Средношколците Вања Георгиев и Јован Давков од ДСУ „Математичко-информатичка гимназија“ - Скопје, обединети под името „Тим Декси“ (Team Dexi), учествуваат во натпреварот „Средношколец милионер“ со својот иновативен проект „Дексиверз“ (Dexiverse). Неговата цел е да ги поврзе младите преку технологијата и нови знаења.

- Во време кога вештачката интелигенција станува неизбежен дел од секојдневието, а дигиталните алатки се множат со невидена брзина, новата платформа „Дексиверз“ се појавува како решение што му дава ред, насока и смисла на тој технолошки хаос. Нашиот проект е создаден со многу ентузијазам и љубопитност. Веруваме дека со креативност и тимска работа можеме да направиме вистинска разлика. Сакаме да инспирираме и други ученици да веруваат во своите идеи и да создаваат решенија кои го подобруваат секојдневието, изјави лидерот на тимот, Вања Георгиев.

Тој притоа истакна дека идејата произлегла од желбата да покажат како информатиката може да биде двигател на промени. Неговиот соученик Јован Давков рече дека поддршката од јавноста им значи повеќе од самиот натпревар.

- Секој глас за нас е поттик да продолжиме да создаваме и да се надградуваме. Токму ова е само почеток на нешто поголемо, додаде Давков.

Граѓаните можат да ги поддржат средношколците со свој глас тука.

„Дексиверз“ е првата централизирана платформа што ги обединува најпознатите ВИ алатки на едно место, нудејќи јасни насоки, практични примери и персонализирано искуство за секој корисник - без разлика на неговото претходно знаење или професија.

„Милиони луѓе денес сакаат да ја користат вештачката интелигенција, но се соочуваат со бројни пречки - нецелосни информации, нејасни упатства и ограничен пристап до најдобрите алатки. ‘Дексиверз’ го менува тоа преку интуитивен и транспарентен систем што го поврзува корисникот со најрелевантните ресурси и му овозможува лесен пат кон учење, примена и напредок. Наместо да бараме решенија на различни места, ‘Дексиверз’ ги обединува сите можности во една интелигентна средина каде што технологијата станува сојузник, а не предизвик“, подвлекуваат средношколците.

Платформата е создадена за сите што сакаат да го искористат потенцијалот на вештачката интелигенција - почетници кои првпат навлегуваат во овој свет, професионалци што сакаат да заштедат време и да ја зголемат продуктивноста, претприемачи кои бараат начини да интегрираат ВИ во своите проекти, но и креативци кои преку технологијата создаваат нови можности и извори на приход. „Дексиверз“ ги поврзува сите овие групи во една заедничка цел: Да се напредува со технологијата, а не да се биде заменет од неа.

„Во центарот на ова искуство стои ‘Декси’ (Dexi) - виртуелен асистент којшто ги води корисниците низ платформата и активно учи за нивните потреби и интереси. ‘Декси’ препорачува алатки, нуди совети и создава персонализирана патека низ светот на ВИ, приспособена на секој корисник. Паралелно со тоа, платформата вклучува каталог на ВИ модели поделени по категории - текст, слики, видео, бизнис решенија и многу други, за полесно и побрзо пронаоѓање на вистинската алатка за конкретна цел“, се наведува.

Она што го издвојува „Дексиверз“ од другите слични решенија е пристапот што оди подлабоко од обична листа апликации. Наместо само да покажува кои можности постојат, „Дексиверз“ ги учи луѓето како правилно да ја применат вештачката интелигенција во својата работа и секојдневие. Преку интерактивни туторијали, шаблони и практични примери, платформата овозможува корисниците веднаш да го претворат стекнатото знаење во реална примена. Со тоа, таа станува повеќе од колекција алатки - таа е интелигентен водич што го претвора учењето во искуство.

„Дексиверз“, се вели, е визија за дигитална иднина каде ВИ станува блиска, корисна и достапна. Платформа што ја претвора сложеноста во јасност, стравот во љубопитност, а технологијата во сојузник. Со „Дексиверз“, светот на вештачката интелигенција конечно станува човечен.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.