Сиљановска-Давкова ја реафирмираше посветеноста на македонската држава на НАТО и колективната одбрана, посочувајќи дека сојузничкото единство и силната трансатлантска врска се темелни предуслови за безбедноста на сојузниците.

Таа ја потврди определбата за достигнување на целта за издвојувањето, согласно Хашкиот план, нагласувајќи дека континуирано вложуваме во модернизацијата на Армијата, сајбер-отпорноста, новите технологии и заштитата на критичната инфраструктура.

За неа, Коридорите 8 и 10 не се само инфраструктурни проекти, туку стратешки правци што ја поврзуваат регионалната соработка со безбедносните интереси на НАТО и Европската Унија, особено во контекст на воената мобилност.

Сиљановска-Давкова изрази задоволство од сертификацијата на Лесната пешадиска баталјонска група како борбено подготвена, оценувајќи го тоа како потврда за професионалноста и способноста на Армијата да придонесува во операциите предводени од НАТО, ЕУ и ОН.

Повикувајќи се на искуството од членството во НАТО, таа укажа дека исполнувањето на високите сојузнички стандарди треба да биде пример за доследна примена на Копенхашките критериуми во процесот на европска интеграција.

Претседателката ја реафирмираше поддршката за Украина и потребата од континуирана политичка, воена, финансиска и хуманитарна помош, во знак на сојузничка солидарност.

Според неа, сеопфатниот, праведен и траен мир мора да почива врз меѓународното право и Повелбата на Обединетите Нации, а доследноста во почитувањето на овие принципи е неразделна од почитувањето на меѓународниот поредок.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Со овие аргументи скопска Апелација ја образложува одлуката со која ги ослободи Бојан Јовановски – Боки 13, Јасна Ерцеговиќ, Христина Блажевска и Миле Јовановски во случајот „Меѓународен сојуз“. Бојан Јовановски беше обвинет за измама и перење пари, додека останатите тројца за перење пари, односно помагање во ова кривично дело. За измамата, судот оценил дека не е докажана однапред формирана измамничка намера кај Јовановски.

-По однос на кривичното дело Измама судот оцени дека не е докажано постоење на однапред формирана измамничка намера кај обвинетиот, имајќи предвид дека за реализација на проектите биле преземени конкретни подготвителни активности, изработена проектна документација и склучени договори и меморандуми за соработка и на оштетените им биле познати условите од договорите и се согласиле со истите со потпишувањето. Притоа, самото неисполнување на договорните обврски не значи и постоење на кривично дело, особено кога реализацијата на проектите зависела од повеќе фактори и била поврзана со деловен и инвестициски ризик. - Апелационен суд Скопје.

За перењето пари, судот оценил дека не се докажани претходните кривични дела од кои наводно потекнувал криминалниот принос. Дополнително, не биле наведени конкретните дејствија на наводното противзаконито посредување. Без докажување на претходното кривично дело, Апелација смета дека не е докажано ниту перењето пари.

Претходно, во повторената постапка во октомври 2025 година, Бојан Јовановски беше осуден на пет години затвор, неговиот татко Миле Јовановски на година и пол условна казна, Јасна Ерцеговиќ на две години, Христина Блажевска на условна казна од една година. Од Кривичниот суд кој два пати носеше осудителна пресуда засега нема коментар ниту пак од ОЈО ГОКК кое го водеше случајот а во судница го застапуваа обвинителките Вилма Русковска и Ивана Трајчева. Пресудата е донесена вчера и не е правосилна со оглед на тоа што странките имаат право на жалба до Врховен.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Управата за јавни приходи започна со реализација на активностите за учење преку работа, во рамките на потпишаниот Меморандум за соработка со СЕПУГС „Васил Антевски – Дрен“, со кој се овозможува стекнување практични знаења и искуства на учениците во реална работна средина.

Во активностите се вклучени 13 ученици од образовниот профил „Дигитален маркетинг“, кои во периодот до 20 мај 2027 година ќе имаат можност непосредно да се запознаат со функционирањето на Управата за јавни приходи, нејзините надлежности, организациската поставеност и работните процеси.

По повод започнувањето на активностите, директорката на Управата за јавни приходи, м-р Елена Петрова ги пречека учениците и им посака успешен почеток, нови знаења и корисни практични искуства.

Почетните активности се насочени кон запознавање на учениците со институцијата, нејзината организациска поставеност и надлежности, професионалните стандарди, службената комуникација и работната дисциплина, како и со правилата за доверливост, даночна тајна и заштита на личните податоци.

Во текот на практичната настава, учениците постепено ќе се вклучуваат во активности во соодветните организациски единици на УЈП, каде што ќе имаат можност да се запознаат со конкретни работни процеси и да стекнуваат практични знаења и вештини соодветни на нивниот образовен профил. За нивната поддршка и насочување ќе бидат определени ментори – даночни службеници во УЈП, кои ќе ги водат низ процесот на учење, ќе го споделуваат своето професионално знаење и искуство и ќе го следат нивниот напредок и реализацијата на предвидените активности.

Учењето преку работа претставува важен начин на поврзување на формалното образование со практиката, овозможувајќи им на младите да ги применат стекнатите теоретски знаења, да развиваат професионални и комуникациски вештини и да се запознаат со работната култура, професионалната одговорност и интегритетот.

„Верувам дека младите генерации, со своето знаење, енергија и идеи, имаат значајна улога во обликувањето на иднината на институциите и општеството. Вие сте идните економисти, правници, менаџери и професионалци кои ќе придонесуваат кон развојот на модерна, одговорна и праведна држава. Фер е секој да го плати својот дел и на тој начин да учествува во заедничкиот развој и градењето праведно општество“. - истакна директорката на Управата за јавни приходи, м-р Елена Петрова.

Со започнувањето на овие активности, Управата за јавни приходи ја потврдува својата посветеност на унапредувањето на соработката со образовните институции, поддршката на практичното образование и создавањето можности младите да ги развиваат своите знаења и потенцијали.

УЈП останува отворена за знаење, млади и нови можности, препознавајќи ја важноста на вложувањето во идните генерации.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.