Предметната обвинителка од ОЈО ГОКК – Искра Хаџи Василева на денешниот брифинг пак посочи дека ваквата одбрана не ги убедила ниту изгледа кредибилна наспроти она што го имаат како докази. Потеклото на парите допрва треба да се утврди, бидејќи засега не се знае дали се од предмети кои ги водел судијата Ристов, но Хаџи Василева посочи дека обвинителството работи со бројните сведоци и докази.

-Одбраната која беше дадена обвинителството не го убеди, ниту изгледа кредибилна наспроти она што го имаме како докази. Не не’ убеди дека се чувани и дека се од земјоделие. Ќе видиме, може ќе покаже документ со доказ дека грозјето му било плаќано со банкноти од по 500 евра. Во моментов нема конкретен доказ дека овие пари ги примил судијата, ќе видиме што ќе донесе истрагата, а во моментов во тек е и финансиска истрага. – кажа обвинителката Искра Хаџи Василева

Спротивно на обвинителството, адвокатот на Ристов стои позади кажаното на неговиот клиент во обвинителството и пред судот. А, според него, членот според кој се гони, не може да се однесува на суди.

Истрагата обвинителството ја водело речиси една година во која имало бројни индиции дека постоело тргување со влијание, меѓудругото, од пораки меѓу затвореници до сведоци кои им пристапиле со пријави за судии во апелација, вели Хаџи Ристова. Контурите на предметот почнале да се исцртуваат по апсењето на адвокатот Фехми Стафа, кога станало јасно дека се кој беше фатен со обележани пари, кои наводно биле за подмитување на апелационен судија. Откако станало јасно дека се бараат кеш пари, започнале и претресите, од кои два биле во домот на родителите на Ристов во Неготино, а во првиот наврат била пронајдена свежа дупка во бетон.

-Се обидовме повторно во Неготино, со дополнителна опрема. Прашавме дали е нешто реновирано, ни одговорија дека не е ништо правено. Имаше индиции дека во едно место има понов цемент, поразлични плочки, а и на тропкање даваше поразличен звук.. Бидејќи прописите не обврзуваат да не кршиме и растуриме, се обидовме што поелегантно, но при мало кршење, се пјави дупка, а во десниот дел од истата беа парите. Целата акција беше извршена пред сведоци, пред членови од семејството.

Во меѓувреме се огласија и од Здружението на судии... Бараат темелна истрага и евентуално откривање на други инволвирани лица, но пред се апелираат да не се генерализира случајот во случај на докажана корупција, оти како што велат, не се сите судии исти, мнозинството посочуваат се чесни.

-Во случај на докажана корупција, Здружението на судии јасно и недвосмислено се оградува од секој корумпиран судија или носител на судска функција кој со своето незаконско постапување го нарушува угледот и интегритетот на судскиот систем. Таквите појави не смеат и не треба да се поврзуваат со судиите кои чесно, професионално и одговорно ја извршуваат својата функција, а кои претставуваат огромно мнозинство во судството. Во таа насока, Здружението бара целосно почитување и заштита на угледот и достоинството на чесните судии, како и воздржаност од генерализации кои дополнително ја поткопуваат довербата на граѓаните во правосудниот систем – Здружение на Судии

За судијата Ристов биле применети сите механизми да се превенира евентуално бегство, иако немало ПИ мерки. А, ефективен притвор не бил побаран оти во моментот на барање на мерките бил на боледување.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.