Во продолжени објавата ја пренесуваме интегрално, а повеќе на оваа тема очекувајте во вторник на Канал 5 телевизија.

„Честито дискриминација: Прекин на работен однос поради бременост и мајчинство

Вака се "пошегувавме" со еден драг пријател дента кога ја примив одлуката од Комисијата за спречување и заштита од дискриминација, денес и јавно објавена, со којашто се утврдува дека прекинот на работниот однос од страна на мојот претходен работодавач е исклучиво од дискриминаторна природа. Истата година кога добив награда за исклучителни академски достигнувања, по завршени докторски студии - ова не го пишувам за да си ја истакнам квалификацијата туку за да посочам дека ваквиот вознемирувачки третман е присутен дури и онаму каде што дејноста е од јавен интерес и подразбира оформување на идни кадри во професија во која интегритетот е и формален услов за нејзино практикување.

Она што јас го преживеав во осмиот месец од бременоста не сакам да го доживее ниту една жена, а богами ниту еден маж - во улога на сопруг, татко, иден татко. Токму затоа и ја покренав постапката, иако се сомневам дека ќе влијае врз "искусниот дискриминатор" кому ова му е трето вакво поведение поради што и квалификаторно е уште потешка - повторена дискриминација. Да напоменам дека воопшто ме немаат контактирано за постапување по одлуката што налага компензација за материјалната и нематеријална штета, како и извинување.

Јас денес, сепак, сум неизмерно среќна благодарение на Бога пред сè, со поддршка од семејството, пријателите и гинеколошкиот тим, да ја држам во раце мојата ќерка. Ние двете ја добивме најтешката битка - за жал, неодамна во јавноста слушнавме за случаи кои завршиле фатално и искрено сочувствувам со нив. Допрва ни следи правна и егзистенцијална битка, но верувам дека ќе победиме, како што и покрај сè (наивно) верувам во правдата.

Инаку, го имам достигнато фамозниот h фактор на цитираност 3 и ги исполнувам сите услови за избор во звање и според новиот предлог ЗВО - но како што континуирано се уверуваме во МКД квалитетот не се наградува туку - и буквално и фигуративно, се брка!“- стои во објавата.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.