Откако на фејсбук Здружението на граѓани „16 Март Кочани“ објави соопштение во кое се наведува дека Премиерот на средбата им рекол на родителите „да си одредат цена за своите деца“ , од Владата велат дека злоупотребата на болката не носи правда, како и дека сведување на дискусијата на ниво „колку чини“ не само што не ја одразува вистинската дискусија и намера, туку е навредливо и се обидува да фрли сосема погрешно светло на владините постапки.

-Владата жали за впечатокот кој некои го добиле, но тие средби досега не се ни први, а ни последни и апелираме да не се прави сензација од средба наменета за поддршка и сочувство. Тоа беше втора средба со семејствата и ние би потсетиле дека премиерот за време на средбата од почетокот и до крајот разговараше и се поздрави изразувајќи сочувство со сите присутни поединечно и низа други гестови и иницијативи и работи кои од етички и човечки причини навистина не сакаме да бидат предмет на јавна дискусија затоа што се интимни и длабоко приватни и ние тоа сакаме да го почитуваме.-ВЛАДА.

Од Владата велат дека се тука за семејствата, за сè што им е потребно и секогаш ќе бидат со нив „дури и кога за некои работи ќе имаат различни мислења“. Апелираат да не се злоупотребуваат овие настани и моменти и да не се суди врз база на гнев и тенденција.

Претходно, родителите на децата кои загинаа во пожарот во кочанската дискотека „Пулс“, во обраќање преку Фејсбук страницата на Здружението на граѓани „16 Март 2025 Кочани“ го обвинија премиерот дека длабоко ги навредил на состанок. Според нив, освен што ги поздравил со „Здраво! Како сте?“, кога го разгледувал барањето за еднократна парична помош за душевна болка, премиерот им рекол: „Ова барање е исто како предлогот на СДСМ, само што вие немате ставено цена. Одредете си цена за вашите деца“.

На почетокот на месецов родителите испратиле барање и до претседателката Гордана Сиљановска-Давкова и претседателот на Собранието, Африм Гаши. Со премиерот се сретнале на 7 јули во Скопје, иако инсистирале средбата да се одржи во Кочани, затоа што од Кабинетот им било одговорено дека тоа не е можно од безбедносни причини.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.