Здравје

Новиот ковид бран не ги поштеди и најмалите

Бебе родено пред само 20-тина дена е најмладиот ковид позитивен пациент во Институтот за белодробни заболувања „Козле“.

Тоа сепак е во стабилна состојба и е добро, велат оттаму. Заедно со него тука поради ковид заедно со своите родители лежат дваесетина дечиња, но за разлика од претходните бранови, сега на ниту едно не му е потребна кислородна поддршка поради полесната клиничка слика. Д-р Елена Ѓиновска Тасевска вели во текот на претходните недели на преглед дневно доаѓале по околу 80 деца, а речиси сите биле заразени, но сега бројот на дечиња што бараат здравствена помош во „Козле“ е драстично намален.

Само десетина деца досега се јавиле на лекар тука со пост-ковид компликации, како стомачна болка и проблеми со крвната слика, но освен едно кое морало пак да биде хоспитализирано, другите доаѓаат само на контрола, што значи дека доминантниот сој на корона кој се шири сега не остава сериозни проблеми за здравјето на најмалите. Во меѓувреме, во овој период не изостануваат стомачните вируси кај децата што по симптомите не се разликуваат од она што го дава омикрон вирусот, велат од Институтот „Козле“.

Според последниот извештај на Институтот за јавно здравје само околу 140 или 4 % од тестираните во текот на една недела се деца до 9 години, што пак претставува намалување од 22 отсто споредено со податоците од претходната седмица.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Култура

Импресивен концерт на Камерниот оркестар на НОБ и маестра Чадловска

За мене „Охридско лето“ е секогаш посебна свеченост. Овој фестивал го доживувам како свој, како да сум дома и секогаш ми е огромна чест кога доаѓам тука.

По неколкуте успешни гостувања на одлични солисти и ансамбли со различна жанровска програма за кои публиката покажа голем интерес, синоќа репертоарот на класична музика на 66. „Охридско лето“ повторно беше исполнет со импресивен настап на Камерниот оркестар на Националната Опера и Балет под диригентската палка на Бисера Чадловска и сопранот Наде Талевска која беше солист на вечерта.

Професионализмот и големиот креативен потенцијал на уметниците ги одразуваше не само нивните индивидуални квалитети, туку и префинетоста во заедничкото музицирање што беше видливо уште при првата композиција од репертоарот, меланхоличната мелодија „Хризантеми“ од Џакомо Пучини.

Диригентката Бисера Чадловска, како и секогаш, и овојпат покажа голема уметничка зрелост, креативност и енергичност.

-За мене „Охридско лето“ е секогаш посебна свеченост. Овој фестивал го доживувам како свој, како да сум дома и секогаш ми е огромна чест кога доаѓам тука. Изведовме неколку композитори, Џакомо Пучини, Бенџамин Бритн, Џовани Батиста Перголези, но и македонски автори како Ристо Аврамовски, Драган Шуплевски и Дамир Имери. Програмата беше специјално креирана за фестивалот „Охридско лето“, рече маестра Чадловска, која од 2022 до 2024 година беше и музички селектор на „Охридско лето“, а во 2021 година ја диригираше програмата на свеченото отворање на 61. издание на фестивалот.

Маестра Чадловска редовно диригира со Симфонискиот и Оперскиот оркестар во Националната опера и балет, но, како што кажа, првпат со Камерниот оркестар на најголемата национална установа од областа на културата во земјава.

Камерниот оркестар на Националната опера и балет е формиран во 2010 година и е составен од истакнати музичари и солисти на Оркестарот на НОБ. Во своето постоење настапувал на бројни сцени надвор од Македонија, а во својот репертоар секогаш отстапува голем простор за македонските композитори.

Тагови: Охридско лето

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Свет

Иран ги нападна Бахреин и Кувајт

Бахреин и Кувајт утринава соопштија дека биле цел на ирански напади со ракети и беспилотни летала.

Сирените за воздушна опасност беа активирани во Бахреин само неколку часа откако американската војска соопшти дека ја завршила тринаесеттата ноќ на напади врз Иран, објави Ал Џезира.

Кувајтската војска соопшти дека во текот на ноќта ја активирала противвоздушната одбрана за да се спротивстави на иранските напади со ракети и беспилотни летала.

Кувајт е една од неколкуте земји од Заливот кои се цел на ирански напади откако пред две недели повторно избија судири меѓу САД и Иран.

Тагови: Иран

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

Водата за пиење во Крушево бактериолошки неисправна

Центарот за јавно здравје Прилеп ги информираше граѓаните на Крушево дека водата од градскиот водовод е бактериолошки неисправна и не се препорачува за пиење.

До надминување на состојбата, жителите треба да користат пакувана вода за пиење. Водата од градскиот водовод може да се употребува за лична хигиена, подготовка на храна, перење и миење садови само доколку претходно се преврива најмалку 10 минути.

Од ЈП „Комуна“ Крушево информираат дека се врши редовно хлорирање на водата, како и секојдневна контрола на нивото на хлор во водоводниот систем.... Од таму велат дека препораките ќе останат во сила сè додека не се добијат три последователни исправни примероци од водата.

Тагови: вода Крушево

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.