ обезбедувањето. Во неколку наврати ми пријдоа и побараа да потпишам еден куп мои фотографии, околу 40. Не знам што прават со нив, можеби ги продаваат, не ми е гајле, изјави Томас.

Атлетичарката не може да си објасни кој на „посматрачите“ им дават информации за нејзиното движење.

- Она што ме плаши е тоа што ги имаат моите информации за летот иако понекогаш ниту самата јас не знам во колку часот заминувам. Никому не ги кажувам информациите за моите летови. Ги сменив сите мои лозинки за е-пошта. Не знам дали ме хакираат. Тие стануваат многу агресивни и непријателски настроени ако кажам не, а кога сум сама е навистина страшно. Вчера беа многу непријателски расположени кон моето момче Спенсер МекМејнс, објави атлетичарката.

Габриел Томас е трикратна олимписка шампионка во спринт. На Олимписките игри во Париз минатата година, таа победи на 200 метри и штафета на 4х100 и 4х400 метри како дел од тимот на САД.

ОМД Шведска свечено го одбележа своето официјално отворање и 20-годишнината на ОМД

Со голема гордост објавуваме дека Обединетата Македонска Дијаспора – Шведска (ОМД Шведска) организираше свечена гала вечер по повод официјалното отворање на нашата организација во Шведска и одбележувањето на 20-годишнината на ОМД на глобално ниво.

Со голема гордост објавуваме дека Обединетата Македонска Дијаспора – Шведска (ОМД Шведска) организираше свечена гала вечер по повод официјалното отворање на нашата организација во Шведска и одбележувањето на 20-годишнината на ОМД на глобално ниво. Овој настан претставува историски момент за македонската заедница во Шведска и значаен чекор кон зацврстување на нашата посветеност на обединување, зачувување и унапредување на македонската култура и наследство.

Минатата година го започнавме формирањето на ОМД Шведска, а благодарение на основачкиот одбор – Мирјана Наумоска, Антонијо Трпевски, Трајче Цветановски, Габриела Јакимова, Пеце Релушковски и Александра Гарбеска – како и останатите активни членови, успешно ги поставивме темелите на новото македонско движење во Шведска. Нашата мисија е да ги обединиме Македонците и пријателите на Македонија, да ги зајакнеме врските меѓу двете земји и да создадеме платформа која ќе ги поддржи македонските организации, здруженија и професионални заедници.

Од особено значење е и партнерството што го градиме со цел промоција на македонските бизниси и професионални достигнувања на Македонците во Шведска и пошироко во Скандинавија.

Свечената гала вечер се одржа во присуство на истакнати претставници од македонската и шведската заедница, кои со своето присуство ја потврдија важноста на ОМД во зачувувањето и промоцијата на македонската култура, традиција и историја.

Настанот беше отворен од страна на претседателката на ОМД Шведска и Ко-основач, Мирјана Наумоска и Директорот на ОМД за Македонија и Европа, Гордан Јорданов, како и свои обраќања во виртуелна форма имаа и Почесниот Претседател и Ко-основач на ОМД Методија А. Колоски и Потпретседателот за Глобални Операции и Член на Бордот Стојан Николов. Особена чест ни беше да имаме поздравно обраќање од Амбасадорот на Република Македонија во Кралството Шведска, г-дин. Џенк Сејфула, кој беше дридружен од заменикот шеф на мисијата, г.-дин Стојанче Китаноски. Меѓу присутните беа и претставници од македонските здруженија и институции, вклучувајќи ја претседателката на Македонскиот Сојуз, Гордана Крклинска и претседателот на КСД Македонија, Златко Кршоски.

Гостите имаа можност да се запознаат со извонредни поединци кои несебично придонесуваат за македонската заедница, како што се г-ѓа Елизабета Дамева, библиотекар и волонтер која ја обнови македонската библиотека во Трелеборг и Катерина Бачевска, позната флејтистка активна во Стокхолм. Присутни беа и претставници на друштвото „Св. Јован“ од Стокхолм и Малме, како и администраторите на онлајн групата „Македонски Амбасадори во Шведска“ – Ивана Ристова и Благица Дамева, која брои околу 7000 членови.

Настанот беше збогатен со извонредни уметнички и музички настапи од Андријана Арлен (пијано), Миланка Новеска Густавсон (оперска пејачка), Бјонко Стошиќ Петерсен (кларинет), Зоран Јањиќ (гитара), како и музичарите на „Ритам Бенд“ – Горан Петровски, Михајло Пановски и Александар Павлевски. Специјална благодарност упатуваме и до модераторот на вечерта, Даниела Цветановски, како и до Детската фолклорна група при МПЦО „Св. Наум Охридски“ – Малме.

Голема благодарност и до нашите спонзори – „Винарија Тиквеш“ за поддршката со вина, како и „Lambes Blommor“, во сопственост на Славица Ламбе, за прекрасната цветна декорација на настанот.

ОМД Шведска веќе реализираше повеќе проекти и иницијативи со значајно влијание во македонската заедница, како што се донации за македонската библиотека во Трелеборг, мебел за деца, книги и поддршка за културни проекти. Посебно се гордееме со поддршката за групата „Дениција“, која настапи во шведскиот парламент по повод Денот на независноста на Македонија.

Во иднина, нашата визија вклучува организирање дополнителни социјални и културни настани, зајакнување на соработката со други македонски организации и промовирање на позитивен јавен дискурс за Македонија и Македонците во Шведска.

Оваа Гала вечер беше само почеток. ОМД Шведска ќе продолжи со реализација на проекти што ја негуваат македонската култура, ги обединуваат нашите луѓе и ја зајакнуваат соработката со Македонија. Нашата работа не би била возможна без вашата поддршка, затоа ве охрабруваме да се приклучите на оваа мисија – со донации и активно учество. Заедно можеме да направиме разлика и да изградиме светла иднина за следните генерации Македонци во Шведска, Скандинавија и ширум светот."

Обединета Македонска Дијаспора

Од денеска двосменско работење на дел од отсеците за управни работи при МВР

Министерството за внатрешни работи информира дека од денеска Отсеците за управни работи при Одделот за граѓански работи на МВР ќе работат согласно ново работно време. 

Одделението за управни работи Скопје и Отсек за управни работи Тетово, од понеделник до петок ќе имаат двосменско работење, односно работно време од 7:30 часот до 19:30 часот.

И Отсеците за управни работи - Битола, Велес, Куманово, Охрид, Струмица и Штип, од понеделник до петок ќе имаат работното време со почеток од 8:00 часот па до 18:00 часот, а истото работно време ќе важи и за: ОУР Битола за Прилеп, ОУР Велес за Кавадарци, ОУР Охрид за Кичево и Струга, ОУР Тетово за Гостивар и ОУР Штип за Кочани.

Во останатите подрачни единици - ОУР Охрид за Дебар, ОУР Битола за Крушево, за Демир Хисар, за Ресен и за Македонски Брод, ОУР Штип за Пробиштип, за Свети Николе, за Виница, за Делчево и за Берово, ОУР Велес за Неготино, ОУР Куманово за Кратово и за Крива Паланка, ОУР Струмица за Гевгелија, за Радовиш и за Валандово, работното време ќе трае од 8:00 часот до 16:00 часот.

Неформален состанок на Советот на ЕУ во Варшава

Во Варшава денеска се одржува неформален состанок на Советот за општи работи на ЕУ, на кој ќе се разговара за хибридните закани со кои се соочуваат земјите-членки на ЕУ и партнерите што се стремат да влезат во ЕУ.

На состанокот се очекува да се разговара и за зајакнувањето на европската цивилна и воена подготвеност и повеќегодишната финансиска рамка (ВФО) на Унијата за периодот по 2027 година.

„Бидејќи проширувањето е приоритет за Европската унија, сигурна сум дека тоа ќе биде многу добро разгледано во следниот ВФО“, изјави еврокомесарката за проширување Марта Кос по пристигнувањето на состанокот.

притисни ентер