Свет

Нови претреси во рамки на истрагата за перење пари против екс-еврокомесарот Рејндерс

Белгиските власти извршија претреси на неколку локации во рамки на истрагата за перење пари против поранешниот министер во повеќе влади на Белгија и еврокомесар за правда Дидие Рејндерс.

Рејндерс е под истрага врз основа на сомнежите дека „испрал“ пари со сомнително потекло, на тој начини што најчесто во готово купувал т.н. „е-билети“ за игри на среќа, чија вредност е помеѓу 1 и 100 евра и може да се набават на многу продажни места ширум Белгија, и потоа средствата од тие ваучери што легнувале на сметката намената за игри на среќа, биле префрлани на неговата лична трансакциска сметка. Според истражните органи, „сомнителни активности“ на Рејндерс започнале уште во времето кога бил белгиски министер и траеле до 2023 година.

Истрагата за овој случај беше обелоденета на почетокот на декември минатата година, само неколку дена откако Рејндерс ја напушти должноста еврокомесар, кога полицијата изврши претрес во неговиот дом во Брисел и во куќа во негова сопственост во местото Висул, што се наоѓа помеѓу градовите Лиеж и Намур. Рејндерс тогаш беше сослушан од полицијата во врска со случајот, но не беше лишен од слобода.

Властите започнале со истрагата откако биле утврдени „сомнителни трансакции на релативно големи сума“ пари на сметката на Рејндерс во „текот на подолг период“.

На барање на белгиското Јавно обвинителство, за „случајот Рејндерс“ одвоени извештаи подготвиле Националната лотарија и Централната единица за финансиски истраги (ЦФИ). Според извештајот на Националната лотарија, како што наведува весникот „Њузблад“, Рејндерс наводно „испрал“ околу 200.000 евра преку „е-билетите“ за игри на среќа во период од пет години. Извештајот на ЦФИ, пак, посочува дека на овој начин за околу десет години на сметката на Рејндерс легнале приближно 800.000 евра сомнителни средства.

За време на сослушувањето Рејндерс изјавил дека овие пари потекнуваат од „трговија со антиквитети“. Поради ова полицијата извршила претреси во домот трговецот со антиквитети Оливие Тенисен и во неговата антикварница во Брисел. Тенисен до пред неколку месеци бил судија во Трговскиот суд во Брисел, како и потпретседател на Кралската комора на антикварници и трговци со уметнички дела на Белгија.

Претрес е извршен во домот на Жан-Клод Фонтиноа близу Намур. Фонтиноа, кој е поранешен претседател на Одборот на директори на белгиската национална железница СНЦ и важи за човек од доверба на Рејндерс, наводно „речиси секојдневно“ купувал уметнички дела и антиквитети и тоа најчесто во антикварницата на Тенисен.

Рејндерс во 1999 година беше избран за белгиски министер за финансии, функција на која остана до 2011-та, кога ја презеде должноста шеф на дипломатијата што ја вршеше се до неговиот избор за еврокомесар во 2019 година. Дополнително од 2018 до 2019, тој беше и министер за одбрана на Белгија. Во периодот од 2007 до 2011 година, како министер за финансии, Рејндерс бил задолжен и за раководење со белгиската Национална лотарија, но според веникот „Соар“, делата за кои се сомничи биле извршени по овој период.

Експертот за даночен систем и универзитетски професор Мишел Мо во декември за Радио 1 изјави дека „е-картичките“ за игри на среќа често се користат за перење пари.

- Првото поглавје од курсот по „перење пари за почетници“ пропишува дека секој кој сака да испере „црни пари“ мора да им обезбеди легитимно потекло, изјави Мо, нагласувајќи дека банките подлежат на правила за перење пари и мора да го проверат потеклото на парите што се појавуваат на сметката на граѓаните, но дека тоа не важи и за лотариите.

Според Мо, оваа техника опфаќа делење на големи суми пари на помали износи, со цел префрлањето на средствата да не паѓа во очи, но ако се изврши проверка на трансакциите во подолг временски период може да се утврди дали постои нешто сомнително во целата постапка.

Истрагата против Рејндерс за овој случај започнала уште во 2023 година, но таа се држела во тајност се додека тој не ја напушти функцијата еврокомесар на 1 декември 2024 година.

Рејндерс се уште има имунитет и не може да биде лишен од слобода или судски гонет, но тоа не го спречува Обвинителството да покренува истраги против него. Доколку реши да започне правна постапка против Рејндерс, Обвинителството сепак ќе мора да побара од белгискиот Парламент да му го укине имунитетот.

Тагови: ЕУ перење

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Европа

Телефоните на германските министри и пратеници на удар на шпионски софтвер

Apple предупреди дека iPhone-ите на членовите на Бундестагот и членовите на федералната влада можеби биле цел на шпионски софтвер.

Германскиот министер за дигитална администрација, Карстен Вилдбергер, изјави дека Федералната канцеларија за информациска безбедност (BSI) им советувала на засегнатите да претпостават дека нивните уреди се компромитирани за секој случај, бидејќи предупредувањето не укажувало дали нападот бил успешен.

Според BSI, овој вид шпионски софтвер може да им даде на напаѓачите пристап до пораки, вклучително и оние испратени преку шифрирани апликации, како и повици, контакти, календари и податоци за локација. Исто така, може да го вклучи микрофонот и камерата на телефоните.

Вилдбергер изјави за ARD дека „добивме известување од Apple дека одредени уреди можеби биле компромитирани од таканаречен шпионски софтвер“, објави Euronews.

Предупредувањата до засегнатите телефони почнаа да пристигнуваат на 29 октомври, според BSI, и тие наведоа дека Apple го открил нападот користејќи „шпионски софтвер“. Министерот рече дека BSI „реагирала супер брзо“ и ги известила засегнатите, со упатства за заштита. Вилдбергер не кажа колку политичари биле предупредени или кои биле цел. Ниту „Епл“, ниту германските власти не кажаа кој би можел да стои зад нападот.

Тагови: телефоните софтвер

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Забава

Хајли Бибер во градник од пердуви и ангелски крилја за Ноќта на вештерките (ФОТО)

Хајли Бибер е позната по тоа што секоја година вложува дополнителен труд во своите костими за Ноќта на вештерките.

Во 2023 година, таа се маскира како викторијански вампир со крвави бисери и чипкаст корсет, а во 2024 година ги имитира Никол Ричи и Парис Хилтон од реалното шоу „Едноставен живот со Кендал Џенер“.

Минатата година, целото семејство учествуваше во костимирањето, па Хајли, нејзиниот сопруг Џастин и нивниот син Џек Блус се маскираа како ликови од анимираниот филм „Неверојатните“.

Хејли како ангел, Џастин како ѓавол

Оваа година, сопружниците се одлучија за заедничка тема за костими. На фотографиите што ги споделија на социјалните мрежи, Хајли позираше како ангел, а Џастин како ѓавол.

Основачката на брендот за убавина Rhode, која го објави својот костим неколку часа претходно на Инстаграм, носеше бел градник украсен со пердуви, бела кошула со копчиња и кратки црни шорцеви. Таа ја надополни комбинацијата со ореол, големи бели крилја што потсетуваа на оние од модната ревија на Victoria's Secret и црни чевли со високи потпетици. Меката, сјајна шминка дополнително го нагласи нејзиниот ангелски изглед.

Џастин, од друга страна, избра целосно црвена комбинација. Носеше преголема јакна, широки панталони со ѓаволски опашки и црвени патики од својата марка Skylrk. Костимот го надополни со црвена капа со рогови и очила за сонце во иста боја.

View this post on Instagram

A post shared by Hailey Rhode Bieber (@haileybieber)

Го покажаа и костимот на нивниот син Џек

Покрај заедничките фотографии, Хајли откри во својата приказна на Инстаграм како нивниот син Џек го поминал Ноќта на вештерките. Таа сподели фотографија од момче кое изгледало како да е преправено како дух додека шетало низ соседството барајќи бомбони.

Тагови: Хајли Бибер

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Европа

Швајцарија воведува ограничување на брзината на автопатиштата на 80 км/час- причината е недостиг на гориво

Швајцарија размислува за намалување на максималната брзина на своите автопати од 120 на само 80 км/ч, наведувајќи ги сè понеизвесните резерви на гориво.

Иако звучи како драстична одлука, властите во моментов ја разгледуваат оваа мерка исклучиво како одговор на евентуалниот сериозен недостиг на бензин и дизел.

Според швајцарскиот јавен радиодифузен сервис SRF, Федералната канцеларија за економски снабдувања веќе ја испитува можноста за привремени ограничувања на брзината, што треба да ја намали потрошувачката на гориво во случај на продлабочување на кризата.

Проблемот е предизвикан од комбинација на конфликтот на Блискиот Исток и тешкотиите во транспортот на нафтени производи. Ниското ниво на водата на Рајна сериозно го ограничи речниот сообраќај, кој инаку ја снабдува Швајцарија со значителни количини гориво, додека дополнителни тешкотии се забележани и на други транспортни правци.

Како резултат на тоа, швајцарските власти веќе почнаа повремено да користат задолжителни резерви на гориво. Сепак, ограничувањето од 80 км/ч би се вовело само ако се искористи значителен дел од резервите и доброволните заштеди не донесат резултати.

Логиката на оваа мерка е едноставна. При поголеми брзини, отпорот на воздухот се зголемува, а со тоа и потрошувачката на гориво. Намалувањето на ограничувањето на брзината од 120 на 80 км/ч би ја намалило потрошувачката на бензин и дизел, што би можело да помогне во зачувувањето на залихите на национално ниво.

Швајцарските власти нагласуваат дека снабдувањето во моментов е тешко, но дека засега нема драматичен недостиг. Затоа, ограничувањето на брзината од 120 км/ч останува на сила на автопатите, додека евентуалното воведување построги правила ќе зависи од понатамошниот развој на енергетската ситуација.

Тагови: гориво Швајцарија

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.