Нездравиот начин на живот и консумирањето тутун главни ризик фактори за смртност во земјава - Канал 5

Здравје

Нездравиот начин на живот и консумирањето тутун главни ризик фактори за смртност во земјава

 Тутунот и нездравата исхрана се главни фактори на ризик за смртност во Македонија.

Нездравиот начин на живот и консумирањето тутун главни ризик фактори за смртност во земјава

Нездравиот начин на живот е двигател на смртност, а високиот процент на пушачи, лица со висок шеќер во крвта и зголемената потрошувачка на шеќер, сол и масти се проценува дека сочинуваат речиси три четвртини од смртните случаи до 2019 година, се наведува во новиот извештај на Светската здравствена организација (СЗО) за Македонија.

Овој извештај е еден од 14-те национални извештаи за земјите членки во Европскиот регион на СЗО што не се членки на Европската Унија.

Во делот „Подобрување на здравјето на населението“ се посочува дека очекуваниот животен век во Македонија се зголемува, но останува под просек од Европскиот регион на СЗО.

– Најновите податоци за смртност пријавени од Македонија до СЗО се однесуваат на 2013. Според овие податоци, просечниот животен век изнесувал 75,5 години. Иако ова беше под просеците за Југоисточна Европа и Европскиот регион на СЗО, беше повисок од повеќе ажурирани бројки за очекуваниот животен век за некои членки на ЕУ, се вели во извештајот.

Кардиоваскуларните и цереброваскуларните заболувања и карциноми се водечки причини за смртност кај возрасните. Во периодот од 2000 до 2017 година забележано е и зголемување на смртноста поради дијабетес, специфични видови на рак, особено на белите дробови, колоректален карцином, панкреас и рак на простатата како и Алцхајмерова болест.

Во извештајот се наведува дека државата е рангирана меѓу земјите со највисока преваленција на пушење тутун во светот и највисок просечен број на испушени цигари кај возрасните и младите луѓе. Но, како што пишува, се забележува намалување на стапката на пушење цигари. Причината за тоа, велат дека е Законот за забрана на пушење цигари на јавни места воведен во 2010 година.

На позитивна нота, како што велат од СЗО, потрошувачката на алкохолот кај возрасните по глава на жител (3,8 литри) е под просекот на европскиот регион на СЗО.

Забележано е зголемување на стапката на прекумерна тежина и дебелина меѓу возрасните. Речиси две третини или 64,9 проценти од мажите и повеќе од половина жени, односно 51,2 отсто биле со прекумерна тежина во 2016 година. Загрижува и фактот што половина од возрасната популација не е физички активна и само 8,3 проценти од возрасните практикуваат околу 150 минути умерена физичка активност неделно, што е под просекот на Европската Унија.

Прекумерната тежина се забележува и меѓу седумгодишните деца, каде што во период од 2010 и 2019 година е зголемена особено кај девојчињата, од 30,9 проценти на 30,8 отсто, покажуваат податоците од извештајот.

Загадениот воздух е главен фактор на ризик за респираторни заболувања кај децата, велат од СЗО. Земјата има едно од највисоките нивоа на загаденост на воздухот во Европа, особено во главниот град Скопје. Согласно податоците од извештајот, во 2019 година, се проценува дека еден од седум смртни случаи (13,7 проценти) во државата се должи на лошиот квалитет на воздухот.

Преваленција на респираторни состојби, не вклучувајќи зарази или пневмонија е особено висока кај децата на возраст од 0 до 14 години. Во 2019 година, 39,8 отсто од морбидитетот кај децата е поврзан со болести на респираторниот систем. Од СЗО велат дека децата од предучилишна возраст во урбаните средини имаат двојно поголеми шанси да развијат болести на респираторниот систем од оние во руралните средини.

Четиринаесетте нови извештаи беа претставени на 72-та седница на Регионалниот комитет на СЗО за Европа во Тел Авив, Израел на 12 септември годинава. Секој извештај содржи најнови информации за земјата во однос на организацијата на здравствениот систем, стратегиите за финансирање и финансиска заштита, пристапот до ресурси и услуги, подобрувањето на здравјето на населението, стратегиите за антимикробна резистентност и напредокот кон исполнување на Европската програма за работа на СЗО.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Свет

Путин предизвика хаос во Вашингтон

Демократите побараа од големите американски банки и пристанишните управи да ги зачуваат документите и преписките поврзани со потенцијалниот увоз на руски дизел, пренесува американскиот медиум „Аксиос“.

Путин предизвика хаос во Вашингтон

Доколку партијата ја врати контролата врз барем еден од домовите на Конгресот, истрагата за овој аранжман ќе стане приоритет.

Законодавците сметаат дека ваквиот договор би можел да претставува кршење на забраната за увоз на руски нафтени деривати – воведена во 2022 година – и дека тој, всушност, би можел да помогне во финансирањето на војната против Украина.

Сепак, Министерството за финансии на САД тврди дека договорот е во согласност со законот.

Испратени се дописи до банки, меѓу кои „JPMorgan“, „Bank of America“, „Citi“, „Wells Fargo“, „ Goldman Sachs“ и „Morgan Stanley“, како и до пристанишните управи во Хјустон, Бомонт, Корпус Кристи и Њујорк – Њу Џерси.

Демократите бараат потврда дека документите се зачувани, како и обелоденување на информации за сите потенцијални или веќе реализирани трансакции.

Вреди да се напомене дека американскиот претседател Доналд Трамп најави изненадувачки „договор за дизел“ со рускиот претседател Владимир Путин, со цел да се реши проблемот со вртоглавиот раст на цените на дизелот во САД, пред изборите на средината на мандатот, закажани за 3 ноември 2026 година.

Тагови: Владимир Путин

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Балкан

Граѓани се собраа пред телевизијата Пинк, фрлаа јајца кон зградата (ВИДЕО)

Граѓани вечерва се собраа пред зградата на телевизијата Пинк во Белград, неколку часа откако група демонстранти влегоа во просториите на Информер. Полицијата беше распоредена пред Пинк, а толпата фрлаше јајца кон зградата.

Граѓани се собраа пред телевизијата Пинк, фрлаа јајца кон зградата (ВИДЕО)

Полициски кордон се повлече од улицата и се распореди директно пред влезот во зградата на телевизијата. Возачите што минуваат покрај толпата свират со своите сирени во знак на поддршка. Досега нема извештаи за граѓани што влегле во зградата на Пинк или за некои поголеми инциденти. Не е објавено колку луѓе се собрале пред телевизијата.

Пинк е еден од највлијателните провладини медиуми во Србија со години. Во својот извештај за 2026 година, Институтот за проучување на новинарството на Ројтерс ги рангира Пинк и Информер меѓу најкористените провладини медиумски брендови.

Податоците од Бирото за социјални истражувања покажуваат и колку Александар Вучиќ бил претставен на Пинк. Од почетокот на јануари до крајот на јули оваа година, тој добил повеќе од 28 часа програма на таа телевизиска станица, а во 74,7 проценти од тоа време бил прикажан позитивно.

Денес, неколку десетици граѓани и студенти се собраа пред редакцијата на Информер, а некои од нив влегоа во зградата и побараа јавно извинување од главниот уредник, Драган Ј. Вучиќевиќ, за начинот на кој медиумот известуваше за студентите, демонстрантите и противниците на владата.

За време на преносот во живо, Вучиќевиќ тврдеше дека станува збор за „криза со заложници“, повика полиција и брза помош и се обиде да го контактира Илија Срдановиќ, првиот на Студентската листа. Протестите пред Информер и Пинк доаѓаат еден ден откако Студентската листа победи на парламентарните избори, а Вучиќ го призна поразот.

Извор: Индекс.хр

Тагови: Србија Пинк

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Свет

Американците го прогласија хелиумот за стратешки ресурс

Хелиумот е важен за производството на чипови.

Американците го прогласија хелиумот за стратешки ресурс

Министерот за енергетика на САД, Крис Рајт, го прогласи хелиумот за стратешки важен ресурс поради неговата клучна улога во производството на полупроводници и зголемените ризици во снабдувањето, соопшти Министерството за енергетика во понеделникот.

Оваа одлука е дел од напорите на администрацијата на претседателот Доналд Трамп да ја намали зависноста на САД од увоз на стратешки важни ресурси, да го зајакне домашното производство, да ги поддржи работните места во Америка и да обезбеди пристап до материјали што се клучни за економската и националната безбедност.

„Претседателот Трамп ја оживува американската индустрија, а тоа значи дека мораме да ги имаме материјалите што ни се потребни за повторно да го поттикнеме производството во Америка“, изјави министерот Рајт.

„Хелиумот е клучен за производството на полупроводници и напредни технологии кои се важни за нашата економија. Со прогласувањето на хелиумот за стратешки важен ресурс, ја зајакнуваме сигурноста во снабдувањето, поддржуваме отворање нови работни места и ја зацврстуваме водечката улога на САД во енергетските и технолошките иновации“, додаде министерот.

Хелиумот е неопходен во производството на полупроводници

Одлуката доаѓа по заклучокот на Министерството за енергетика дека хелиумот одговара на законската дефиниција за ресурс од стратешко значење, поради неговата клучна улога во американското производство и зголемената изложеност на ризици во синџирите на снабдување.

Поради своите уникатни својства, хелиумот е незаменлив во производството на полупроводници, истакнуваат од Министерството, а за многу клучни примени не постојат соодветни замени. САД располагаат со големи наоѓалишта на природен гас што содржи хелиум, што отвора можност за зголемување на домашното производство со цел да се задоволи растечката побарувачка во индустријата.

Нарушувања во светското снабдување со хелиум

Водечките светски добавувачи на хелиум во март предупредија на можни краткорочни недостизи поради нарушувања во испораките од регионот на Персискиот Залив. Во јули, Кина привремено го забрани извозот на хелиум за да обезбеди доволни количини за домашниот пазар, без притоа да прецизира колку долго ќе трае оваа забрана.

Кон средината на април, Русија ја заостри контролата врз извозот на хелиум до крајот на 2027 година, барајќи од извозниците да обезбедат дозвола за испораки на пазари надвор од Евроазиската економска унија (ЕАЕУ), со цел да се гарантира стабилно снабдување на домашниот пазар. Светските залихи на хелиум се намалени за речиси една третина, изјави тогаш рускиот премиер Михаил Мишустин, потсетувајќи дека овој гас, покрај во индустријата за полупроводници, се користи и во металургијата, во уредите за магнетна резонанца, како и во системите за вештачка интелигенција.

САД се најголемиот светски производител на хелиум, пред Катар и Русија. Според Геолошкиот институт на САД (USGS), американското производство минатата година изнесувало 81 милион кубни метри, вклучувајќи го и хелиумот произведен во Канада, а преработен во САД. Катар произвел 63 милиони, а Русија 18 милиони кубни метри.

Извор: Индекс.хр

Тагови: САД хелиум

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

притисни ентер