Со Мицкоски странските инвестиции во Македонија паднаа на само 18 милиони евра во вториот квартал од 2026 година, од просечни 200 до 250 и повеќе милиони евра по квартал во 2024 година, нагласи претседателот на СДСМ, д-р Венко Филипче, во интервјуто во емисијата „Само интервју“ на Канал 5. Филипче посочи дека податоците за странските инвестиции се директен показател за последиците од лошите економски политики на власта на ВМРО.

„Во 2024 година рекордна година, имаше 1 милијарда евра странски инвестиции, или квартално во просек 200 до 250 и повеќе милиони евра во текот на цела 2024 година, како резултат на кумулативните добри економски политики на нашата влада на СДСМ. Во 2025 година се 247 милиони евра, значи 750 милиони евра помалку странски инвестиции. Па како ќе работи економијата? Вториот квартал во 2026 година значи од години кога сме имале по во просек 250 милиони евра странски инвестиции, овој квартал благодарение на економските политики на Христијан Мицкоски и Гордана Кочовска само 18 милиони евра странски инвестции.“ рече Филипче.

Тој нагласи дека не станува збор за мало намалување, туку за драматична разлика во однос на нивото на инвестиции што се бележеше претходно, посочувајќи дека кварталниот просек од околу 250 милиони евра сега е сведен на 18 милиони евра.

„Значи не биле 20 милиони па да се намалат на 18 или 50 или 60 или 100 милиони. Биле 250 милиони евра, втор квартал 2026 годна 18 милиони евра.Еве толку од успешните политики на оваа Влада, останавме без странски инвестиции“ рече Филипче.

Филипче укажа дека блокираниот европски пат има и директни економски последици, особено врз интересот на странските инвеститори и можностите за развој на бизнисите.

„Затоа што поради несигурноста на регионот, поради вакви изолационистички политики на Мицкоски не сакаат странските инвеститори да дојдат. Затоа паѓаат странските инвестиции“ рече Филипче.

Говорејќи за економската состојба и нивото на странски инвестиции, Филипче потенцираше дека состојбата со странските инвестиции и со другите економски показатели е последица на неодговорните и лоши политики на Владата на ВМРО. Тој посочи дека власта манипулира со податоците, додека реалноста што ја живеат гаѓаните поразителна. Во тој контекст Филипче како пример го посочи нивото на бруто-домашниот производ, за што нагласи дека растот на БДП не може да се гледа изолирано од растот на цените и личната потрошувачка.

„Знаете зашто расте бруто домашниот производ? Затоа што две третини од структурата на бруто домашниот производ е личната потрошувачка и бруто-домашниот производ расте меѓу другото поради тоа што е се поскапено. Затоа расте БДП, и од еден единствен голем проект кој што добро функционира, а тоа е Бехтел и Енка за кој што Мицкоски кажуваше дека е голем криминал. Да потсетам зашто не го прекина ако беше толку голем криминал?“ рече Филипче.

Дупката во ПИОМ е удвоена и достигнува една милијарда евра, рече претседателот на СДСМ, Венко Филипче, во „Само интервју“ на Канал 5, посочувајќи дека состојбата со пензискиот фонд е показател за лошото управување со јавните финансии.

„Еве како се имаа пари во буџетот. Прво во буџетот за пензиско инвалидско осигурување. Колку е дупката? Во 2021, 22, 23, дупката во фондот била 500 милиони евра. 2024 година од 530 милиони евра, 2025 година од 690 милиони евра. 2026 година, годинава, проекција, една милијарда евра. Значи, дуплирана дупката во пензискиот фонд. Наместо 500 милиони евра, сега треба од некое друго место, државата да најде милијарда евра за пензионери да си ги земаат пензиите. Дупката во фондот и дефицитот, кој што е дуплиран од 500 на милијарда евро, е сè поголем, покрај тоа што 1% од придонесите е трансфериран и е зголемен придонесот во пензиското осигурување. Државата постепено пропаѓа и ќе остане без пари“, рече претседателот на СДСМ.

Филипче посочи и на линеарното зголемување на пензиите, за кое рече дека е неправеден систем потенцирајќи дека пензионерите со последните покачувања од 1.000 денари се украдени од власта.

СДСМ

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Со состанокот ќе претседава претседателот на Воениот комитет на НАТО, адмирал Џузепе Каво Драгоне. На настанот ќе присуствуваат и врховниот командант на Сојузничките сили за Европа, генерал Алексус Г. Гринкевич, како и врховниот командант на Сојузничките сили за трансформација, адмирал Пјер Вандие.

Началниците на Генералштабовите на сите земји членки ќе разговараат за актуелните безбедносни предизвици и стратешки прашања од значење за Алијансата, со посебен фокус на спроведувањето на заклучоците од Самитот на НАТО во Анкара.

Воениот комитет се состанува на ниво на началници на Генералштабови двапати годишно во седиштето на НАТО во Брисел. Дополнително, еднаш годишно една од сојузничките земји е домаќин на Годишната конференција на Воениот комитет, која годинава се одржува во Данска.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Во Хрватска годинава се пријавени петнаесет случаи на инфекција со вирусот на Западен Нил, кај десет лица со симптоми се развила невроинвазивна форма на болеста и било потребно болничко лекување, според податоците на Хрватскиот институт за јавно здравје (HZJZ).

Не се регистрирани смртни случаи, додека пет од пријавените случаи биле асимптоматски. Заклучно со 4 септември, Хрватскиот институт за јавно здравје имал регистрирано 10 инфекции, кои опфаќаа шест хоспитализирани пациенти и четири асимптоматски случаи.

Оттогаш се пријавени уште пет случаи, а бројот на хоспитализирани пациенти се зголеми од шест на десет. Сите лица кај кои се појавиле симптоми имаат невроинвазивна форма на болеста, што значи дека инфекцијата го зафатила централниот нервен систем.

Ова може да се манифестира како менингитис, енцефалитис или други тешки невролошки состојби. Повеќето од заболените се постари мажи, шема за која Хрватскиот институт за јавно здравје забележува дека е типична за оваа инфекција. Институтот не објави детална статистика според возраста и полот со цел да се заштити приватноста на пациентите.

Сите пет асимптоматски инфекции се откриени кај доброволни дарители на крв. Еден од овие случаи е регистриран по 4 септември.

Тестирањето на дарителите на крв овозможува откривање на инфекции кај поединци кои не покажуваат симптоми – мерка што се спроведува за заштита на примателите на крвни продукти.

Досега, инфекции се пријавени во градот Загреб и во окрузите: Загреб, Крапина-Загорје, Осиек-Барања и Копривница-Крижевци. И покрај порастот на пријавените случаи, Хрватскиот институт за јавно здравје (HZJZ) продолжува да ја оценува епидемиолошката состојба како вообичаена за овој период од годината. Тие исто така ја истакнуваат изразената сезонска варијабилност на инфекциите со вирусот на Западен Нил.

Институтот очекува појава на нови случаи во наредниот период, во зависност од временските услови што влијаат врз активноста на комарците.

Вирусот на Западен Нил првенствено се пренесува преку каснување од заразен комарец. Повеќето инфекции се асимптоматски, додека невроинвазивните форми на болеста се ретки и почесто се јавуваат кај постари лица и кај лица со хронични заболувања.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.