Кошарка

Николиќ: „Сите знаат колку ја сакам македонската кошарка, тешко ми паѓа сето ова“

Српскиот тренер Драган Гаги Николиќ по само 4 месеци го напушти кормилото на македонскиот кошаркарски шампион МЗТ Скопје.

Четири месеци откако го презеде, искусниот стручњак Драган Николиќ повеќе не е тренер на МЗТ Скопје.

Како последица на суспензијата од десет натпревари, изречена поради влегувањето во терен на мечот против Кожув, популарниот Гаги и управата на актуелниот шампион одлучија да ја прекинат соработката. За четирите месеци на клупата, Николиќ успеа да го освои трофејот во Купот на Македонија, вторпат во неговата кариера, а на добар пат беше и да дојде до титулата во домашното првенство, имајќи предвид дека МЗТ Скопје беше, односно е убедливо првопласиран по основниот дел од сезоната.

Неполни 24 часа по раскинот на соработката со МЗТ Скопје, Драган Николиќ во изјава за македонските медиуми се обидува да ги смири емоциите и не крие дека заминувањето од Аеродром му е еден од најтешките моменти во кариерата.

„Сите знаат колку навивам да успее македонската кошарка и секој кој работи во неа, почнувајќи од првиот човек на Федерацијата, па сите останати. Од тие причини, дополнително ме боли како човек и тешко ми паѓа на срцето и професионално и емотивно, овој катастрофален епилог и моето привремено заминување од дедовината.

Се разбира дека, како горд државјанин на Македонија и натаму со сето срце ќе навивам за подобро утре и ќе се надевам на натамошни успеси на македонската клупска и репрезентативна кошарка, што најискрено посакувам“ - вели Николиќ за македонските медиуми.

Без разлика на она што се случи во неделата, на мечот против Кожув, се чини дека непотребно се создаде една погрешна слика за еден од најмаркантните стручњаци во регионот. Како и секој човек, Николиќ има свои симпатизери и луѓе што не го сакаат, но никој не може да го избрише неговиот придонес за македонската кошарка последните години.

Тука не станува збор за освоените трофеи во Купот на Македонија, кои се негов личен успех, туку и обидот за афирмација на македонската клупска кошарка, надвор од државава. Во сите негови јавни излагања и појавувања, Николиќ беше преполн со комплименти за оваа земја и за сите кои работат во домашната кошарка. Не е тајна неговата помош во учеството на македонски клубови во регионалните натпреварувања, желбата да види и втор наш тим во АБА лигата, но и помошта која им ја даде на овдешните стручњаци и кошаркари во нивниот развој. Затоа, настрана од тоа дали ангажманот во МЗТ Скопје последен за него во Македонија, многумина треба да му се благодарни за она што го направи и го прави за својата втора татковина.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Забава

Видео: Дали ова е најбизарниот спорт во светот? Натпреварувачки се удираат по задникот

Натпреварувачки се удираат по задникот, дали е ова најбизарниот спорт?.

Ако мислевте дека сте ги виделе сите можни боречки спортови, Романците најдоа начин да ги изненадат сите. Промоцијата RXF организира натпревар наречен „Booty Slap“, во кој жените се удираат со дланка по задникот.

Форматот е прилично едноставен. Две натпреварувачки стојат една спроти друга и наизменично упатуваат силни шлаканици со отворена дланка по задникот на противничката.

Според тековните правила на RXF, дуелот се состои од вкупно десет шлаканици, а победничката се одредува врз основа на силината на ударот – односно штетата што ја предизвикуваат ударите.

🍑 Romania has butt-slapping competitions Romanian promotion RXF even has a separate discipline called Booty Slap: contestants take turns slapping each other on the butt, with the winner decided by the force and effect of the hits. So… where do you sign up to be a judge?
— NEXTA (@nexta_tv) September 16, 2026

Натпреварувачките мора да имаат најмалку 18 години, а пред мечот нанесуваат специјална супстанца на рацете за да го максимизираат ефектот на шлаканиците. За разлика од класичниот „Power Slap“, целта овде не е да се нокаутира противничката со удар во главата.

Наместо тоа, натпреварувачките се стремат да зададат што е можно посилна шлаканица, принудувајќи ја ривалката да изгуби рамнотежа или едноставно оневозможувајќи ја да ја издржи болката.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Шоу биз

Бред Пит ја „загубил“ девојката на свадбата на Тејлор Свифт

Еден од најголемите заводници во Холивуд, актерската ѕвезда Бред Пит откри дека за време на спектакуларната свадба на Тејлор Свифт и Тревис Келси накратко ја изгубил од вид својата девојка, Инес де Рамон.

Еден од најголемите заводници во Холивуд, актерската ѕвезда Бред Пит откри дека за време на спектакуларната свадба на Тејлор Свифт и Тревис Келси – настан одржан на 3 јули во њујоршкиот „Медисон Сквер Гарден“, кој тој го опиша како „свадба на векот“ – накратко ја изгубил од вид својата девојка, Инес де Рамон, на преполниот подиум за танцување.

„Тоа беше неверојатна ноќ“ .

Говорејќи на премиерата на филмот *Heart of the Beast*, актерот раскажа дека тој и Инес поминале „10, можеби 12 часа“ на свадбата, на која присуствувале околу 1.000 гости, истакнувајќи дека тоа била „неверојатна ноќ“.

Поради правилото што им забранувало на гостите да ги користат своите телефони, Пит рече дека накратко ја изгубил Инес од вид во гужвата на подиумот, но брзо ја пронашол со помош на другите гости, додавајќи дека целата прослава била внимателно испланирана, емотивна и многу забавна.

Двојката, која е заедно од 2022 година, ја официјализираше својата врска на Инстаграм за време на свадбата.

Инаку на свадбата на векот меѓу истакнатите гости беа Џиџи Хадид, Бредли Купер, Ед Ширан, Сабрина Карпентер, Хју Грант, групата „Хаим“ и Том Хенкс.

Во меѓувреме, новиот филм на Пит, *Heart of the Beast*, пристигнува во кината на 23 септември, според „Филм-њуз“ (Film-News).

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

ФУЕН едногласно ја усвои Резолуцијата на Македонското друштво „Илинден“-Тирана

Федералната унија на европските националности (ФУЕН), на својот конгрес што се одржува во Хелсинки, Финска, денеска едногласно ја усвои Резолуцијата поднесена од Македонското друштво „Илинден“-Тирана.

Овој чин претставува уште еден голем дипломатски и институционален успех за македонското национално малцинство во Република Албанија.

Со усвоената резолуција, ФУЕН упатува четири клучни барања до албанските и меѓународните институции:

1. Ратификација на Европската повелба: Република Албанија итно да ја потпише и ратификува Европската повелба за регионални или малцински јазици.

2. Заштита на идентитетот: Да се преземат ефективни и конкретни мерки за заштита на македонскиот идентитет од зачестените притисоци, негирања и асимилација.

3. Зачувување на Општина Пустец: Општина Пустец да остане посебна единица на локалната самоуправа и во рамките на претстојната нова административно-територијална реформа во Албанија.

4. Преименување: Општина Пустец официјално да се преименува во Општина Преспа.

Веднаш по гласањето на делегатите, претседателот на Македонското друштво „Илинден“-Тирана, Никола Ѓурѓај, во изјава за весникот „Македониум“ го истакна значењето на овој момент.

„Ова е значаен чекор за зачувување на македонскиот јазик, идентитет, култура и сите права на Македонците во Република Албанија. Веќе 11 години, како рамноправна членка на ФУЕН, активно учествуваме во работата на оваа реномирана европска организација и ги застапуваме интересите на нашиот народ. Ова е можност за нови искуства, зајакнување на соработката со другите национални малцинства во Европа и дополнителна афирмација на македонскиот идентитет, јазик, култура и традиција. Со голем гордост го претставуваме македонското национално малцинство на европско ниво“, изјави Ѓурѓај.

Резолуцијата во најкраток рок ќе биде официјално доставена до сите релевантни албански државни органи, како и до клучните меѓународни и европски институции за заштита на човековите и малцинските права.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.