Чувањето со години на ланец или во кафези, напуштањето на милениците и малтретирањето на животните со новиот предлог – закон за нивна заштита и благосостојба ќе носи „солени казни“ – највисоката ќе биде 5.000 евра за сурово постапување, нанесување на болка или убивање животни, која во моментов е пет пати помала. Гизела Бошковска од Анима Мунди, кои заедно со АХВ работеа на ова законско решение вели дека подигањето на свеста е значајна, но животните ги остава на милост и немилост на сопственикот, па очекува строгите контроли и казните конечно да доведат до ред и хуман третман. Секако, вели, законот вреди, онолку колку што ќе се спроведува.

-Законот ние можеме да го направиме и најсовремен во Европа, меѓутоа сериозно мора да се земе во предвид дека мора строго да се имплементира и контролира, не само сопствениците, туку и прифатилиштата, општините, сите локални самоуправи, дека се што е предвидено да прават ќе мора да го направат беспрекорно. Со поригорозни закони и строга имплементација и контрола на сопствениците, состојбата драстично ќе се промени, секој понатаму што ќе размислува да земе миленик, ќе седне и ќе размисли малку подобро дали е подготвен за таква обврска која е долгогодишна.- Гизела Бошковска – Анима Мунди.

Крајната цел е решавањето на повеќе деценискиот горлив проблем со кучињата скитници, кои најчесто на улиците завршуваат оти неодговорните сопственици ги пуштаат, а истите потоа на улиците неконтролирано се размножуваат. Бошковска вели дека законот ќе овозможи соодветно регулирање на размножувањето, како и на она каде што неодговорните сопственици милениците ги шетаат пуштени и неконтролирано ги размножуваат. Законот наложува да се оформат центри, каде што оној кој се откажува од миленикот, наместо да го пушти по улиците или по планини и ливади, ќе може да го остави со финансиски надоместок.

-Оние кучиња сопствениците се откажуваат, на пример некој не може повеќе да го чува од одредени причини, мора да се понуди некакво место каде што тој со некаков финансиски надомест ќе се откаже миленикот, тие центри се надевам, би било добро да ги има каде што ќе се чуваат тие кучиња до домовување. Јас сум против трајно стационирање бидејќи е докажано неефикасна мерка која не го решава проблемот, а од друга страна е огромен финансиски товар и таков центар во никаков случај не може да пружи благосостојба која куче ја бара а се работи за многу кучиња. Гизела Бошковска – Анима Мунди.

Воедно предлог – законот предвидува и укинување на практиките на зашеметување, колење или усмртување животни за ритуални цели, а се предвидува и задолжителна стерилизација на домашни кучиња.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.