Неопходно е зголемување на опфатот со МРП вакцината - Канал 5

Здравје

Неопходно е зголемување на опфатот со МРП вакцината

Неопходно е зголемување на опфатот со МРП вакцината, МЗ и УНИЦЕФ почнуваат кампања за да се укаже на ефикасноста на редовните вакцини за деца.

Неопходно е зголемување на опфатот со МРП вакцината

Во 2020 години се бележи исклучително низок опфат со МРП вакцината на национално ниво, од 63 отсто за прва доза и 68,5 отсто за втората доза. Министерството за здравство и здравствените установи кои спроведуваат вакцинација, во напорите за засилување на вакцинацијата успеаjа да го зголемат опфатот во 2021 година, така што за прва доза МРП вакцина тој изнесува 70,4 отсто, а за втората доза 80,4 отсто. Но, сепак овој опфат е далеку од потребниот процент од 95 отсто вакцинирани лица за постигнување на колективен имунитет и заштита во заедницата.

Ова денеска го истакна министерот за здравство Беким Сали на прес-конференција што се организира, како што рече, во пресрет на Европската недела за имунизација, која традиционално се одбележува последната недела од април, а воедно и да го означат почетокот на заедничка кампања со УНИЦЕФ за потенцирање на важноста на редовната имунизација, како најдобра превентивна мерка за заштита од заболувањата.

Се надеваме, посочи Сали, дека ќе допреме до што е можно повеќе родители и ќе ги поттикнеме навремено да ги вакцинираат своите деца. Потенцира дека сите вакцини кои се дел од националниот Календар за имунизација се достапни за секое дете и се клучни за заштита на нивното здравје.

– За разлика од 2020 година кога во неколку општини се евидентира опфат под 50 отсто, во 2021 година опфат под 50 отсто се бележи само во Куманово. Воедно, за разлика од 2020 година кога висок опфат се регистрира само во Берово и Пехчево (100 отсто), во 2021 година висок опфат со прва доза МРП, освен во Пехчево (100 отсто) се бележи и во Прилеп 98 отсто, Кочани 95,5, како и во други градови. Инаку, МРП вакцината бележи најнизок опфат, во споредба со сите останати вакцини, така што посебен фокус ставаме на оваа вакцина и заштитата од овие заболувања (мали сипаници, рубеола и заушки), рече Сали.

Појасни дека нивна тенденција е да го постигнат препорачаниот опфат од 95 проценти и во соработка со ДСЗИ и здравствените домови почнуваат со активности за засилена теренска работа за повикување на пропуштените деца за вакцинација.

– Со кампањата е предвидено и испраќање унифицирана СМС порака на родителите кои ја пропуштиле вакцинацијата на нивните деца, како и засилување на регионалната мрежа на координатори од центрите за имунизација за зајакнување на теренските активности и активно следење и детектирање на пропуштените деца и нивно навремено вакцинирање. Министерството за здравство во континуитет обезбедува вакцини од светски реномирани производители, додаде Сали.

Претставничката на УНИЦЕФ, Патриција Ди Џовани рече дека само во последните 60 секунди, редовните вакцини за деца спасиле пет животи, а тоа значи дека уште пет деца во светот се заштитени од смртоносни болести, можат да растат среќни и да водат здрав живот.

– Повеќе од два века, вакцините безбедно штитат од болести како детска парализа, мали и големи сипаници, помагајќи им на децата да растат здрави и среќни. Тие спасуваат повеќе од пет животи секоја минута – спречувајќи до три милиони смртни случаи годишно, дури и пред доаѓањето на КОВИД-19. Оваа земја има традиционално високи стапки на имунизација кај децата; сепак, низ годините колебливоста и „инфодемијата" што таа ја поттикнува се покажаа како клучни двигатели за недоволно голем вакцинален опфат. Иако најновите стапки, од 2021 година, ветуваат подобрувања во споредба со 2020 година, ова не е доволно добро, потенцира Ди Џовани.

Според неа, најалармантен е националниот опфат со вакцината против мали сипаници, рубеола и заразни заушки (МРП1) за деца на возраст од 12 месеци, што изнесува 70,4 отсто на национално ниво и втората доза на МРП вакцината, наменета за деца на возраст од 6 години, која е 80,4 отсто на национално ниво.

Овие стапки, нагласи таа, се значително пониски од опфатот во 2018 година (МРП1 – 74,8 отсто и МРП2 – 93,8 отсто) кога земјата се соочи со епидемија на мали сипаници, која предизвика четири смртни случаи на деца на возраст од 5,5 до 13 месеци, сите невакцинирани со МРП вакцината.

– Ниските стапки на рутинска имунизација предизвикуваат загриженост дека појавата на епидемија на морбили е можна и не смееме да чекаме да се случи за да реагираме. Малите сипаници се едно од најзаразните респираторни заболувања кое може да доведе до тешки, понекогаш и трајни компликации од типот на пневмонија, оток на мозокот, хоспитализација и смрт. Малите сипаници се толку заразни што се проценува дека ќе се заразат 9 од 10 блиски контакти на заразено лице кое не е имуно. Особено се опасни за деца под пет години, рече Ди Џовани.

Во пресрет на Европската и Светска недела на имунизација, истакна таа, Министерството за здравство и УНИЦЕФ, започнуваат кампања за дополнително да ја нагласиме безбедноста и ефикасноста на редовните вакцини за деца, како и да ги потсетиме сите за сериозноста на болестите од кои штитат овие вакцини.

– Апелираме до родителите и негувателите да им ја обезбедат на нивните деца заштитата што ним им ја обезбедиле нивните родителите во минатото. Во 21-от век не смееме свесно да ги загрозуваме животите на децата и да ги изложуваме на ризик од болести што може да се спречат со вакцини и кои се докажани како безбедни и високоефикасни. Не го одложувајте вакцинирањето на вашите деца. Со секое одложување, ги изложувате на ризик и вашето и другите деца, рече Ди Џовани.

Стручното техничко лице на СЗО за имунизација, Горан Кочински рече дека и покрај тоа што борбата против пандемијата на КОВИД-19 сè уште не е завршена, важно е да се потсетат дека какво било нарушување на имунизацијата, макар и за краток период, носи моментален ризик по заедницата и особено по децата од болести што може да се спречат со вакцини. Кога ќе се пропуштат рутински вакцинации, посочи, расте ризикот од епидемии.

– Ако рутинската имунизација биде занемарена поради КОВИД-19, последиците ќе се случуваат долго време откако ќе заврши пандемијата. Многу е постигнато досега, а освен тоа и напредокот во контролирањето на многу болести е забрзан изминативе неколку децении, но сепак 2022 година е еден вид раскрсница која носи со себе голем број предизвици. Благодарение на години и години напорна работа во насока на тоа секој да биде заштитен преку вакцинација, сè поблиску сме до елиминирање разни болести како на пример малите сипаници, но за да се заштити овој напредок, мора да се одржува висок опфат на рутинска вакцинација. Во периодот кој претстои СЗО ќе продолжи да ги поддржува напорите на владите за зајакнување на програмите за имунизација, рече Кочински.

Потенцира дека Европската недела на имунизација се одбележува во периодот од 24 до 30 април и целта е да се зголеми опфатот со вакцинација преку подигнување на свесноста за важноста на имунизацијата кај родителите, здравствените работници, креаторите на политики/факторите кои одлучуваат и медиумите.

– Апелираме до сите луѓе да се осигураат дека и тие и нивните деца ги имаат примено сите пропишани вакцини според Календарот за имунизација. Вакцините обезбедуваат можност и надеж дека сите ние ќе уживаме во поздрав и исполнет живот, а тоа е нешто за што сите треба да се бориме, додаде Кочински.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Судбина

Мајка се задавила и починала среде ручек- нејзините мали деца трчале да бараат помош, но попусто

Ванина Соледад Соса имала 30 години и била мајка на две деца, на возраст од 11 и 6 години. 

Мајка се задавила и починала среде ручек- нејзините мали деца трчале да бараат помош, но попусто

Починала во неделата во градот Сумампа, во аргентинската покраина Сантијаго дел Естеро, откако се задавила со храна за време на семеен ручек. Нејзините деца истрчале од куќата за да побараат помош.

Инцидентот се случил околу 13:30 часот, во куќата каде што живеела Соса. Во тоа време, жената била со нејзината мајка и нејзините две деца кога храната ѝ ги блокирала дишните патишта. Ситуацијата предизвикала очајна потрага по помош, објавува TN.com.

Двете деца ја напуштиле куќата за да побараат помош. Сосед го слушнал нивниот повик, влегол во куќата и ја пронашол Соса во сериозна состојба. Поради итноста на ситуацијата, тој решил да ја однесе во болницата во Сумампа со својот автомобил.

Жената пристигнала во здравствената установа во критична состојба. Лекарите се обиделе да ги ослободат нејзините дишни патишта и извршиле кардиопулмонална реанимација. Сепак, не можеле да ја спасат и нејзината смрт била потврдена неколку минути подоцна.

Која била Ванина Соледад Соса?

Соса живеела во Сумампа, град кој се наоѓа во департманот Кебрахос, на југот од покраината Сантијаго дел Естеро. Таа имала 30 години и била мајка на две деца, кои биле со неа во времето на инцидентот. Не се објавени други информации за нејзината работа или приватен живот.

Смртта на жената предизвикала возбуда кај жителите на градот. По инцидентот, интервенирале членови на Комесаријатот бр. 33 во Сумампа. Полицајците разговарале со членовите на семејството за да утврдат како се случила смртта.

Првично, случајот бил третиран како природна смрт. Властите чекале соодветно медицинско уверение за да ја завршат постапката.

Уште една смрт од задушување во Сантијаго дел Естеро

Смртта на Соса доаѓа само неколку недели по уште една смрт од задушување во покраината. Во тој случај, тригодишно момче починало откако ставило мал пластичен дел кој бил дел од ѓердан во устата. Момчето почнало да има тешкотии со дишењето и било итно однесено во болница.

ЦПР била спроведена за време на транспортот, кој потоа бил продолжен во Интегрираниот здравствен центар во Ла Банда. И покрај напорите на лекарите, момчето починало. Овој случај е исто така под истрага на локалните власти.

Тагови: мајка ручек

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Свет

Уапсен е сериски убиец во Бразил- се обидел да избега како жена (ВИДЕО)

Полицијата во североисточен Бразил уапси маж за кого се сомнева дека извршил најмалку 16 убиства во последните три месеци. 

Уапсен е сериски убиец во Бразил- се обидел да избега како жена (ВИДЕО)

Јорлан Лопес да Силва (33) беше уапсен во градот Мулунгу додека беше маскиран како жена и носеше двегодишно дете кое не беше негово. Истражителите проверуваат дали е одговорен и за десетици други кривични дела, пишуваат бразилските медиуми.

Според извештаите на медиумите, апсењето се случило во недела, 13 септември, со што завршила 48-часовна потрага. Лопес да Силва се обидел да ја измами полицијата носејќи фустан, перика, женски сандали и очила за сонце.

Тој имал и налакирани нокти, а со себе носел и двегодишно дете за да го скрие својот идентитет. Сепак, полицијата го препознала кога дел од неговата облека се поместил и открил тетоважа. Детето добило медицинска помош по апсењето и не било физички повредено.

Наводно признание за серија убиства

Истражителите во моментов го поврзуваат Лопес да Силва со 16 убиства извршени од крајот на мај. Сепак, тој наводно им кажал на полицајците дека убил вкупно 80 луѓе во период од две децении.

Наводно признал дека првото убиство го извршил на 13-годишна возраст и дека поминал пет до шест години во затвор за разни други кривични дела пред да биде ослободен на крајот на мај оваа година, изјави инспекторот Даглас Гарсија од Цивилната полиција.

Еден од случаите што се истражува е двојното убиство на двајца претприемачи на 1 август во Рио Тинто, според полицијата. Јорлан ја насочил полицијата точно кон местото каде што е погребано едно од телата, изјави инспекторот Гарсија.

Серискиот убиец бил уапсен по 48-часовна операција. Неговото тврдење дека извршил 80 убиства сè уште се проверува.

Доколку се докаже дека е точно, Јорлан би бил најсмртоносниот сериски убиец во бразилската историја, пред Педро Родригес Фиљо, познат како „бразилскиот Декстер“, кој беше осуден за 71 убиство, но тврдеше дека убил повеќе од 100 луѓе.

Тагови: Бразил сериски убиец

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Свет

Нов план на Саудиска Арабија- ноќе праќаат конвои танкери со нафта преку Ормутскиот теснец (ВИДЕО)

Саудска Арабија беше принудена да го затвори својот нафтовод Исток-Запад во последните денови по нападите со беспилотни летала од Ирак, каде што се наоѓаат милитанти поврзани со Иран. 

Нов план на Саудиска Арабија- ноќе праќаат конвои танкери со нафта преку Ормутскиот теснец (ВИДЕО)

Нафтоводот е клучен за стабилноста на пазарот на нафта од почетокот на војната.

Според анализата на Меѓународната агенција за енергија (ИЕА), мерките за пренасочување на нафтата од Ормутскиот теснец надоместија речиси една петтина од изгубената понуда во јули и август поради затворањето на водниот пат. Поголемиот дел од таа нафта течеше низ нафтоводот Исток-Запад, што имаше поголемо влијание врз намалувањето на цените на суровата нафта отколку итното ослободување на залихите од страна на ИЕА или падот на побарувачката од Кина, објавува „Волстрит џурнал“.

Алтернативни рути и нивните цени

Саудиска Арабија веќе ги намали протоците на нафта низ нафтоводот пред нападот, откако Хутите почнаа да ги напаѓаат нивните бродови во Црвеното Море. Податоците на ИЕА покажуваат дека во август, од пристаништето Јанбу на западниот брег биле извезени 2,9 милиони барели нафта и деривати, што е забележителен пад во споредба со просекот од 5 милиони барели дневно во периодот од март до јули.

Конвојскиот транспорт на нафта низ Ормутскиот теснец можеби сега е најдобрата преостаната опција. Државната нафтена компанија на ОАЕ, ADNOC, веќе користи свои и изнајмени бродови за извоз на сурова нафта низ оваа стратешка точка. Танкерите го напуштаат теснецот во конвои под американска воена заштита, обично ноќе. Потоа нафтата се пренесува на друг брод што чека во Оманскиот Залив со директен трансфер од брод до брод.

Проценките за тоа колку нафта излегува од Ормутскиот теснец на овој начин варираат многу. Бродовите ги исклучуваат своите транспондери, па затоа е тешко да се следи активноста. Трговците со суровини веруваат дека околу 9 милиони барели нафта и деривати се транспортираат на овој начин секој ден. Сепак, оваа услуга не е евтина.

Производителите на нафта плаќаат помеѓу 16 и 20 долари за барел за да го компензираат ризикот за екипажите и сопствениците на бродови за минување низ теснецот. Трошоците за осигурување можат да достигнат до 10% од вредноста на бродот и товарот, а снабдувањето со опрема за пренос на нафта од брод до брод станува сè поретко.

Способност за брза поправка

Способноста на „Сауди Арамко“ за брза поправка на оштетената инфраструктура би можела да помогне и во обновувањето на протокот на нафта. Ребека Шулц, виш аналитичар за нафта во ИЕА, истакнува дека „Арамко“ има најразвиен синџир на снабдување во регионот и најдобри можности за поправка на средства, особено цевководи.

Според неа, околу 70% од ресурсите за нивниот бизнис се набавуваат локално, вклучувајќи хемикалии, глави на бунари и цевки. За споредба, Ирак и Кувајт повеќе се потпираат на увезена опрема и меѓународни даватели на услуги за нафтени полиња.

Ранливост на системот и финансиска мотивација

Сè почестите напади врз Саудиска Арабија покажуваат колку е ранлива нејзината енергетска инфраструктура. „Земјата е темел на глобалниот нафтен систем и сè што се случува таму е многу важно“, рече Џим Буркхард, потпретседател на „С&П Глобал Енерџи“. Цените на нафтата на пазарот на Брент скокнаа на 132 долари за барел оваа недела, во споредба со 90 долари на крајот на август.

Со оглед на тоа што саудиската влада се потпира на нафтата за 55% од своите приходи, мотивацијата за повторно започнување на протокот на сурова нафта е висока. Во вториот квартал, „Сауди Арамко“ му плати на Ријад еквивалент на 50 милијарди долари во авторски права, дивиденди и корпоративни даноци.

Милитантите го уништија резервниот план на Саудиска Арабија. Враќањето во Ормутскиот теснец се чини дека е најдобрата опција во моментов за да се одржи протокот на нафта.

Тагови: Ормутскиот теснец Саудиска Арабија

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

притисни ентер