„Сите пратеници избрани со десничарски гласови мора да се спротивстават на оваа опасна левичарска влада“, напиша на Твитер Нетанјаху, кој е премиер 12 години.
Тоа е прво јавно појавување на Нетанјаху, лидерот на десничарската Ликуд, против формирање коалиција што синоќа го објави центристичкиот политичар Јаир Лапид, околу 35 минути пред истекот на рокот за состав на владејачката коалиција.
Според договорот, религиозниот националист Нафтали Бенет (49), поранешен министер за одбрана и милионер, ќе биде премиер во првите две години, по што Лапид (57), поранешен телевизиски презентер и министер за финансии, ќе ја преземе премиерската функција.
По четвртите избори во последните две години, одржани на 23 март, Ликуд и неговите сојузници, како и противниците, не освоија мнозинство пратеници.
Во коалицијата предводена од партијата Јеш Атид на Лапид се и Јамин на Бенет (десно), центристичката Сина и Бела на поранешниот министер за одбрана Бени Гантц, партијата Леви Мерец, Лабуристичката партија, секуларната националистичка партија Јизраел Бејтен на поранешниот министер за одбрана Авигдор Либерман и Нова надеж на поранешниот министер за образование, Гидеон Саар, отпадник од Ликуд.
Поддршка даде и арапската исламистичка партија Раам.
Партиите имаат малку заедничко освен желбата за соборување на Нетанјаху, кому му се суди за корупција.
Политичките аналитичари очекуваа Нетанјаху да се обиде да ја раскине коалицијата со капитализирање на незадоволството на членовите на Јамин од сојузите со арапските и левичарските пратеници.
Тамар Зандберг, пратеник на Мерец, признал дека било тешко да се формира коалиција.
„Тестот за коалиција треба да се потврди во Кнесетот - нема да помине без груби пречки и проблеми“, рече таа за Радио Арми.
Нетанјаху има 30 пратеници од вкупно 120, скоро двојно повеќе од Јеш Атид на Лапид и е поддржан од најмалку три помали верски и националистички партии.
АФП пишува, цитирајќи го својот извор вклучен во коалициските разговори, дека новата влада ќе се обиде да избегне палење идеолошки прашања, како што е прашањето за припојување на дел од Западниот брег или целосно напуштање на истиот.
Бенет рече дека создавањето независна Палестина ќе биде самоубиство за Израел. Анексијата на делови од Западниот брег е дел од неговата политичка агенда.
Нетанјаху, пак, посочува дека коалицијата Бенет-Лапид ја загрозува безбедноста на Израел.