Имено, оваа актерка прогонот на Евреите од страна на нацистите го поистоветила со актуелната политичка клима со која се соочуваат републиканците.

„Евреите беа тепани на улиците, не од нацистите, туку од нивните соседи... дури и децата. Според тоа како се уредува историјата, повеќето луѓе денес не сфаќаат дека да дојде до тоа, нацистите лесно да соберат илјадници Евреи, владата прво морала да дозволи нивните соседи да ги мразат само затоа што биле Евреи. По што се разликува ова од омразата кон некои поради нивните политички ставови“? – пишувало во објавата што таа ја споделила.

Истиот ден, Лукасфилм, продуцентската компанија која стои зад серијата, како и UTA, агенцијата за таленти што ја застапувала речиси две години, престанале да соработуваат со неа. Во својата изјава, застапникот на Лукасфилм изјавил дека „нејзините објави на социјалните мрежи кои ги омаловажуваат луѓето врз основа на нивниот културен и верски идентитет се гнасни и неприфатливи“.

Сепак Карано поднела тужба против Лукасфилм, која е финансирана од Илон Маск, кој, пак, на својата платформа „X“, упати отворен повик до другите да се приклучат на тужбата. Карано бара отштета од 75.000 долари и бара од судот да го принуди Лукасфилм повторно да ја ангажира. Но, оваа актерка не е единствената што неодамна доби отказ поради своите политички ставови.

Случајот на Милош Биковиќ и Сара Рамирез

Слично нешто му се случи и на српскиот актер Милош Биковиќ. Имено, откако HBO објави дека Биковиќ ќе глуми во третата сезона на хит серијата „Белиот лотос“, Министерство за надворешни работи на Украина јавно се пожали за неговиот ангажман.

„HBO, дали е во ред да соработувате со личност која поддржува геноцид и го прекршува меѓународното право? Министерството се обрати до сервисот за стриминг на Х, а актерот набргу беше отпуштен и на негово место дојде Јулијан Костов, но HBO сепак ќе му го исплати на Биковиќ целиот хонорар.

„Ми беше чест што бев избран за „Белиот лотос“, ТВ серија што ја ценам и во која глумат колеги кои длабоко ги почитувам. Сепак, моето учество не е можно од причини надвор од доменот на уметноста и нема да се приклонам кон ниту еден наратив што настојува да ми го загрози интегритетот“, порача Биковиќ.

Нивната судбина ја дели и Сара Рамирез, која минатиот месец беше отпуштена од серијата „И тукутака“(And just like that“), нуспродукт на Сексот и градот. Имено, на 16. јануари таа во објава на Инстаграм тврдеше дека „директорите и агентите прават црна листа на актери и филмски работници кои објавуваат што било во знак на поддршка на Палестинците и Газа, за да бидат уверени дека повеќе нема да работат“, инсинуирајќи дека актерката е отпуштена поради нејзините пропалестински ставови.

Меѓутоа, Дејли Мејл пишуваше дека извори блиски до продукцијата се сомневаат во тоа, посочувајќи дека нејзиниот лик, Че Дијаз, се сметал за ужасно досаден и дека гледачите веројатно би биле благодарни што е тивко отстранет. Сепак, тврдењата на актерката не се без преседан.

Сузан Сарандон и Мелиса Барера отпуштени поради „антисемитски коментари“

Актерката Сузан Сарандон е на удар на критики од почетокот на израелско-палестинскиот конфликт поради тврдењата дека Евреите сега „знаат како е да се биде муслиман“. Сарандон присуствуваше на серија пропалестински митинзи во Њујорк, каде што се придружи на скандирањата „Од реката до морето“, воен крик што го користеа пропалестинските активисти и Хамас, а многумина ова го нарекоа антисемитски повик за уништување на Израел.

„Во ова време има многу луѓе кои се плашат да бидат Евреи и чувствуваат како е да се биде муслиман во оваа земја“, рече актерката на протестите. Таа, исто така, беше мета на критики на Интернет поради ретвитување на објави на Х, во кои отворено се слави фронтменот на Пинк Флојд, Роџер Вотерс, кој со години беше обвинуван за антисемитизам.

Сарандон го истакна настапот на Вотерс во Уругвај на „Х“ и ретвитна објава во која се вели: „И покрај обидите на израелското лоби да го откаже настанот, Роџер Вотерс од Пинк Флојд излезе на сцената во Уругвај со кефија на главата и повика за прекин на израелскиот геноцид во Газа“.

Мелиса Барера, главната ѕвезда на петтиот и шестиот дел од франшизата Врисок, која требаше да се појави и во претстојниот седми дел, беше отпуштена од продуцентската куќа Спајглас Медиа Груп поради наводните антисемитски коментари.

„Имаме нулта стапка на толеранција за антисемитизам или поттикнување омраза во која било форма, што вклучува лажни референци за геноцид, етничко чистење, искривување на информациите за Холокаустот и сè што ги надминува очигледните граници на говорот на омраза“, изјави портпаролот на оваа продукциска куќа.

По терористичките напади на Хамас на 7. октомври и израелскиот одговор на тие напади, Барера во своите објави на социјалните мрежи за конфликтот помеѓу Израел и Палестина сподели објава во која го обвинува Израел за „геноцид и еничко чистење“. Исто така сподели и објава од списанието Еврејско движење (Jewish Currents) за „искривување на информациите за Холокаустот со цел поттикнување на израелската индустрија за оружје“.

Соочување со „несоодветните“ политички ставови во иднина

Иако постои огромна разлика помеѓу изразувањето поддршка на луѓето кои беа бомбардирани и споредувањето на Холивуд со нацистичка Германија, желбата да се отпушти секој што предизвикува контроверзии со своите политички коментари покажува одредено ниво на нервоза во забавната индустрија.

Ставовите што доведоа до отпуштање на Биковиќ и Рамирез ги ставија раководните лица во тешка ситуација, помеѓу одржувањето на континуитетот на нивните серии и соочувањето со бесот за правда на коментаторите на социјалните мрежи, но овој принцип би можел да создаде спротивен ефект.

Во најлош случај, овие отпуштања помагаат да се создадат маченици, па така Карано стана само погласна откако беше отпуштена, пишувајќи тиради против шефицата на Лукасфилм, Кетлин Кенеди и давајќи изјави дека била замолчувана од „тоталитарната мафија“. Овие отпуштања, исто така, ги потврдуваат ставовите на оние што веруваат дека холивудската индустрија функционира како хомоген ентитет кој го отфрла секој оној чиишто вредности не се во согласност со консензусот.

Исходот од тужбата поднесена од Карано може да промени некои работи во забавната индустрија. Имено, ако судијата пресуди дека таа не требало да биде отпуштена поради нејзините убедувања, постојат шанси Рамирез, Биковиќ, Сарандон или кој било друг отпуштен поради своите политички ставови да покрене слична тужба и да побара од судот да биде вратен во неговата серија.

Иако големо прашање е кој би сакал да работи на место на кое колегите веќе еднаш јавно се откажале од него.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.