- Буџетот за 2016 година на Министерството за култура изнесува 3,8 милјарди денари и во однос на минатата година е зголемен за 5,22 проценти. Програмските средства за 2016 година изнесуваат 864.999.000 денари. Министерството за култура продолжува со активностите за обезбедување на интензивен културен развој, збогатување на културната понуда во нашата држава, унапредување на статусот на авторите и уметниците, подобрување на условите во кои тие работат и творат, стимулација на творештвото, рамномерен развој на сите дејности, негување на вредностите на сите етнички заедници кои живеат во Република Македонија, афирмација на македонската култура во меѓународен контекст, соопшти Министертвото за култура.

Во рамките на годишната програма за 2016 година, во музичко-сценската дејност се поддржани 237 проекти од национален интерес, меѓу кои и меѓународни манифестации од музичко-сценски карактер. Во институциите, што е од огромна важност, ќе се реализираат повеќе значајни премиерни изведби, меѓу кои и поставувањето на премиерата „Онегин“, јубилејна претстава на примабалерината Александра Мијалкова, премиерните изведби на оперите „Севилскиот бербер“ и „Турандот“, потоа јубилејниот гала-оперски концерт „50 години уметничка дејност на диригентот Томислав Шопов“, балетската премиера на „Црвената соба - смртта и девојката“, балетската обнова на „Снежана и седумте џуџиња“, гостувања на Операта и Балетот во центрите за култура низ државата, симфониски концерти на Македонската Филхармонија во Скопје и другите градови во Република Македонија и многу други активности.

Поддржани се музички проекти и концертни претставувања на домашните музичари и камерни состави во Центрите за култура во Струмица, Струга, Битола, Гостивар, Прилеп, Дебар, Кичево, Делчево, Неготино, Кочани, Охрид, Штип, Куманово и Тетово. На локално ниво, во рамки на локалните установи поддржани се проекти во програмите на Домовите за култура во Демир Капија, Кавадарци, Св. Николе и Ново Село како и активностите на јавните установи Младински културен центар и Културно информативен центар кои традиционално ќе ги реализираат манифестациите „Види музика-слушни слика-добиј книга, „Звуците на чаршијата“ која годинава одбележува десет годишен јубилеј, како и бројни концерти на млади надежни музичари и концерти по повод јубилеи од концертната дејност на веќе истакнати музички уметници. Концерти ќе реализираат светските реномираните пијанисти Симон Трпчески и Елена Мисиркова, обоиската Гордана Јосифова Неделковска...

Оваа година поддржани се концертни случувања и проекти по повод одбележување на други значајни јубилеи како 50 години од постоењето на Факултетот за музичка уметност“ во Скопје, Јубилеј 10 години Божикни свечености ,,Божик-Слава" на хорскиот состав ,,Св. Злата Мегленска" итн. Продолжува интензивирањето на културниот живот преку поддршка на културните манифестации „Културно лето“ и „Културна зима“ во општините Крушево, Берово, Дојран и Преспанскиот регион, како и манифестацијата „Топол културен бран“ со кои овозможуваме поттикнување на локалниот културен развој и збогатување на културната понуда во општините низ Република Македонија. Во 2016 година Министерството за култура ќе ја финансира и програмата на фестивалите, најголемиот интернационален настан во нашата држава, Охридско лето, фестивалите Мајски оперски вечери, Скопски џез фестивал, Деновите на македонската музика, Танц фест, Интерфест, Макфест, Валандово.
Што се однесува до визуелната уметност, во 2016 година во националните установи ќе се реализираат квалитетни проекти и изложби, меѓу кои и претставување на светски познатиот автор Демјан Хрст, која ќе се реализира во соработка со Британскиот совет во РМ, додека пак во МКЦ ќе биде поставена и изложба на графики на Пабло Пикасо, како и дела на претставниците на американскиот поп арт, Енди Ворхол, Рој Лихтенштајн и други.

Исто предвидени се ликовни претставувања на Кристина Пулејкова, добитничка на наградата на 11. Биенале на млади, ретроспективни изложби на реномирани автори како Петар Хаџи Бошков, Спасе Куноски, Вангел Наумовски и други значајни творци. Ќе биде презентирана и ретроспективно-монографска изложба „25 години творештво на современиот уметник Решат Амети“ која ќе биде поставена во МАНУ, како и изложби на Игор Тошевски, Славица Јанашлиева, Жарко Башевски, како и монографско-тематска изложба на Никола Мартиноски. МКЦ со поддршка на Министерството за култура ќе организира изложби на Касиопеја Наумовска, Милчо Манчевски и Димитар Манев.

Што се однесува до издавачката дејност, во 2016 година ќе бидат публикувани исклучително вредни дела кои имаат големо значење за македонската култура и наука. Со поддршка на Министерството за култура ќе се издадат и 12 книги за значајни археолошки локалитети во Македонија, јубилејни монографски изданија по повод 70 години Драмски театар и 10 години од постоењето на меѓународниот театарски фестивал Скупи. Ќе се издадат и монографии за творештвото на Есма Реџепова, Вељо Ташовски, Никола Мартиноски, Спасе Куновски, како и монографски изданија на албански јазик „Тетово низ стари фотографии со исторсики осврт“ и многу други значајни дела. Во 2016 дела ќе се преведат повеќе изданија на реномирани автори како Матеја Матевски, Ристо Лазаров, Блаже Миневски, Цветан Грозданов, Луан Старова, Венко Андоновски, како и 12 значајни дела од Хенри Кисинџер, кој е добитник на Нобелова награда за мир. Поддржани се и 33 проекти наменети за деца и млади, како и дела од млади автори и други литературни жанрови - драма, балет, стрип, научно истражувачки проекти, филм, историја, филозофија, лексикографски изданија и друго.

Во драмската дејност во текот на 2016 година ќе се реализираат големи театарски спектакли кои ќе внесат нова свежина во репертарот на националните театари во Република Македонија. Министерството за култура поддржа 125 проекти од драмската дејност, од кои 76 претстави од професионалната продукција, 26 фестивали и манифестации и 22 аматерски претстави. Македонската публика ќе има можност да погледне крупни и многу значајни театарски претстави на сцената на НУ МНТ меѓу кои се: проектот за егзодусот на децата бегалци од граѓанската војна 1946-1949 во Легнице, Полска, во режија на Јацег Гломб, авторскиот проект „Соларис“ на Андриј Жолдак, претставите на големите режисерски имиња како Александар Морфов, Томаж Пандур, Галин Стоев како и Андреј Цветановски. Во Драмскиот театар ќе режираат Лилиа Абаџиева, Љубиша Георгиевски, Дејан Пројковски, Сашо Миленковски, Наташа Поплавска, Димче Николовски. Во Битолскиот театар ќе гостуваат Диего де Бреа, Александар Баргман, Андраш Урбан. Свои претстави пред публиката ќе презентираат и: Дино Мустафиќ, Али Волкан Четинкаја, Димитар Еленов, Љубиша Георгиевски, Дејан Пројковски, Боњо Лунгов, Љупчо Ѓорѓиевски, Миха Голоб, Коле Ангеловски, Наташа Поплавска, Ѕвезда Ангеловска, Софија Ристевска, Деан Дамјановски, Куштрим Бектеши, Ќендрим Ријани...

Во независната продукција се поддржа реализација на 18 претстави кои ќе се изведат по драмски текстови од домашните автори: Златко Славенски, Срѓан Јанаќијевиќ, Едмонд Сотир, Тихомир Стојановски, Маријана Котевска, Васил Димески, како и од странските драмски автори: Молиер, Данил Хармс, Хајнрих Фон Клајст, Енда Волш, Миро Гавран, Јетон Незирај, Албатрос Реџај. Застапени се режисерите: Мартин Кочовски, Златко Славенски, Васил Христов, Софија Ристевска, Теа Беговска, Димче Николовски, Тихомир Стојановски, Бесфорт Идризи, Ибраим Деари, Нехат Мемети, Агим Сопи, Ќазмедин Нуредини, Елиона Томарај... Продолжува поддршката за 26 реномирани театарски фестивали кои ќе презентираат богата програма, меѓу кои се Млад отворен театар, Македонскиот театарски фестивал „Војдан Чернодрински“, МНТ Фест, Битола Шекспир фестивал, Фестивалот на комедијата во општина Аеродром, театарскиот фестивал во Тетово и други, а за прв пат ќе се реализира и манифестацијата „Европски ден на еврејската култура“. И годинава театрите предвидено е да имаат бројни гостувања во Република Македонија во рамките на театарските фестивали и разни културно-уметнички манифестации како што се: „Топол културен бран“, „Град на култура“, „Скопско лето“...

Заштитата на културното наследство кое го поседуваме како држава како и неговата промоција во домашни и меѓународни рамки и во 2016 година останува врвен приоритет на Владата и Министерството за култура. Продолжува обновата и конзервација на повеќе фасади низ Македонија, санацијата на споменикот на Илинден, конзевраторските активности на манастирскиот комплекс Св. Архангел Михаил во Берово, заштитата на црквата „Св. Ѓорѓија“ во преспанското село Курбиново, заштитата на вредните фрескоживописи во црквата Св. Ѓорѓи во Струга, адаптацијата на објектот Јени џамија во Битола во современ галериски простори, непосредната заштита на црквата „Св. Илија“ во Стар Дојран, конзервацијата и санацијата на црквата „Св. Никола“ во с. Манастир, Мариово и многу други проекти. Продолжуваат и активностите на повеќегодишниот проект за воспоставување постојани поставки во националните музеи од сите области: археологија, историја, историја на уметност, етнологија, современа уметност и природонаука, како и проектот за адаптација на депоата во музејските установи низ земјава.

Меѓународната соработка и оваа година ќе биде високо позиционирана во приоритетите на Министерството за култура, кое поддржа бројни активности за меѓународна промоција на македонската култура на светските сцени. Повторно ќе бидеме присутни на чествувањето на оставнината на просветителите Кирил и Методиј во Рим, на Биеналето за архитектура во Венеција, на манифестацијата „Вроцлав европска престолнина на културата“. Македонската книжевност ќе биде презентирана на меѓународните саеми на книгата во Париз, Франкфурт, Истанбул. Со поддршка на Министерството за култура во 2016 година ќе се реализираат и бројни значајни гостувања на македонските театри во странство во Полска, Санкт Петербург, Санта Барбара, Израел, Србија, Австралија, Франција, Турција, Словенија, Романија, Бразил. Од останатите активности кои се дел од Годишната програма на Министерството за култура , претставата „14 часа“ ќе гостува во Берлин, Операта во Лече, Италија, Македонската филхармонија во Виена, Австрија и многу други активности.

Од покрупните проекти кои се наоѓаат во Програмата на Владата, во 2016 година стартуваме со постапките за изградба на уште два нови објекти од областа на културата, односно нови објекти за Драмскиот театар и објект на Театарот Комедија. Истовремено во првата половина на 2016 година ќе се распише јавна набавка за избор на изведувач за изградба на Конгресниот центар во Скопје, а ќе се изработи и потребната документација за надградба и реконструкција на објектот за националните установи во Охрид. Сето ова практично значи продолжување на континуитетот на инвестицискиот циклус во културата и градење нови објекти во оваа област. /МИА

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.