Постојаното „бомбардирање со информации го уништува мозокот.

Во лудилото на модерниот живот и постојаното брзање помеѓу обврските, оптоварени сме со секакви потенцијални болести, а ги игнорираме оние што веќе ги имаме без воопшто да бидеме свесни за нив. Преголемото количество дневни информации доведува до „гниење на мозокот“ или дигитална деменција.

Инаку, терминот „гниење на мозокот“ е збор на годината според изборот на Оксфордскиот речник и тоа неминовно е најдобриот опис за состојбата на нашето ментално здравје во дигиталната ера.

Интернетот со сите свои информации стана главен виновник за падот на когнитивните способности, а како што тврди проф.д-р Ранко Раичевиќ, претседател на Здружението на невролози од Западен Балкан, ова е само еден од симптомите на еден поширок проблем.

-Има премногу информации, а нашата способност да се справиме со нив станува сè послаба. Уште во 2007 година, едно истражување покажа дека дури и едноставната електронска пошта негативно влијае на вниманието, намалувајќи го капацитетот на мозокот да складира информации за 25 проценти. Денес, бидејќи Интернетот и мобилните уреди стануваат неизбежно секојдневие, мозокот повеќе не може да го издржи притисокот. Пред сè поради постојаното бомбардирање со нови информации, луѓето денес можат да го задржат своето внимание на екранот само 35 секунди, додека пред 20 години таа бројка беше 2,5 минути - објаснува Раичевиќ.

Зошто се јавува „гниење на мозокот“?

Мозокот, иако импресивно развиен орган со милијарди неврони, не е неограничен. Има капацитет за огромна количина на информации, но со оглед на постојаното примање на бескорисни податоци, станува преоптоварен.

- Мозокот има сè помалку време да направи разлика помеѓу она што е важно и она што не е. Луѓето сега, за работи што некогаш ги решавале во секунда, треба подолго време да се премислуваат – смета докторот.

Дали дигиталната деменција е нова форма на болест?

Стручните лица денес говорат за феноменот дигитална деменција, која не е вистинска деменција, но сè повеќе се покажува како сериозен проблем.

- Мозокот е преплавен со информации кои не престануваат да пристигнуваат. Тоа е како постојано да полниме дно на празна чаша, но никако не стигнуваме да го испразниме. Мозокот е под постојан стрес обидувајќи се да ги обработи постојаните бранови на нови податоци – вели неврологот.

Како да се справите со „гниењето на мозокот“?

- Просечниот човек денес поминува од 6 до 7 часа дневно пред екранот, а ова драматично го зголеми оптоварувањето на мозокот. Освен тоа, постојаниот стрес предизвикан од постојаното зголемување на допаминот, хормонот кој нè држи будни, создава состојба на преосетливост која го попречува нормалното функционирање на телото и умот – предупредува Раичевиќ.

Со цел да се спречи натамошно намалување на менталните способности, д-р Раичевиќ советува рационален пристап кон информациите.

- Тоа е речиси како зависност. Во социјалните простори, како што се пабовите, кафулињата, рестораните, телефоните не треба да се користат. Кај децата треба да се ограничи времето што го поминуваат пред екран, а возрасните да практикуваат физичка активност и да се придржуваат до режимот на спиење - најмалку 7 до 8 часа континуиран сон - заклучува Раичевиќ.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.