Вицепремиерот и министер за транспорт Александар Николовски денеска во Охрид на новите капетани и на опслужувачите на бродови им ги врачи сертификатите за управување со пловни објекти, кои се издаваат преку Капетанијата на пристаништата во Охрид и Министерството за транспорт.

- Од 2005 година првпат кај нас се организира полагање испити за пловни објекти. Заеднички со Капетанијата на пристаништата и стручните служби во Секторот за транспорт при Министерството ги направивме потребните законски и подзаконски измени за да ги овозможиме овие полагања. Досега тие се изведуваа во странство, што значеше дополнително оптоварување на лицата што се занимаваат со дејноста - рече Николоски.

Сертификат за управување со пловни објекти и за опслужување пловило се здобија еден заповедник на брод за управување со брод по меѓународен пат, осум заповедници на брод за управување на државен пловен пат, еден водач на палуба и шест морнари.

- Ќе продолжиме да ги стимулираме сите кои сакаат да ја обавуваат оваа дејност да полагаат, со цел да се регулира пловниот сообраќај во државата и да имаме повисоко ниво на безбедност, а ќе продолжиме и со инвестициите кои заеднички ги правиме со Капетанијата, рече Николоски.

Тука тој ги посочи спроведените активности за расчистување на пристаништата, набавка на ново пловило за потребите на Капетанијата, а во тек се и нови повици за одржување на пристаништата во Охрид и кај Свети Наум.

Николоски рече дека Владата заедно со Општина Охрид работи на изготвување проект за ново уредување на Градскиот кеј, со реконструкција на пристаништето пред хотелот „Палас“ и Градското пристаниште.

Како што посочи, последен пат интервенции на Градскиот кеј се вршени во 90-те години, така што моментално Општина Охрид работи на делот на проектирање на идниот изглед на Кејот, додека Министерството за транспорт се работиме делот на реконструкција на пристаништата.

- Очекувам заеднички да изготвиме проект што ќе значи целосно партерно уредување на Кејот од една страна, а од друга страна ставање во функција на пристаништето кај хотелот „Палас“ за полесни и помали пловни објекти, додека Градското пристаниште да добие комплетно нов лик, рече Николовски.

Тој истакна дека за плановите за тој проект било разговарано и на средбите што македонскат делегација ги имаше со првите луѓе на УНЕСКО, со цел негова реализација. Николовски рече дека има расположение кај преставниците на УНЕСКО за соработка во релизацијата на планираниот проект, сето во насока од една страна да се исполнат старндардите и да се задржи и унапареди статусот на УНЕСКО, а истовремено да се добијат модерни пристаништа согласно потребите на 21 век.

- Проектот е во два дела. Пред хотелот „Палас“ би се лоцирале помалите пловни објекти, а на главното пристаниште би се опслужувале поголеми пловила, со изградба на уште еден крак и продолжување на постојното пристаниште. Тоа би добило и нова електрична инсталација за опслужување на бродовоите, современ систем за дотур на горива, рече министерот, истакнувајќи дека приоритет е да се реши порблемот со Студенчишкиот канал каде ситуацијата е далеку од било кој еколошки стандард.

Николоски рече дека начелно има согласност во УНЕСКО за тој зафат, со најава дека откако ќе биде изготвена проектната документација истата ќе биде доставена во Париз на разгледување и одобрување.

Според податоците од Капетанијата на пристаништа во Охрид, во бродскиот регистар има 3450 пловни објекти на ниво на цела држава.

Капетанот на Капетанијата на пристаништа во Охрид, Илија Арнаудоски, истакна дека во насока на подобрување на севкупната безбедност на пловидбата на Охридското Езеро набавен е нов глисер за инспекциската служба на Капетанијата вреден пет милиони денари, а извршен е ископ на пристаништето кај во Свети Наум и Градското пристаниште во Охрид.

Тој ја искористи можноста воочи престојната главна туристичка сезона, да ги повика граѓаните навремено да ги регистрираат своите пловни објекти и да се придржуваат кон прописите за мирна и безбедна пловидба.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.