Судијката на Уставниот суд м-р Татјана Васиќ-Бозаџиева, имаше свое обраќање на меѓународната конференција во Батуми, по повод 30 годишнината од основањето на Уставниот суд на Грузија. Централната тема на конференцијата е „Улогата на уставносудската контрола во државата заснована на владеење на правото“.

Васиќ-Бозаџиева се обрати на првата сесија посветена на темата „Уставниот поредок и основните човекови права”,на која свое обраќање имаа судии од Eвропскиот суд за човекови права(ЕСЧП), судии од уставните судови на Полска, Белгија, Бугарија.

Судијата Васиќ-Бозаџиева во своето излагање на темата „Од негативен законодавец до позитивно нормативно влијание: границите на уставносудскиот активизам“ го отвори прашањето дали современите уставни судови сè уште се само „негативни законодавци“ или нивната улога сè повеќе се проширува кон активно обликување на правото.

Васиќ-Бозаџиева посочува дека современото уставно судство не го напушта Келзеновиот модел на негативен законодавец, туку го надминува неговото тесно, формално разбирање.

„Уставниот суд и понатаму ја врши функцијата на отстранување на противуставните норми, но неговото дејствување има и позитивна нормативна димензија. Таа се изразува преку правните ефекти на неговите одлуки, примената на различни техники на одлучување и, во определени случаи, создавањето привремени општи правни правила. Одделно од тоа, преку развојното толкување на Уставот, Судот ја конкретизира и ја обликува содржината на уставните принципи и човековите права. Оваа втора улога не треба да се поистоветува со позитивното законодавство, туку да се анализира како творечка функција во развојот на уставното право. Особено значајна е творечката и развојната димензија на толкувањето на Уставот, преку која уставниот суд создава и развива уставноправни принципи и правила, поради што неговата улога во тој контекст може да се разбере како улога на творец на уставното право, а не како позитивен законодавец, истакна судијката.

Во заклучните согледувања, судијата Васиќ-Бозаџиева укажува дека легитимноста на позитивното нормативно влијание зависи од уставната основа, природата на повредата, неопходноста и пропорционалноста на интервенцијата, како и од зачувувањето на реалниот простор на законодавецот за вршење на неговата уставна надлежност.

„Позитивното нормативно влијание не е неограничено. Неговата легитимност зависи од уставната основа, природата на повредата, неопходноста и пропорционалноста на интервенцијата, времетраењето на привременото решение и, особено, од тоа дали на законодавецот му останува реален простор за вршење на неговата уставна надлежност. Затоа, суштинското прашање денес не е дали уставните судови треба да бидат активни. Прашањето е како да бидат доволно активни за да обезбедат ефективна заштита на Уставот, а истовремено доволно воздржани за да не ја нарушат уставната рамнотежа на власта.

Уставниот суд не смее да биде нем набљудувач на неуставноста, но не смее ниту да стане замена за законодавецот.

Неговата вистинска сила е во тоа да го обезбеди Уставот како највисок правен акт, вклучително и тогаш кога тоа бара развојно толкување и иновативни техники на одлучување, но секогаш во границите на сопствените уставни овластувања, Уставниот суд не смее да биде нем набљудувач на неуставноста, но не смее ниту да стане замена за законодавецот изјави Васиќ-Бозаџиева заклучувајќи го своето обраќање.

На меѓународната конференција која се одржува од 4 до 6 ноември во Батуми, Грузија, учествуваат претседатели и судии на уставни судови од повеќе европски и азиски држави, како и претставници на Европскиот суд за човекови права. Програмата опфаќа две тематски сесии посветени на уставниот поредок и основните човекови права, како и на историскиот развој на уставносудската контрола.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Станува збор за таканаречениот „циркадијален подтип“ на депресија, кој е поврзан со внатрешниот биолошки часовник кај луѓето.

Истражувачите анализирале податоци од над 10.000 пациенти и откриле дека кај околу 25 отсто од нив се јавува облик на депресија поврзан со нивниот биолошки часовник. Многу од овие пациенти си легнуваат доцна и следниот ден се чувствуваат исклучително уморни, иако често спијат подолго од вообичаеното.

Поизразени симптоми и поголем ризик од други болести

„Кај лицата со циркадијална депресија, состојбата почесто се појавува во порана возраст и се манифестира со поизразени симптоми“, наведуваат од Универзитетот во Сиднеј. Како посебно загрижувачки се издвојуваат појавата на манични епизоди и поголемата застапеност на суицидни мисли.

Студијата исто така покажа дека овие лица се поподложни на развој на кардиоваскуларни болести и почесто покажуваат знаци на невролошки состојби, како што е АДХД (нарушување на вниманието со хиперактивност). Врз основа на овие наоди, научниците сугерираат дека за оваа група пациенти треба да се разгледаат нови пристапи во лекувањето.

„Депресијата не е единствена, униформна болест; разбирањето на карактеристиките на нејзините различни подтипови ни овозможува на луѓето порано да им овозможиме пристап до терапиите што ќе бидат најефективни за нив“, изјави Емилијана Тонини од Центарот за мозок и ум при Универзитетот во Сиднеј.

Светлосната терапија и мелатонинот би можеле да помогнат

Во труд објавен во списанието „British Journal of Psychiatry“, истражувачите истакнуваат дека депресијата е состојба која може да се манифестира на различни начини и дека пациентите различно реагираат на третманот. Наодите сугерираат дека лековите што делуваат на серотонинскиот систем – кои често им се препишуваат на лицата со депресија – можеби не се најсоодветниот избор за пациентите со циркадијален подтип на ова нарушување.

„Бидејќи циркадијалната депресија е поврзана со внатрешниот биолошки часовник на поединецот, терапиите насочени кон регулирање на циркадијалниот ритам – како што се светлосната терапија и мелатонинот – би можеле да бидат многу посоодветни“, изјави Џејкоб Краус, истражувач во Центарот за мозок и ум при Универзитетот во Сиднеј.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Слично како и Соединетите Држави, Кина го проширува своето присуство на Антарктикот и на Арктикот, со цел истражување на поларните ресурси. Според „Ројтерс“, официјалната цел на законот е да ги поттикне кинеските научни истражувања, истовремено штитејќи ја безбедноста на националните операции, имотот и другите интереси на Кина на Антарктикот.

Законот наложува за време на кинеските операции да се заштитат флората и фауната, отпадот соодветно да се отстранува, а загадувањето на морето да се спречува. Исто така, се бара избегнување или ублажување на штетните влијанија врз животната средина. Издавањето дозволи за кинески истражувања, туризам, пловидба и други активности ќе зависи од исполнувањето на низа критериуми поврзани со животната средина, безбедноста и други аспекти.

Станица за следење на атмосферата

Во изминатите две години, Кина управува со станица за следење на атмосферата на Антарктикот. Овој објект служи за следење на промените во животната средина и дава придонес кон глобалниот одговор на климатските промени.

Кина е потписничка на Договорот за Антарктикот, со кој континентот е дефиниран како научен резерват отворен за истражувања, при што се забранети воени активности. Таа е исто така страна потписничка на Протоколот за заштита на животната средина од 1991 година, со кој се воведува 50-годишна забрана за рударство и истражување на нафта.

Извор: Индекс.хр

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.